သျှမ်း-ကယားနယ်စပ် ဖယ်ခုံမြို့နယ် ကာလကျေးရွာ ကို စစ်ကောင်စီတပ်တပ်မှ တိုက်ပွဲ ဖြစ်ပွားခြင်းမရှိဘဲ လေယာဉ်ဖြင့် ဗုံးကြဲတိုက်ခိုက်မှုကြောင့် ဒေသခံများ ကြောက်လန့်နေကြရကြောင်း စုံစမ်းသိရသည်။
ပြီးခဲ့သည့် နိုဝင်ဘာလ (၈) ရက် ညပိုင်းတွင် စစ်ကောင်စီတပ်မှ ကာလရွာကို လေယာဉ်ဗုံးကြဲမှုကြောင့် စစ်ရှောင်နှစ်ဦးသေဆုံးခဲ့ပြီး တစ်ဦးမှာ ဒဏ်ရာ အပြင်းထန်ရရှိခဲ့ကာ နေအိမ် ၆ လုံးခန့် ပျက်စီးသွားခဲ့သည်ဟု သတင်းရင်းမြစ်ထံမှ သိရသည်။
ထိုသို့ လေယာဉ်ဖြင့် ဗုံးကြဲပြီးနောက် ဒေသခံများသည် စိတ်ပိုင်းဆိုင်ရာ ထိခိုက်မှုများရှိနေပြီး ညဘက်တွင် ကောင်းမွန်စွာ အိပ်မရဲကြဘဲ ကြောက်လန့်နေကြရသည်ဟု ဒေသခံများက ပြောသည်။
“တိုက်ပွဲဖြစ်ပွားတဲ့ ရွာလည်းမဟုတ်ဘူး။ ဘာမှမဆိုင်ဘဲ ဗုံးလာကြဲသွားတယ်။ စစ်ရှောင်နှစ်ဦးသေတယ်။ တစ်ဦးတော့ ဒဏ်ရာပြင်းတယ်။ အခုဆို ညဘက်တောင် ကောင်းကောင်း မအိပ်ရဲတော့ဘူး။ စိတ်တော့ တော်တော် ထိခိုက်သွားတယ်။” ဟု ဖယ်ခုံ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ကာလရွာသည် လက်ရှိ စစ်ကောင်စီ၊ ပအိုဝ်းပြည်သူ့စစ် (PNO) နှင့် တော်လှန်ရေးအင်အားစု PDF တို့ တိုက်ပွဲဖြစ်ပွားနေသည့် ညောင်ရွှေမြို့နယ် လွယ်လုံ ကျေးရွာနှင့် အနီးတဝိုက်တွင် ရှိကြောင်း ၎င်းအမျိုးသားက ပြောသည်။
စစ်ကောင်စီတပ်မှ ပြည်သူများကို ဗုံးကြဲတိုက်ခိုက်ခြင်းသည် မဖြစ်သင့်ကြောင်းနှင့် လူမဆန်သည့် လုပ်ရပ်တစ်ခုသာ ဖြစ်ကြောင်း စစ်ရှာင်အမျိုးသားတစ်ဦးက ပြောသည်။
“စိတ်တောင်မကောင်းဘူး။ ဘာမှ မဆိုင်ပဲဗုံးကြဲခံရတော့။ အနီးနားက စစ်ရှောင်တွေက ကာလရွာမှာ စစ်ရှောင်နေကြတာလေ။ဒီလို ပြည်သူတွေ နေတဲ့နေရာကို ဗုံးလိုက်ကြဲတာက လူမဆန်တဲ့ လုပ်ရပ်တစ်ခုသာ ဖြစ်တယ်။” ဟု ဖယ်ခုံ စစ်ရှောင်အမျိုးသား တစ်ဦးက ပြောသည်။
လက်ရှိ ကာလကျေးရွာတွင် လေကြောင်း ဗုံးကြဲတိုက်ခိုက်မှု ရှိနေသော်လည်း ဒေသခံများ စစ်ဘေးမရှောင်ကြပဲ ကျေးရွာအတွင်း သတိကြီးစွာ နေထိုင်နေကြရသည်။
ဖယ်ခုံမြို့တွင် လူမရှိတော့သည့် ပြည်သူနေအိမ်များကို စစ်ကောင်စီတပ်မှ ပြီးခဲ့သည့် အောက်တိုဘာလ တတိယပတ်တွင် မီးရှို့ဖျက်ဆီးခဲ့သောကြောင့် နန်းဟူးရပ်ကွက် ဆေးရုံကုန်းအနီး နေအိမ်အများပြား မီးလောင်ပျက်စီးသွားခဲ့သည်။
အလုပ်သင် သတင်းထောက် နန်းလရောင် ရေးသားသည်။
