သျှမ်းပြည်တောင်ပိုင်း၊ ပင်လောင်းမြို့နယ်တွင် ပအိုဝ်းပြည်သူ့စစ် (PNO)က ပအိုဝ်းလူမျိုးနှင့် ကရင်နီလူမျိုးကြား ဝါဒဖြန့်မှုများ လုပ်ဆောင်နေကြောင်းသိရသည်။
ပင်လောင်း-ဖယ်ခုံနယ်စပ်ဖြစ်သည့် နောင်ဝိုး၊ လွယ်ကျိုင်းနှင့် ဗန်းမောက်ဖက်တွင် စစ်ကောင်စီ၊ PNO နှင့် တော်လှန်ရေးအင်အားစု PDFတို့ တိုက်ပွဲပြင်းထန်စွာ ဖြစ်ပွားခဲ့ကြပြီးနောက်ပိုင်း စစ်ကောင်စီနှင့် PNOဘက်က အကျဆုံးများခဲ့သည်။
ထို့နောက် PNO က ကရင်နီလူမျိုးနှင့် ပအိုဝ်းလူမျိုးကြား လူမျိုးရေးပဋိပက္ခ ဖြစ်စေမည့် စကားလုံးများဖြင့် ပအိုဝ်းပြည်သူကြား ဝါဒဖြန့်မှုများလုပ်ဆောင်ခဲ့ကြောင်း သိရသည်။
“ PNO က ကရင်နီတွေက ပအိုