သျှမ်းပြည် နောင်ချိုမြို့နယ် ကုန်းကြီးရွာမအတွင်းရှိ ဘုန်းကြီးကျောင်းနှင့် အနီးတဝိုက်ကို စစ်ကောင်စီတပ်က လေကြောင်းဗုံးကြဲ တိုက်ခိုက်သဖြင့် ဘုန်းကြီးကျောင်းတွင် ခိုလှုံနေသော စစ်ရှောင် တစ်ဦး သေဆုံးပြီး နှစ်ဦးဒဏ်ရာရ သွားကြောင်း စုံစမ်းသိရသည်။
ယမန်နေ့ (နိုဝင်ဘာလ ၂၀ရက်)နေ့ နေ့လည် ၁၁ နာရီဝန်းကျင်တွင် တအာင်း(ပလောင်) အမျိုးသား လွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့နယ် ကုန်းကြီးရွာမကျေးရွာရှိ ဘုန်းကြီးကျောင်းတွင် စစ်တပ်ဗုံးကြဲတိုက်ခိုက်ခဲ့သည်ဟု ဒေသခံအမျိုးသားက သျှမ်းသံတော်ဆင့်ကို ပြောသည်။
အဆိုပါ ဘုန်းကြီးကျောင်းအနီးတွင် စစ်ရှောင်များ ခိုလှုံနေစဉ်အချိန်တွင် စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ရာ စစ်ရှောင်ပြည်သူ အမျိုးသမီး တစ်ဦး သေဆုံးပြီး အမျိုးသား နှစ်ဦးဒဏ်ရာရသွားကြောင်း ၎င်းအမျိုးသားက ဆက်ပြောသည်။
“မနေ့က နေ့လည်ပိုင်း ၁၁ နာရီဝန်းကျင်မှာ စစ်တပ်က ကုန်းကြီးရွာမဘုန်းကြီးကျောင်းအနီးမှာ လေယာဉ်နဲ့ ဗုံလာကြဲသွားတယ် စစ်ရှောင် မိန်းကလေး တစ် ဦးသေတယ် အမျိုးသား နှစ်ဦးကဒဏ်ရာရသွားတယ်။ ပြင်ဦးလွင်ဆေးရုံခေါ်သွားနေတဲ့ချိန် အမျိုးသမီး တစ် ဦးက လမ်းတစ်ဝက်တင် ဆုံးသွားတယ်။ ဒဏ်ရာရတဲ့သူက တယောက်က သူမရဲ့ အဖေဖြစ်တယ်”ဟု ၎င်းက ပြောသည်။
နောင်ချိုမြို့နယ်၊ ဂန့်ဂေါ်နှင့် တောင်းခမ်းဒေသတို့တွင် စစ်ကောင်စီတပ်နှင့် TNLA ပူပေါင်းတပ်ဖွဲ့တို့ ပြီးခဲ့သည့် (အောက်တိုဘာလ ၁၉ ရက်) မှ စတင်တိုက်ပွဲ ပြင်းထန်နေပြီး လက်ရှိ(နိုဝင်ဘာလ ၂၁ရက်)နေ့အထိ ရေဝံကျေးရွာဘက်တွင် နေ့စဉ်နှင့်အမျှ တိုက်ပွဲ ဆက်လက်ပြင်းထန်နေကြောင်း မြို့နယ်ဒေသခံ အသက် ၄၀ ရှိ အမျိုးသားတစ်ဦးက ပြောသည်။
“အရင်လကတည်းက တိုက်ပွဲတွေ ပြင်းထန်လာတာ။ စစ်တပ်က နေ့တိုင်းဗုံးကြဲတယ် မြို့ထဲရော ကျေးရွာတွေဘက်မှာရောပဲ။ အခုလည်း ရေဝံကျေးရွာဘက်မှာ တိုက်နေကြတာ အသံတော်တော်ကျယ်တယ်။ လက်နက်ငယ်နဲ့ရော လက်နက်ကြီးနဲ့ရော ပစ်ကြတယ်။ အခုဆို အကုန်လုံးနီးပါး ထွက်ပြေးကုန်ပြီ မပြေးဘဲနေတဲ့သူလည်း ရှိတယ်။ ဘယ်ကိုရှောင်လို့ရှောင်ရမှန်းမသိတော့ဘူး”ဟု ၎င်းက ပြောသည်။
ပြီးခဲ့သည့် (နိုဝင်ဘာလ ၁၈ရက်)နေ့တွင်လည်း နောင်ချိုမြို့နယ်အတွင်း အင်းဝိုင်းကျေးရွာရှိ အမှတ်(၁) ဆင်းရွှေလီ သကြားစက်ကို စစ်ကောင်စီတပ်မှ လေကြောင်းဖြင့် ဗုံးနှစ်လုံး ကြဲချတိုက်ခိုက်ခဲ့ရာ စက်ရုံ အဆောက်အဦ ထိခိုက်ပျက်စီးပြီး ကျေးရွာရှိ စစ်ရှောင် (၁၀၀၀) နီးပါး ဘေးလွှတ်ရာသို့ ထပ်မံထွက်ပြေးနေရကြောင်း ဒေသခံများက ပြောသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments