မြန်မာ-ထိုင်းနယ်စပ်ဒေသ တာချီလိတ်မြို့မှာရှိတဲ့ ရှဲန်လိုင်အပန်းဖြေနေရာနဲ့ ရွှေပန်းအောင်ဟိုတယ်တွေမှာ ကျားဖြန့်လို့ခေါ်တဲ့ အွန်လိုင်းငွေလိမ်ဂိုဏ်းတွေ တကျော့ပြန်လှုပ်ရှားနေတာ မြင်တွေ့နေရပါတယ်။

၂၀၂၂ ခုနှစ်နဲ့ ၂၀၂၃ ခုနှစ်တွေအတွင်း တာချီလိတ်မြို့မှာ နယ်မြေခံ အာဏာပိုင်တွေရဲ့ ခွင့်ပြုချက်နဲ့ ရင်းနှီးပတ်သက်သူတချို့တွေဟာ လက်နက်ကိုင်အစောင့်အရှောက်တွေရှိတဲ့ ခြံဝင်းတွေနဲ့ အကြီးအကျယ် လုပ်စားခဲ့ဖူးတယ်။

တရုတ်အစိုးရ ဖိအားပေးလို့ တရုတ်နယ်စပ်ဒေသ မူဆယ်မြို့ဘက်မှာ ဖမ်းဆီးခံရတာ၊ ပြန်ပို့ခံရတာတွေကြောင့် ကျားဖြန့်တရုတ်တွေ ကုန်သလောက်နီးပါး ဖြစ်ပေမယ့် ထိုင်းနယ်စပ်ဒေသ တာချီလိတ်မြို့မှာတော့ ကျားဖြန့်တွေကို ဝာာဝန်ယူ အာမခံ လုပ်ဆောင်ပေးနေတဲ့ နယ်မြေခံတာဝန်ခံတွေက ကြိုသတင်းရပြီး ရှောင်ခိုင်းလို့ ဖမ်းမိတယ်ဆိုပေမယ့်လည်း ရာခိုင်နှုန်း အင်မတန်နည်းတဲ့ အရေအတွက်လို့ ဆိုနိုင်ပါတယ်။

တာချီလိတ်မြို့က ကျားဖြန့်တွေကို မထိရဲ၊ မဖမ်းရဲလို့ သတင်းတွေ ထွက်ပေါ်နေတဲ့ကြားက ၂၀၂၄ နှစ်ဦးပိုင်းမှာ ကျိုင်းတုံမြို့ အခြေစိုက် တြိဂံဒေသတိုင်းစစ်ဌာနချုပ် (တဂတ) တိုင်းမှူး ဗိုလ်ချုပ်အောင်ခိုင်ဦး ကိုယ်တိုင်ဦးစီးပြီး လျှပ်တပြတ် ဝင်ဖမ်းတယ်လို့ ပြောကြပြီး၊ တာချီလိတ် ဗျူဟာမှူး သူရဇော်နဲ့ နယ်မြေခံအာဏာပိုင်တွေတောင် ဖမ်းပြီးမှ သိလိုက်ရတယ်လို့ သတင်းတွေမှာ ဖော်ပြထားတာ အမှတ်ရမိသေးတယ်။

ကျားဖြန့်တွေ ဖမ်းဆီးမှုရှိပြီးနောက် တာချီလိတ်မြို့မှာ ဓားပြမှု၊ ကြီးကြီးမားမား ပြန်ပေးဆွဲတာတို့ နည်းပါးသွားတယ်။ ကုန်စျေးနှုန်း အဆမတန် မြင့်တက်နေတာတွေလည်း နည်းပါးသွားခဲ့တာ တွေ့ရတယ်။

ဒါ့အပြင် ကျိုင်းတုံမြို့အခြေစိုက် တြိဂံဒေသတိုင်းစစ်ဌာနချုပ် (တဂတ) တိုင်းမှူး ဗိုလ်ချုပ်အောင်ခိုင်ဦးလည်း မန္တလေး ပြောင်းရွှေ့သွားသလို တာချီလိတ်ဗျူဟာမှူး သူရဇော်လည်း မိုင်းဆတ်မြို့ကို တပ်မမှူးအနေနဲ့ ပြောင်းရွှေ့သွားခဲ့တယ်။

