တရုတ်-မြန်မာနယ်စပ် မူဆယ်မြို့နှင့် နမ့်ခမ်းမြို့တွင် တရုတ်အာဏာပိုင်မှ နယ်စပ် ကို ပိတ်ပင်လိုက်ပြီးနောက် ဝမ်းရေးအတွက် ရှာဖွေလုပ်ကိုင်နေသည့် ပြည်သူများသည် စတင်အခက်ကြုံတွေ့နေရသည်ဟု စုံစမ်းသိရသည်။

စစ်အာဏာမသိမ်းခင် ကိုဗစ်-၁၉ ကာလမှစတင်ပြီး ကုန်စျေးနှုန်းများ တရိပ်ရိပ်တက်လာရာ “၁၀၂၇ စစ်ဆင်ရေး” နောက်ပိုင်းမှာ သျှမ်းပြည် တရုတ်-မြန်မာနယ်စပ်တွင်နေထိုင်သည့်သူများသည် စားဝတ်နေရေး ပိုခက်ခဲလာသည်။

ထို့အပြင် တရုတ်အာဏာပိုင်မှ နယ်စပ်ဂိတ်တွင် တရားမဝင် သွင်းကုန်၊ ထွက်ကုန်များကို တင်းကြပ်လိုက်ပြီး၊ တရုတ်ပြည်ဘက်မှ ကုန်များကို မြန်မာပြည်အတွင်းသို့ တရားမဝင် တင်သွင်းရန် မရတော့သဖြင့် ပြည်သူများ ဝမ်းရေးအတွက် အခက်အခဲဖြစ်လာကြောင်း မူဆယ်ဒေသခံများထံ သိရသည်။

“ အခုက တရုတ်ပြည်ဘက်ကနေ ဘာမှ ထုတ်လို့မရဘူး။ မူဆယ်က တရုတ်ဘက်က ကုန်စိမ်းကို အားကိုးနေရတာ။ တပိုင်တနိုင်လုပ်တဲ့သူတွေလည်း ဘာမှထုတ်လို့မရတော့ဘူး” ဟု မူဆယ် ကုန်စိမ်းရောင်းနေသူ တစ်ဦးက သျှမ်းသံတော်ဆင့်ကိုပြောသည်။

လက်ရှိတွင် တရုတ်အာဏာပိုင်များ၏ နယ်စပ်ဂိတ်ပိတ်လိုက်သည့်အတွက် ကုန်ဈေးနှုန်း အဆမတန်ကြီးမြင့်မှု၊ ဝင်ငွေရှားပါးမှုနှင့် အလုပ်အကိုင် ရှားပါးမှုကြောင့် စားဝတ်နေရေး ပိုကြပ်တည်းလာနိုင်ကြောင်း မူဆယ် ဒေသခံ အမျိုးသားတစ်ဦးက ပြောသည်။

မူဆယ်မြို့နယ်သည့် တရုတ်နယ်စပ်မြို့ဖြစ်ပြီး တပိုင်တနိုင် ကုန်ကူးသန်းရောင်းဝယ်မှု အားကိုးရသည့် ဒေသဖြစ်ပြီး တရုတ်ပြည်ဘက်မှ ကုန်စည်များကို အားကိုးနေရသည့်မြို့ဖြစ်သော်လည်း တရုတ်အာဏာပိုင်များက (နိုဝင်ဘာလ ၁၁ ရက်)နေ့တွင် စတင်ပိတ်ဆိုင်းခဲ့သည်။

“ ဒီကလူတွေက တရုတ်ပြည်ကနေ တပိုင်တနိုင် ကုန်တွေဝယ်ပြီး ဒီဘက်ခြမ်းကို ပြန်ရောင်းတာ။ အခုက ဘာဆို ဘာမှ တင်သွင်းလို့မရတော့ အလုပ်လက်မဲ့တွေဖြစ်ကုန်ပြီလေ။ ဒါကလည်း စစ်ခေါင်းဆောင် တရုတ်ပြည်သွားပြီး နောက်ဖြစ်လာတဲ့ အကျိုးဆက်ပဲ” ဟု ၎င်း ကဆိုသည်။

