သျှမ်းပြည် နောင်ချိုမြို့နယ် တောင်ခမ်းဒေသတွင် ယမန်နေ့ (နိုဝင်ဘာလ ၇ ရက်) နံနက်ပိုင်းမှစ၍ တိုက်ပွဲ ပြင်းပြင်းထန်ထန် ဖြစ်ပွားနေကြောင်း စစ်ရေးသတင်းရင်းမြစ်က အတည်ပြု ပြောသည်။
တောင်ခမ်းရွာ မြောက်ဘက်ရှိ အမြောက်စစ်ဆင်ရေး ကွက်ကဲမှု ဌာနချုပ် (မစခ-၉၀၂) အပါအဝင် တပ်စခန်းများကို TNLA ပူးပေါင်းတပ်က ထပ်မံ ထိုးစစ်ဆင် တိုက်ခိုက်နေသဖြင့် တိုက်ပွဲ ပြင်းထန်နေကြောင်း စစ်ရေး သတင်းရင်းမြစ်က ပြောသည်။
“မနေ့က မိုးရွာနေပေမဲ့ ထိုးစစ်ဆင်နေတယ်။ ဒီနေ့မနက်ပိုင်းအထိ တိုက်ပွဲပြင်းတယ်။ အဆုံးအဖြတ် တိုက်ပွဲလို့ ပြောလို့ရတယ်” ဟု ၄င်းကဆိုသည်။
တိုက်ပွဲများ ပြင်းထန်နေသဖြင့် ယမန်နေ့က ပြင်ဦးလွင် စစ်တပ်က တာဝေးပစ် အမြောက်များ ပစ်ခတ်၍ ပစ်ကူပေးခဲ့ပြီး လေကြောင်း တိုက်ခိုက်မှုများလည်း ရှိခဲ့သည်ဟု ဆိုသည်။
လက်ရှိ တောင်ခမ်း တိုက်ပွဲ အတွင်း နှစ်ဖက်တပ် ထိခိုက် ကျဆုံးမှုနှင့် တိုက်ပွဲ အခြေအနေကို သျှမ်းသံတော်ဆင့် အနေဖြင့် ထပ်မံ မေးမြန်း စုံစမ်းနေဆဲ ဖြစ်သည်။
ယမန်နေ့ကစ၍ တောင်ခမ်းဒေသ တိုက်ပွဲများနှင့် ပြင်းထန်နေသည့် နည်းတူ နောင်ချိုနှင့် ပြင်ဦးလွင်ကြား ဘန့်ဘွေးနှင့် ဂန့်ဂေါ် ဒေသတွင်လည်း စစ်ကောင်စီနှင့် TNLA တို့ တိုက်ပွဲများ ပြင်းထန်နေရာ ယနေ့ နံနက်ပိုင်း အထိ ပြင်းထန်ခဲ့ကြောင်း သိရသည်။
တောင်ခမ်းဒေသတွင် စစ်ကောင်စီ၏ အမြောက်စစ်ဆင်ရေး ကွက်ကဲမှု ဌာနချုပ် (မစခ-၉၀၂)၊ အမတ (၃၅၄)၊ အမတ (၂၀၆)၊ အမတ (၄၀၆) စသည့် အမြောက်တပ် ၄ ခု အထိုင်ချ တပ်စွဲထားသည်။
ပြီးခဲ့သည့် ဇူလိုင်လ ၁၀ ရက်နေ့က နောင်ချိုမြို့ တောင်ဘက်ရှိ အမှတ် (၆၀၆) ဒုံးတပ်ကို TNLA ပူးပေါင်းတပ်များ တိုက်ခိုက် သိမ်းပိုက်ခဲ့ရာ ယင်းတပ်မှ ဆုတ်ခွာသွားသည့် စစ်ကောင်စီတပ်များ တောင်ခမ်းတွင် သွားရောက် ပူးပေါင်း ခုခံနေရာ တိုက်ပွဲများ ဖြစ်ပွားနေသည်မှာ လနှင့်ချီ ကြာမြင့်နေပြီ ဖြစ်သည်။
တောင်ခမ်းရွာအနီးရှိ နောင်လိတ်ရွာတွင် တပ်မ (၉၉) လက်အောက်ခံ ခမရ (၃၀၂)၊ ရမခ လက်အောက်ခံ ခမရ (၃၂၅)၊ လပခ လက်အောက်ခံ ခမရ (၃၀၆) တပ်ရင်းတို့ တပ်စွဲ ခုခံနေပြီး ကလော အခြေစိုက် တပ်မ (၅၅) ထပ်မံ အားဖြည့် ခုခံနေခြင်း ဖြစ်သည်။
Leave a Comments