ဒါပေမဲ့ တာချီလိတ် ဗျူဟာမှူး ပြောင်းရွှေ့သွားပြီး ဗျူဟာမှူးအသစ် ဒုဗိုလ်မှူးကြီး သန့်လှိုင်ဝင်းမရောက်လာခင်မှာ ကျိုင်းတုံမြို့အခြေစိုက် တြိဂံဒေသတိုင်းစစ်ဌာနချုပ် (တဂတ) တိုင်းမှူး ဗိုလ်မှူးချုပ်စိုးလှိုင် ကကြားကာလ ဗျူဟာမှူးအနေနဲ့ ဝာာဝန်ယူထားချိန်မှာ ကျားဖြန့်တွေ အတင့်ရဲ ပြန်လှုပ်ရှားနေတယ်လို့ သိရတယ်။

တာချီလိတ်မှာ စံချိန်တင် ရေကြီးလိုက်ကတည်းက နယ်မြေခံအာဏာပိုင်တွေ ကယ်ဆယ်ရေးဘက် အာရုံစိုက်နေချိန် ကျားဖြန့်တကျော့ပြန်ဖို့ အခွင့်အရေး ရနေသလို ဖြစ်နေတယ်။ ကျားဖြန့်တွေ တခန်းရပ်သွားပြီး သြဂုတ်လလယ်ပိုင်းက အစပြုလို့ ကျားဖြန့်တရုတ်တွေ ပြန်ပြီး တကျော့ပြန် ဝင်လှုပ်ရှားနေတာ တွေ့ရတယ်။

တာချီလိတ် ရှဲန်လိုင်အပန်းဖြေနေရာနဲ့ လေယာဥ်ကွင်းလမ်းပေါ်က ရွှေပန်းအောင်ဟိုတယ်တွေမှာ ကျားဖြန့်တွေ အုပ်စုလိုက် မြင်တွေ့နေရတယ်။

ကျနော် ငါးဂိမ်းပစ်ရင်း ရောက်ခဲ့ဖူးတဲ့ ရှဲန်လိုင်အပန်းဖြေခန်း နဲ့ ရွှေပန်းအောင် ဟိုတယ်မှာ လာဆော့တဲ့သူတွေ၊ အပန်းဖြေ အနားယူတဲ့သူတွေဟာ အကုန်နီးပါး ကျားဖြန့်လုပ်တဲ့ တရုတ်နိုင်ငံသားတွေ စည်ကားနေတာပါပဲ။

တာချီလိတ်မြို့က ရဲတပ်ဖွဲ့တွေကလည်း လမ်းမပေါ်က ကား၊ ဆိုင်တွေမြင်ရင် မကြာခဏ တားဆီးစစ်ဆေးနေ တာရှိပေမယ့် ကျားဖြန့်တွေကို တားဆီးစစ်ဆေးတာ မရှိပါဘူး။ တရုတ်နိုင်ငံသား ကျားဖြန့်တွေရဲ့ ကားတွေမြင်တာနဲ့ ရှောင်ပေးတယ်။

မြန်မာ-ထိုင်း-လာအို သုံးနိုင်ငံ ထိစပ်နေတဲ့ တာချီလိတ်မြို့ဟာ ကျားဖြန့်တွေအတွက် ခိုလှုံရာ အပန်းဖြေမြို့အဖြစ် ထင်ပေါ်လာတော့မယ့် အနေအထားပါ။

ကျားဖြန့်နောက်ဆက်တွဲ ဆိုးကျိုးတွေကြောင့် ကျားဖြန့်လုပ်ငန်းလုပ်ကိုင်သူကို ဖမ်းဆီးအရေးယူဖို့ တရုတ်အစိုးရရဲ့ ဖိအားပေးမှုတွေ ရှိလာပြီးနောက်ပိုင်း သျှမ်းမြောက်နဲ့ ကရင်ပြည်နယ်မှာ တိုက်ပွဲတွေဖြစ်ပွားခဲ့တဲ့ သာဓကလည်း ရှိခဲ့ပါပြီ။

ဒါပေမဲ့လည်း သျှမ်းမြောက်မှာ တိုက်ပွဲကြောင့် ပြည်သူတွေ အသက်ဆုံးရှုံး၊ အိုးအိမ်စည်းစိမ်တွေ ပျက်စီးတာ ယနေ့အချိန်ထိ မပြီးဆုံးသေးပါဘူး။ တိုက်ပွဲတွေမဖြစ်တဲ့ တာချီလိတ်မှာ ကျားဖြန့်တွေ တကျော့ပြန် စတင်တာကိုတော့ လုံးဝ လက်မခံနိုင်သလို ကျားဖြန့်လုပ်ငန်း လုပ်ကိုင်သူတွေကို စုံစမ်းဖော်ထုတ် တားဆီးသင့်ပါတယ်။

တာချီလိတ်ဒေသခံ တစ်ဦးရဲ့ ပေးစာဖြစ်ပါတယ်။