အလားတူ တပိုင်တနိုင် စိုက်ပျိုးပြီး တရုတ်ပြည်ဘက်သို့ ရောင်းချနေသည့်သူများနှင့် မီးသွေးရောင်းဝယ်သည့် နမ့်ခမ်းဒေသခံများလည်း အခက်အခဲကြုံတွေ့နေရသည်။

“ အခုလို ဂိတ်တွေပိတ်တော့ ပိုဆိုးလာတာပေါ့။ ကုန်ဈေးနှုန်းက နေ့တိုင်းလိုလိုတက်လာတယ်။ ကျနော်တို့ စိုက်ပျိုးရေးလုပ်တဲ့သူကလည်း တရုတ်ဘက်ကိုတင်သွင်းမရ ဘာလုပ်လို့ ဘာကိုင်ရမှန်းမသိဘူး” ဟု အသက် ၄၀ အရွယ် နမ့်ခမ်းဒေသခံ အမျိုးသားက ဆိုသည်။

နမ့်ခမ်းမြို့မှ ထွက်သည့် ကောက်ပဲသီနှံနှင့် မီးသွေးများကို နောင်တောင်း နယ်စပ်ဂိတ်မှတဆင့် တရုတ်နိုင်ငံသို့ တင်ပို့ခဲ့ရာ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) မှ နမ့်ခမ်းမြို့ကို ထိန်းချုပ်ပြီးနောက် တရုတ်ဘက်မှ နယ်စပ်ဂိတ်ကို ပိတ်ဆိုင်းခဲ့သည်။

တရုတ်-မြန်မာနယ်စပ် ဂိတ်များ စစ်ကောင်စီ အပြည့်အဝ စီမံခန့်ခွဲခွင့်ရရေး ဆောင်ရွက်မည်ဟု တရုတ်ဝန်ကြီးချုပ် Mr. Li Qiang က စစ်ခေါင်းဆောင် မင်းအောင်လှိုင် နှင့် ပြီးခဲ့သည့် (နိုဝင်ဘာ ၆ ရက်) က တွေ့ဆုံစဥ် ပြောဆိုလိုက်သည်။

ထိုနည်းတူ လက်ရှိတွင် သျှမ်းတောင်မှ မြောက်ပိုင်းသွားသည့် ရပ်စောက်-ကျောက်ဂူ လမ်းပိုင်း၊ ရပ်စောက်မြို့ အထွက်ရှိ စစ်ကောင်စီ စစ်ဆေးရေးဂိတ်က ယမန်နေ့ (နိုဝင်ဘာ ၁၂)ရက် နံနက် အစောပိုင်းတွင် ပိတ်ဆို့လိုက်သဖြင့် မြောက်ပိုင်းသွားမည့် ကားများ ပြန်လှည့်လာရကြောင်း သိရသည်။

“ ကျနော်အထင် သျှမ်းမြောက် တော်လှန်ရေး အင်အားစုတွေ သိမ်းပိုက်တဲ့နေရာကို စစ်ရေး ပိုလှုပ်ရှားမယ်။ ရိက္ခာဖြတ်တောက်မယ်။ လူထုကတော့ ပိုကြပ်တည်မယ်။ ကုန်စည်စီးဆင်းမှုလုံးဝမရအောင် စစ်တပ်ကလုပ်မှာပဲ” ဟု မူဆယ်မြို့ ဒေသခံ အမျိုးသားက ထပ်လောင်းပြောသည်။

အာဏာသိမ်း စစ်ခေါင်းဆောင်နှင့် တရုတ်ခရီးစဉ်အပြန် သျှမ်းမြောက် တော်လှန်ရေး အင်အားစု သိမ်းပိုက်ထားသော နယ်မြေများကို နေ့စဉ်ရက်ဆက် လေကြောင်းဗုံးကြဲမှု စတင်လာပြီး အရပ်သားသေဆုံးမှု များလာကြောင်းသိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။​