သျှမ်းပြည်မြောက်ပိုင်း နောင်ချိုမြို့နယ်တွင် တိုက်ပွဲများပြင်းထန်နေပြီး စစ်ကောင်စီတပ်မှ လက်နက်ကြီးများဖြင့် နေ့စဉ် ဆက်တိုက်ပစ်ခတ်နေကြောင်း စုံစမ်းသိရသည်။

အောက်တိုဘာလ တတိယပတ်မှ စတင်၍ ယနေ့ (နိုဝင်ဘာလ ၂၆ ရက်)နေ့အထိ နောင်ချိုမြို့တွင် စစ်ကောင်စီတပ်သည် မြေပြင်ထိုးစစ် စတင်လာပြီး တအာင်း (ပလောင်) အမျိုးသား လွတ်မြောက်ရေး တပ်မတော် TNLA ပူးပေါင်းတပ်ဖွဲ့တို့နှင့် တိုက်ပွဲများ ယနေ့ထိ ဆက်လက်ပြင်းထန်နေကြောင်း သိရသည်။

ျ
ယမန်နေ့ (နိုဝင်ဘာလ ၂၅ ရက်)နေ့ ညနေ ၅ နာရီဝန်းကျင်အချိန် ဆမ္မဆယ်ရွာတွင် လက်နက်ကြီးကျ ပေါက်ကွဲမှုကြောင်း နေအိမ်အဆောက်အအုံများ မီးလောင်ပျက်စီးသွားခဲ့သည်ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“မနေ့က ညနေ ၅ နာရီဝန်းကျင်ပဲ ဆမ္မဆယ်ရွာမှာ လက်နက်ကြီးကျပြီး မီးလောင်သွားတယ်။ အဆောက်အအုံတွေအများကြီးပဲ။ အဲနေရာ မီးလောင်တော့ ဘယ်သူမှမသွားရဲကျဘူး။ လူထိခိုက်တာ ရှိလာတော့ မသိသေးဘူး။ နောင်ချိုမှာ နေ့တိုင်းတိုက်ပွဲပြင်းထန်နေတယ် ပိုဆိုးလာနေတယ်”ဟု ၎င်းက ပြောသည်။

နိုဝင်ဘာလ ၂၄ ရက် ညနေ ၈နာရီဝန်းကျင်မှာ နောင်ချိုမြို့နယ် အင်းဝိုင်းကျေးရွာတွင် စစ်ကောင်စီတပ်မှ လက်နက်ကြီး ၂ လုံး ပစ်ခတ်တိုက်ခိုက်ခဲ့ရာ သံယာတော်(၁)ပါးပျံလွန်ပြီး ပြည်သူ ၂ ဦးဒဏ်ရာရရှိခဲ့သည်ဟု TNLA ထုတ်ပြန်ချက်အရသိရသည်။

ပြီးခဲ့သည့် နိုဝင်ဘာလ (၁)ရက်မှ နိုဝင်ဘာ ၂၁ ရက်အထိ သုံးပတ်အတွင်း ဒေသခံ (၁၇)ဦးသေဆုံးပြီး၊ ၂၆ ဦးဒဏ်ရာကာ နေအိမ်အများအပြား ပျက်စီးသွားခဲ့သည်ဟု TNLA သတင်းနှင့်ပြန်ကြားရေး ကထုတ်ပြန်ထားသည်။

ယခုလက်ရှိနောင်ချိုမြို့နယ်မှာ စစ်ကောင်စီနှင့် တအာင်းအမျိုးသားလွတ်မြောက်ရေး တပ်မတော် (TNLA)တို့ တိုက်ပွဲ ပြင်းထန်စွာ ဖြစ်ပွားနေပြီး ဒေသခံ ပြည်သူအများအပြားထပ်မံ စစ်ဘေးတိမ်းရှောင်နေရကြောင်း သိရသည်။

ထို့အပြင် ပြီးခဲ့သည့် (နိုဝင်ဘာလ ၂၄ ရက်) ညပိုင်းအချိန် လားရှိုးမြို့နယ် သံလွင်ရွာကို စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ရာ ကလေးအပါဝင် အရပ်သား(၃) ဦး ဒဏ်ရာရှိပြီး စာသင်ကျောင်းနှင့် နေအိမ်အဆောက်အအုံများ ပျက်စီးခဲ့သည်ဟု လားရှိုးဒေသခံတစ်ဦးက ပြောသည်။

“အဲ ၂၄ ရက်တုန်းက သံလွင်ရွာကို စစ်တပ်က ဗုံးလာကြဲသွားတယ် ညနေပိုင်းအချိန်လောက်ပေါ့ ။ သားမိ ၃ ဦးထိခိုက်တယ်၊ အဲထဲမှာမှ ၁၃နှစ်ကလေးပါတယ်။ ကျန်တဲ့ မိဘ ၂ဦးက အသက် ၄၀ နီးပါးလောက်ရှိတယ်။ အခုတော့ ဆေးရုံမှာ ဆေးကုသနေတယ်။ အခုဆို အဲရွာက လူတွေလည်း ထပ်ပြေးကုန်ပြီ ဘယ်သူမှ သိပ်မနေရဲ့ဘူး”ဟု ၎င်းက ပြောသည်။

ပြီးခဲ့သည့် ဩဂုတ်လ ပထမပတ်အတွင်း လားရှိုးမြို့အခြေစိုက် အရှေ့မြောက် တိုင်းစစ်ဌာနချုပ်ကို ကိုးကန့်တပ်ဖွဲ့ MNDAA က သိမ်းပိုက်လိုက်ပြီးနောက် စစ်ကောင်စီတပ်သည် မိုင်းရယ်မြို့ကို အခြေပြုကာ ရမခ ဖွဲ့စည်းပုံအတိုင်း စက်တင်ဘာလမှ စတင်၍ စစ်အင်အား ပြင်ဆင်စုဖွဲ့နေပြီး လားရှိုးမြို့ကို ပြန်လည်သိမ်းပိုက်နိုင်ပါက အစားထိုးနိုင်ရန် လုပ်ဆောင်လျက်ရှိကြောင်း စစ်ရေးသတင်းရင်းမြစ်တစ်ဦးက ပြောပြချက်အရ သိရသည်။

ေအလုပ်သင် သတင်းထောက် နန်းဆိုင်ခမ်းရေးသားသည်။