သျှမ်းပြည်မြောက်ပိုင်း၊ နောင်ချိုမြို့တွင် စစ်တပ်နှင့် တပ်အာင်းအမျိုးသား လွတ်မြောက်ရေး တပ်မတော် (TNLA)တို့ တိုက်ပွဲပြင်းထန်နေကြောင်း သတင်းနှင့်ပြန်ကြားရေးဌာန PSLF/TNLA မှ ထုတ်ပြန်ထားသည်။
“၁၀၂၇ စစ်ဆင်ရေး” အတွင်း စစ်ကောင်စီက သျှမ်းမြောက်ဒေသတစ်ခုလုံးနီးပါး ဆုံးရှုံးလိုက်ရပြီး အရှုံးဖြင့် ရင်ဆိုင်ခဲ့ရသဖြင့် ယခုပွင့်လင်းရာသီ ရောက်ချိန်တွင် သျှမ်းမြောက်ကို စတင်ထိုးစစ်ဆင် တိုက်ခိုက်နေသည်။
နောင်ချိုမြို့ တောင်ခမ်းရွာရှိ ဘုန်းကြီးကျောင်းနှင့် စစ်ကောင်စီ၏ အမြောက်တပ်စခန်းဖြစ်သည့် (၃၅၄) တပ်စခန်း နေရာတွင် ယမန်နေ့ နိုင်ဝင်ဘာလ (၁၃)ရက်တွင် စစ်တပ်နှင့် TNLAတို့အကြား တိုက်ပွဲပြင်းထန်စွာ ဖြစ်ပွားခဲ့ကြောင်း အဆိုပါ ထုတ်ပြန်ချက်မှ သိရသည်။
“အခုလက်ရှိတောင်ခမ်း၊ အုမ္မတီးဖက်တော့ တော်တော် တိုက်ပွဲ ပြင်းထန်တယ်။ ဘယ်သူမှလဲ မသွားရဲကြဘူး။ ပေးမသွားဘူးလေ။ သူတို့ဂိတ်တွေ ချထားတာ။ စစ်တပ်ဖက်ကလည်း ဒရုန်းတွေနဲ့ လာလာစောင့်ကြည့်နေတယ်။ လူတွေမြင်ရင်တော့ ပစ်တယ်။ မမြင်ရင်တော့မပစ်ဘူး။” ဟု နောင်ချိုစစ်ရှောင်အမျိုးသားတစ်ဉီးက သျှမ်းသံတော်ဆင့်ကို ပြောသည်။
နောင်ချိုစစ်ရှောင်အများစုမှာ နေထိုင်ရေးနှင့် စားသောက်ရေးအတွက် ခက်ခဲပြီး နေ့စားလိုက်ပြီး စားဝတ်နေရေးအတွက် ဖြေရှင်းနေရကြောင်း ၎င်းစစ်ရှောင်တစ်ဦးက ထပ်လောင်းပြောသည်။
ထို့အပြင် စပါးနှင့် ပြောင်း ရိတ်သိမ်းချိန်ဖြစ်သော်လည်း တိုက်ပွဲပြန်လည် ပြင်းထန်လာသောကြောင့် ရိတ်သိမ်းခွင့်မရကာ လေယာဉ်ပါ ထပ်မံတိမ်းရှောင် နေရကြောင်း အမျိုးသား တစ်ဦးက ပြောသည်။
“အခုက ပြောင်းရိတ်ချိန်၊စပါးရိတ်သိမ်းချိန်လေ။ သွားလဲ မရိတ်သိမ်းရဲတော့ဘူး။ လေယာဉ်ကလဲ ဗုံးတွေ လာလာကြဲတော့ ကြောက်နေရတယ်။ အရင်နဲ့မတူတော့ဘူး။ပိုခက်ခဲလာတယ်။” ဟု စစ်ရှောင် အမျိုးသားတစ်ဦးက ပြောသည်။
ထိုပြင် ယမန်နေ့ ( နိုဝင်ဘာ ၁၃)ရက်တွင်လည်း တိုက်ပွဲဖြစ်ပွားလျှက်ရှိသော နောင်ချိုမြို့ မကျီးရေရွာတွင် စစ်ကောင်စီမှ ဂျက်ဖိုက်တာဖြင့် ဗုံးကြဲချ တိုက်ခိုက်ခဲ့ပြီး ထိခိုက်မှုမရှိကြောင်း သိရသည်။
နိုဝင်ဘာ ၁၂ရက် မွန်းလွှဲပိုင်းတွင်လည်း စစ်ကောင်စီသည် နောင်ချိုမြို့လယ်ရှိ လန်းဆန်းလက်ဖက်ရည်ဆိုင်ကို စစ်ကောင်စီ လေကြောင်းက ဗုံးကြဲတိုက်ခိုက်ရာ အရပ်သားသေဆုံးမှု ၁၁ဉီးရှိပြီး ထိခိုက်ဒဏ်ရာရရှိသူများပြားကြောင်း သိရသည်။
” ဒီရက်ပိုင်းလည်း လေကြောင်းပစ်ခတ်မှုကပိုများလာတော့ တိုက်ပွဲတွေပိုပြင်းလာမယ်ထင်တယ်။ လမ်းကြောလည်းပိတ် ရိက္ခာလည်းပျက်ဖြစ်တော့မယ်။ တိုက်ပွဲတွေလည်း မြန်မြန်ပြီးချင်ပြီ” ဟု နောင်ချို ဒေသခံ အမျိုးသမီးတစ်ဉီးက ထပ်လောင်းပြောသည်။
သျှမ်းပြည်တောင်ပိုင်း၊ရပ်စောက်မြို့နယ် ကျောက်ဂူမှ နောင်ချိုမြို့နယ် အတွင်းသို့ စစ်အင်အားဖြည့်တင်းရန် ကြို့ပမ်းနေသည့် စစ်ကောင်စီတပ်မှ ထိုးစစ်ဆင်လာ၍ နှစ်ဖက်ထိတွေ့ တိုက်ပွဲဖြစ်ပွားခဲ့ကြောင်း သတင်းနှင့်ပြန်ကြားရေးဌာန PSLF/TNLA မှ ထုတ်ပြန်ထားသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments