သျှမ်းပြည်မြောက်ပိုင်း၊ ကျောက်မဲမြို့တွင် စစ်ရေးအခြေအနေ ငြိမ်သက်နေသော်လည်း ပြည်သူများဝမ်းရေး အတွက် အလုပ်လုပ်ရန် ခက်ခဲနေသေးကြောင်း စုံစမ်းသိရသည်။
ကျောက်မဲမြို့ကို တအာင်းအမျိုးသားလွတ်မြောက်ရေးတပ်မတော် (TNLA) သိမ်းပိုက်ပြီးနောက်ပိုင်း စစ်ရှောင်အများစု နေရပ်ပြန်လာနေကြပြီး ဝမ်းရေးအတွက် အလုပ်အကိုင် ရှားပါးနေသေးကာ အခက်အခဲများဖြင့် ကြုံနေရကြောင်း ကျောက်မဲ နေရပ်ပြန် စစ်ရှောင်များက ပြောသည်။
လက်ရှိကာလသည် အလုပ်အကိုင် ရှားပါးနေသည့်အချိန်ဖြစ်ပြီး တဖက်တွင်လည်း ကုန်စျေးနှုန်း အဆမတန် မြင့်တက်နေမှုကြောင့် ရေရှည်စားနပ်ရိက္ခာ ပြတ်လပ်နိုင်ကြောင်းလည်း နေရပ်ပြန် စစ်ရှောင် အမျိုးသမီးက သျှမ်းသံတော်ဆင့် ကို ပြောသည်။
“ တိုက်ပွဲတွေငြိမ်တော့ နေရပ်ပြန်ရတာတော့ စစ်ရှောင်တော့လည်း ပိုက်ဆံကကုန်တယ်လေ။ အခု ဒီမှာလည်း လုပ်ကိုင်းစားသောက်လို့လည်းမရဘူး။ နေစရိတ်မကုန်တော့ သက်သာတာပေါ့” ဟု နေရပ်ပြန် စစ်ရှောင်အမျိုးသမီး ကဆိုသည်။
လက်ရှိ ကျောက်မဲမြို့နယ် ကုန်စည်စီးဆင်းမှုနှင့်ပတ်သက်ပြီး စစ်ကောင်စီဘက်မှ ဖြတ်လေးဖြတ်ပုံစံမျိုးဖြင့် အဘက်ဘက်မှ ပိတ်ထားသဖြင့် စားသောက်ကုန်စျေးနှုန်းသည် အဆမတန် စျေးမြင့်တက်လာမှုကြောင့် ပြည်သူများ အဆင်မပြေမှုများဖြစ်နေကြောင်း ၎င်းက ထပ်လောင်းပြောသည်။
“ ကြက်ဉ တစ်လုံး (၅၀၀)ကျပ်၊ ဆန်တပြည် ကို ရှစ်ထောင်ကျပ် ပေးနေရတာ။ အလုပ်ကလည်း မရှိတော့ တနေ့တနေ့ပိုပြီးကြပ်တည်းလာတယ်။ အဆင်မပြေဘူး။ တိုက်ပွဲဆက်ဖြစ်ရင် ဘယ်နားသွားပုန်းနေရမှာလဲ” ဟု အထက်ပါ အမျိုးသမီးက ထပ်လောင်းပြောသည်။
ထို့အပြင် ကျောက်မဲမြို့နှင့် အခြားသော သျှမ်းမြောက် ဒေသသို့ သွားမည့် ခရီးသည်များကို ဗထူးဂိတ်တွင် အစစ်ဆေးတင်းကြပ်ထားသောကြောင့် စားသောက်ကုန် အမြောက်အများတင်ဆောင်ခွင့် မပေးတော့ကြောင်း နေရပ်ပြန်စစ်ရှောင် အမျိုးသားတစ်ဦးကလည်း သျှမ်းသံတော်ဆင့်ကိုပြောသည်။
“လူတော့သွားလာလို့ရတယ်။ စားသောက်ကုန်နဲ့ တခြားသောကုန်တွေ ပေးမတင်တော့ဘူး။ ရေသန့် နဲ့ ပဲနို့တောင် တစ်ကဒ်ပြည့်ရင် လှူခဲ့ရမဲ့ အနေထားဖြစ်နေတယ်။ ဆေးဝါးအချို့တော့ တင်ခွင့်ပြုထားတယ်။ တော်တော်လေးကို စစ်ဆေးတင်းကြပ်ထားတာ။” ဟု နေရပ်ပြန် စစ်ရှောင် အမျိုးသားက ဆိုပြန်သည်။
လက်ရှိကျောက်မဲမြို့တွင် စစ်ရှောင် အများစုပြန်လာကြသော်လည်း စစ်ကောင်စီဖက်က တန်ပြန်ထိုးစစ်ဆင်လာမှာ စိုးရိမ်နေကြပြီး လေကြောင်းဖြင့် လာရောက် တိုက်ခိုက်မည်ကို ကြောက်လန့်နေကြရသည်ဟု ၎င်း အမျိုးသားက ထပ်လောင်းပြောသည်။
၁၀၂၇ စစ်ဆင်ရေး ဒုတိယလှိုင်းအတွင်း TNLA မှ ကျောက်မဲမြို့ကို ပြီးခဲ့သည့် ဩဂုတ်လ (၆) ရက်နေ့တွင် သိမ်းပိုက်နိုင်ခဲ့ပြီး စစ်ကောင်စီဖက်မှလည်း လေကြောင်းဖြင့် ဆယ်ကြိမ်ထက်မနည်း ဗုံးကြဲတိုက်ခိုက်မှုများ လုပ်ဆောင်ခဲ့သည်။
အလုပ်သင် သတင်းထောက် နန်းလရောင် ရေးသားသည်။
Leave a Comments