သျှမ်းပြည်မြောက်ပိုင်း၊ နောင်ချိုမြို့နယ်တွင် စစ်ကောင်စီလေကြောင်းတိုက်ခိုက်မှုကြောင့် သုံးပတ်အတွင်း ဒေသခံ (၁၇) ဦးသေဆုံးခဲ့ကြောင်း TNLA သတင်းနှင့်ပြန်ကြားရေး ကထုတ်ပြန်ထားသည်။
ပြီးခဲ့သည့် နိုဝင်ဘာလ (၁)ရက်နေ့မှ ၂၁ ရက်နေ့အထိ သုံးပတ်အတွင်း ဒေသခံ (၁၇)ဦးသေဆုံးပြီး ၂၆ ဦးဒဏ်ရာကာ နေအိမ်အများပြား ပျက်စီးသွားခဲ့ သည်ဟု အဆိုပါ ထုတ်ပြန်ချက်တွင်ဖော်ပြထားသည်။
စစ်ကောင်စီမှ တပ်ကြီးကုန်း ကျေးရွာသို့ နိုဝင်ဘာလ (၂၀)ရက်နေ့ ညနေပိုင်းနှင့် သန်းခေါင်ယံအချိန်တွင် ဂျက်ဖိုက်တာဖြင့် ဗုံး(၄) ကြိမ်လာရောက်ကြဲချမှုကြောင့် ဒေသခံ နှစ်ဦးသေဆုံးပြီး ၅ ဦးထိခိုက်ဒဏ်ရာ ရရှိခဲ့ကြောင်း သျှမ်းသံတော်ဆင့်မှ စုံစမ်းသိရှိရသည်။
စစ်ကောင်စီတပ်မှ ပြည်သူများကိုဦးတည်ကာ လေကြောင်းတိုက်ခိုက်မှုများလုပ်ဆောင် လာနေသောကြောင့် ဒေသခံများကို လူစုလူဝေးမပြုလုပ်ရန် နှင့် လေကြောင်းရန် ကာကွယ်ရန် အသိပေးထုတ်ပြန်ချက်များကို လိုက်နာရန် ပြောဆိုထားသည်။
“မိဘပြည်သူများအနေနဲ့ စစ်ရေးတွေ သတိရှိဖို့လိုတယ်။ လူစုလူဝေးတွေလည်း ရှောင်ရှားရမယ်။ လေကြောင်းရန် ကာကွယ်ဖို့ ထုတ်ပြန်ထားတာတွေလည်း လိုက်နာပေးကြဖို့ လိုအပ်တယ်။ စစ်ကောင်စီက ပြည်သူတွေကို ပစ်မှတ်ထား တိုက်ခိုက်နေတော့ ဒါတွေကို သတိရှိ လိုက်နာဖို့ လိုတယ်။” ဟု သတင်းနှင့် ပြန်ကြားရေး PSLF/TNLA က အသိပေးပြောထားသည်။
“ဒီသုံးပတ်အတွင်း သေတာ ၁၇ ယောက်တောင် မကဘူးထင်တယ်။ တချို့တွေလည်း အဝေးရောက်နေတော့ သေသွားတဲ့သူကို မမြင်လိုက်ရဘူး။ သေတယ်လို့ပဲ သိလိုက်တဲ့သူတွေရှိတယ်။ စစ်ကောင်စီက ဗုံးခဏခဏ လာကြဲတော့ မနေရဲကြတော့ဘူး။ တစ်ချို့ဆို အမျိုးရှိတဲ့ ဘက်ကို ပြေးကုန်ကြတယ်။ မြို့ထဲမှာဆို သုံးပုံ တစ်ပုံ ပဲကျန်တယ်။” ဟု နောင်ချို မြို့ခံတစ်ဦးက သျှမ်းသံတော်ဆင့်ကို ပြောသည်။
ယခုလက်ရှိနောင်ချိုမြို့နယ်မှာ စစ်ကောင်စီနှင့် တအာင်းအမျိုးသားလွတ်မြောက်ရေး တပ်မတော် (TNLA)တို့ တိုက်ပွဲ ပြင်းထန်စွာ ဖြစ်ပွားနေပြီး ဒေသခံ ပြည်သူအများအပြားထပ်မံ စစ်ဘေးတိမ်းရှောင်နေရကြောင်း သိရသည်။
အလုပ်သင်သတင်းထောက် နန်းလရောင် ရေးသားသည်။
Leave a Comments