သျှမ်းပြည် ပင်လောင်းမြို့နယ် ကျေးရွာအတွင်း စစ်ကောင်စီနှင့် ပအိုဝ်းပြည်သူ့စစ် PNO တို့ တပ်စွဲထားမှုကြောင့် စစ်ဘေးရှောင်များနေရပ်မပြန်ရဲသေးကြောင်း စုံစမ်းသိရသည်။

အဆိုပါ စစ်ဘေးရှောင်များသည် ပြီးခဲ့သည့် အောက်တိုဘာလတွင် ပင်လောင်းမြို့နယ် အတွင်း စစ်ကောင်စီ၊ PNO နှင့် ကရင်နီတော်လှန်ရေး တပ်ပေါင်းစုတို့ တိုက်ပွဲဖြစ်ပွားမှုကြောင့် စစ်ဘေးရှောင် တစ်ထောင်ကျော်သည် ညောင်ရွှေမြို့နယ်သို့ ထွက်ပြေးတိမ်းရှောင်လာခဲ့ရသည်။

ထို့ကြောင့် လက်ရှိ စစ်ဘေးရှောင်များ၏ နေရပ်ဖြစ်သည့် ပင်လောင်းမြို့နယ် ဗန်းမောက်၊ ကုန်းပေါကျေးရွာတို့တွင် တိုက်ပွဲများငြိမ်းသက်နေပါသော် လည်း စစ်ကောင်စီ နှင့် ပအိုဝ်းပြည်သူ့စစ် PNOတို့သည် ကျေးရွာအတွင်း၌ နေရာယူထားသည့် အတွက်ကြောင့် ဒေသခံများ နေရပ်မပြန်ရဲ့သေးကြောင်း စစ်‌ဘေးရှောင်အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျနော်တို့ကတော့ အိမ်မပြန်ရဲသေးဘူး။ စစ်ကောင်စီတွေက ရွာထဲမှာရှိနေတာ။အဝတ်တွေ တောင်ပြန် ယူလို့မရဘူး။ အခုပြေးလာတဲ့လူတွေ က ပါလာတာလေးနဲ့ ခင်းပြီးအိပ်နေရတာ။ သူတို့ကတည်းက မြေမြုပ်မိုင်းတွေထောင်လို့ ‌ဒေသခံတွေ မြေမြုပ်မိုင်းနင်း မိတယ်။ ”ဟု စစ်‌ဘေးရှောင် အမျိုးသားတစ်ဦးကပြောသည်။

ထိုပြင် စစ်ကောင်စီ နှင့် ပအိုဝ်းပြည်သူ့စစ် PNO တို့သည် ရွာအတွင်း၌ နေရာယူထားသည့် အတွက် မြေမြုပ်မိုင်း အန္တရာယ်များကိုလည်း ဒေသခံများက စိုးရိမ်နေရကြောင်း ဒေသခံများက ပြောသည်။

ပြီးခဲ့သည့် (နိုဝင်ဘာ ၂၁ ရက်)တွင် ပင်လောင်းမြို့နယ် နောင်တရားမြို့သို့ စစ်ဘေးလာရှောင်သည့် အမျိုးသားသည် ၎င်း၏နေရပ်ဖြစ်သည် နောင်ဝိုးကျေးရွာပြန်သွားပြီး ခြံရှင်းနေစဉ် မြေမြုပ်မိုင်းနင်းမိကာ ပြင်းထန်ဒဏ်ရာရရှိခဲ့သည်။

ညောင်ရွှေမြို့နယ် စမ်းရေကြည်၊ ဟဲဆတ်၊ နားမွန် ရွာတို့တွင် ရောက်ရှိနေသည့် စစ်ဘေးရှောင် တစ်ထောင်ဝန်ကျင် သည် အလုပ်ကိုင်ရှားပါးခြင်းများကို ကြုံတွေ့နေပြီး အလှူရှင်မရှိသည့် အတွက်ကြောင့် စားနပ်ရိက္ခာများကို ချေးငှား၍ စားသုံးနေရကြောင်း သိရသည်။

“ အခက်အခဲကတော့မျိုးစုံပါပဲ။ အဓိကတော့ ဝမ်းရေး အတွက် ပိုကြပ်တည်းလာတယ်။ နေရပ်ပြန်လို့ရရင်တော့ အဆင်ပြေတာပေါ့” ဟု ၎င်းက ဆက်လက်ပြောသည်

မိုးဗြဲမြို့တွင် စစ်ကောင်စီက စစ်အင်အားများဖြည့်တင်းနေလျက်ပြီး မိုးဗြဲ အနီးတစ်ဝိုက်တွင် တော်လှန်ရေးတပ်ဖွဲ့များနှင့် ထိတွေ့တိုက်ပွဲများဖြစ်ပွားကာ ကျေးရွာများအတွင်းသို့ နေ့စဥ်လက်နက်ကြီးနှင့် ပစ်ခတ်နေလျက်ရှိကြောင်းသိရသည်။