သျှမ်းပြည် နောင်ချိုမြို့နယ် အင်းဝိုင်းကျေးရွာရှိ ဆင်းရွှေလီသကြားစက်ကို စစ်ကောင်စီတပ်က လေကြောင်းဗုံးကြဲခဲ့ခြင်းကြောင့် စစ်ဘေးရှောင် (၁၀၀၀) နီးပါး ဘေးလွတ်ရာ ထပ်မံထွက်ပြေးနေရကြောင်း စုံစမ်းသိရသည်။
ယမန်နေ့ (နိုဝင်ဘာလ ၁၈ ရက်) ည ၇ နာရီခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့နယ်အတွင်း အင်းဝိုင်းကျေးရွာရှိ အမှတ်(၁) ဆင်းရွှေလီ သကြားစက်ကို စစ်ကောင်စီတပ်မှ လေကြောင်းဖြင့် ဗုံး(၂)လုံး ကြဲချတိုက်ခိုက်ခဲ့ရာ စက်ရုံ အဆောက်အဦ ထိခိုက်ပျက်စီးပြီး ကျေးရွာရှိ စစ်ရှောင် (၁၀၀၀) နီးပါး ဘေးလွတ်ရာသို့ ထပ်မံထွက်ပြေးနေရကြောင်း ဒေသခံများက ပြောသည်။
“မနေ့ည ၇ နာရီလောက်က လေယာဉ်နဲ့ အင်းဝိုင်းသကြားစက်ကို ဗုံး ၂ လုံး ကြဲသွားတယ်၊ ကျနော်တို့ မအိပ်သေးဘူး အဲ့ချိန် အသံအကျယ်ကြီးပဲ။ သကြားစက်ရုံ အရှေ့ဘက်နား ကျတယ်၊ အင်ဂျင်နီယာအဖွဲ့ထဲက လူထိတာရှိတယ်။ ဒီက စစ်ဘေးရှောင်တွေလည်း ကုန်းသာဘက် ထပ်ပြီး ထွက်ပြေးရတာ”ဟု နောင်ချိုဒေသခံ အသက်(၅၀) ကျော်အရွယ်ရှိ စစ်ဘေးရှောင်အမျိုးသားက သျှမ်းသံတော်ဆင့်ကို ပြောသည်။
နောင်ချိုမြို့နယ်ကို စစ်ကောင်စီတပ်မှ နေ့စဉ်နီးပါး လေကြောင်းဗုံးကြဲမှုနှင့် လက်နက်ကြီး ပစ်ခတ်မှုများကြောင့် စစ်ဘေးရှောင် (၁၀၀၀) နီးပါးသည် အင်းဝိုင်းကဲ့သို့ ကျေးရွာများမှ ဘေးလွတ်ကင်းမည့် ကုန်းသာနှင့် ချိုခမ်းကျေးရွာများဘက်သို့ ထပ်မံတိမ်းရှောင်နေရပြီး နေရာထိုင်ခင်းနှင့် စားဝတ်နေရေး အခက်အခဲ ဖြစ်ပေါ်နေကြောင်း စစ်ဘေးရှောင်ကူညီသူများထံမှ သိရသည်။
အလားတူ နောင်ချိုမြို့နယ် သဲတိုက်ကျေးရွာဘက်သို့လည်း ယမန်နေ့ ည(၁၀) နာရီခန့်တွင် စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ရာ လူထိခိုက်သေဆုံးမှု ရှိကြောင်း ဒေသခံများက ပြောသည်။
“မနေ့ညက ၁၀ နာရီလောက် သဲတိုက်ဘက်ကို လေယာဉ်ပျံနဲ့ ဗုံးကြဲသွားတယ်။ လူထိခိုက်သေဆုံးတာတော့ ရှိတယ်။ အခုက ဘယ်သူမှ မနေရဲအောင်ကို လေယာဉ်နဲ့ကော ဗုံးကြဲတယ်၊ လက်နက်ကြီးနဲ့လည်း နေ့တိုင်းပစ်နေတယ်။ ပြည်သူရှိလည်း ပစ်၊ စစ်သားရှိလည်း ပစ် အဲ့လိုဖြစ်နေတာ”ဟု ၎င်းစစ်ဘေးရှောင် အမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် နိုဝင်ဘာလ (၁၂) ရက်ကလည်း နောင်ချိုမြို့ မြို့မဈေးအနီးရှိ လူစည်ကားရာ လက်ဖက်ရည်ဆိုင်ကို စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ရာ ကားဆရာနှင့် ခရီးသည်များ အပါအဝင် ပြည်သူ (၁၁) ဦး သေဆုံးခဲ့ပြီး အများအပြား ထိခိုက်ဒဏ်ရာ ရရှိခဲ့သည်။
Leave a Comments