သျှမ်းပြည် ညောင်ရွှေမြို့နယ်တွင် ရောက်ရှိနေသော စစ်ဘေးရှောင်များသည် အလုပ်အကိုင်မရှိခြင်း၊ အလှူရှင်များမရှိသည့်အတွက် ဝမ်းရေးကို ချေးငှားပြီး ဝမ်းရေးဖြေရှင်းနေကြကြောင်းစုံစမ်းသိရသည်။ 

ပင်လောင်းမြို့နယ်တွင် စစ်ကောင်စီ၊ ပအိုဝ်းပြည်သူ့ စစ် PNO နှင့် ကရင်နီတော်လှန်ရေးတပ်ပေါင်းစုတို့ တိုက်ပွဲများ ကြောင့် ညောင်ရွှေမြို့သို့ စစ်ရှောင် တစ်ထောင်ဝန်းကျင်သည် ပြီးခဲ့သည့် အောက်တိုဘာလတွင် ထွက်ပြေး တိမ်းရှောင်လာကြရ ကြောင်းသို့ရသည်။ 

ညောင်ရွှေမြို့နယ် စမ်းရေကြည်၊ ဟဲဆတ်၊ နားမွန် ရွာတို့တွင် ရောက်ရှိနေသည့် စစ်ဘေးရှောင် တစ်ထောင်ဝန်ကျင် သည် အလုပ်ကိုင်ရှားပါးခြင်းများကို ကြုံတွေ့နေပြီး အလှူရှင်မရှိသည့် အတွက်ကြောင့် စားနပ်ရိက္ခာများကို ချေးငှား၍ စားသုံးနေရကြောင်း စစ်‌ဘေးရှောင်အမျိုးသားတစ်ဦးက သျှမ်းသံတောင်ဆင့်ကို ပြောသည်။ 

“အလုပ်ကလည်းမရှိဘူး။ အရမ်းပါးတယ်။အလုပ်က  မရှိတာပဲများပါတယ်။ တကယ်ကို အရမ်း အကူညီလိုအပ်နေပါတယ်။ မြို့နဲ့အလှမ်းဝေးတော့ ခက်တယ်။အကုန်လုံးက တနေ့လုပ်တနေ့စားတွေ ကြီးပဲလေ။ သွားဖို့လာဖို့ ခက်တော့ လာလှူတဲ့လူလည်းမရှိဘူး။အခုကတော့ ရွာကလူကို ချေးငှား စားပြီး အလုပ်လေးရှိမှ ရတဲ့ ပိုက်ဆံကို ပြန်စပ်နေ ရတာ”ဟု စစ်ဘေးရှောင်အမျိုးသားတစ်ဦးက ပြောသည်။ 

ထို စမ်းရေကြည်၊ ဟဲဆတ်၊ နားမွန် ရွာတို့သည် ညောင်‌ရွှေ – ပင်လောင်း နယ်စပ်တွင်တည်ရှိပြီး စစ်ဘေးရှောင်များသည် လက်ရှိတွင် ဘုန်းကြီးကျောင်းနှင့် ခန်းမဆောင်များတွင် နေထိုင်နေကြကြောင်း ၎င်းကဆက်ပြောသည်။ 

လက်ရှိပင်လောင်းမြို့နယ်တွင် တိုက်ပွဲများ ငြိမ်သတ်လာသော်လည်း စစ်ကောင်စီနှင့်  ပအိုဝ်းပြည်သူ့ စစ် PNOတို့က နေရပ်ပြန်ခွင့်မပြုသေးကြောင်း သိရသည်။

အဆိုပါတိုက်ပွဲဖြစ်ပွားနေသည့် ကျေးရွာများမှ ဒေသခံများသည် ညောင်ရွှေမြို့နယ် နှင့် ပင်လောင်းမြို့အတွင်း သို့ ပြီးခဲ့သည့်စက်တင်ဘာလ နောက်ဆုံးပတ်မှစတင်၍ ထွက်ပြေး တိမ်းရှောင်ခဲ့ရကြောင်း သိရသည်။