သျှမ်းပြည်မြောက်ပိုင်း ကျောက်မဲမြို့နယ်အတွင်းရှိ မိုင်းငေါ့မြို့ မန်လုံရပ်ကွက်တွင် စစ်ကောင်စီ ဗုံးကြဲတိုက်ခိုက်ခဲ့ပြီး ဒေသခံ ၅ ဦး ဒဏ်ရာရှိကာ နေအိမ်အဆောက်အအုံများ ပျက်စီးသွားခဲ့သည်ဟု စုံစမ်းသိရသည်။
တအာင်း(ပလောင်) အမျိုးသားလွတ်မြောက်ရေး တပ်မတော် TNLA သိမ်းပိုက်ထားသည့် မိုင်းငေါ့မြို့ မန်လုံရပ်ကွက်တွင် ယနေ့ (နိုဝင်ဘာလ ၁၇)ရက် နေ့လည် ၁၂ ဝန်းကျင်တွင် စစ်ကောင်စီ လေကြောင်းဖြင့် ပေါင် (၃၀၀)ဗုံး ၂ကြိမ် ကြဲချတိုက်ခိုက်ခဲ့ရာ အမျိုးသား ၁ဦးအပါအဝင် အမျိုးသမီး ၄ ဦးဒဏ်ရာရှိခဲ့ပြီး အဆောက်အအုံများ ပျက်စီးသွားခဲ့သည်ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီနေ့ နေ့လည် ၁၂ ဝန်းကျင် ထမင်းစားချိန်မှာပဲ စစ်တပ်က လေယာဉ်နဲ့ ၂ ကြိမ် ဗုံးလာကြဲသွားတယ်။ ဒေသခံ ၅ဦး ထိသွားတယ်။ အိမ်တော့ တော်တော်များများပျက်စီးသွားတယ်။ လေယာဉ်သံက မနက်ကတည်းက ကြားတာ ဒီဘက်လာကြဲမယ်လို့ မထင်တော့ ကိုယ့်အိမ်မှာပဲ နေနေကြတာ။ အခုက တော်တော်လေးလန့်နေကြတယ်” ဟု ၎င်းက ပြောသည်။
ထို့အပြင် (နိုဝင်ဘာလ ၁၆ရက်)နေ့ ည ၈နာရီခွဲဝန်းကျင်တွင်လည်း နောင်ချိုမြို့ လုံစံကျေးရွာတွင် စစ်ကောင်စီ လေကြောင်းဖြင့် ထပ်မံဗုံးကြဲတိုက်ခိုက်ခဲ့ရာ ၁၂ အရွယ်အမျိုးသမီးငယ်တစ်ဦး သေဆုံးပြီး ဒေသခံ ၃ ဦး ဒဏ်ရာရရှိခဲ့သည်ဟု နောင်ချိုဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“အခုတလော စစ်တပ်က နေ့တိုင်းဗုံးလာကြဲတယ် ။ မနေ့က ည ၈ နာရီခွဲဝန်းကျင်လောက်မှာ စစ်တပ်က လေယာဉ်နဲ့ ထပ်မံလာကြဲသွားတယ်။ ထိပြီး သေသွားတဲ့ ကလေးက ၁၂နှစ်ပဲ ရှိသေးတယ်။ ၃ဦးထိခိုက်သွားတယ်။ အခုဆိုရင် မြို့ထဲမှာသိပ်မနေရဲကြတော့ဘူး။ ထပ်ရှောင်တဲ့သူလည်း ရှောင်နေကြတယ်” ဟု ၎င်းက ပြောသည်။
မိုင်းငေါ့မြို့တွင် ပြီးခဲ့သည့် ၂၀၂၃ ခုနှစ် ဒီဇင်ဘာလ ၃၁ ရက်နေ့ မြောက်ပိုင်းညီနောင် မဟာမိတ်သုံးဖွဲ့ ဦးဆောင်တိုက်ခိုက် သိမ်းပိုက်နိုင်ခဲ့ပြီး ယခုဗုံးကြဲတိုက်ခိုက်ခံရခြင်းသည် ပထမဆုံးအကြိမ်ဖြစ်သည်ဟု သိရသည်။
TNLA ပူးပေါင်းတပ်ဖွဲ့၏ ကျောက်မဲမြို့သိမ်း တိုက်ပွဲနှစ်လနီးပါးအတွင်း လက်နက်ကြီး၊ လက်နက်ငယ်နှင့် စစ်ကောင်စီတပ်၏ လေကြောင်းဗုံးကြဲ တိုက်ခိုက်မှုကြောင့် သျှမ်းသံတော်ဆင့် လက်လှမ်းမီသလောက် ကောက်ယူထားသည့် စာရင်းအရ အရပ်သားသေဆုံးမှု (၈၀) ဦးထက်မနည်း ရှိခဲ့ပြီး ပြည်သူနေအိမ် (၃၀၀) ကျော် ပျက်စီးဆုံးရှုံးခဲ့ကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments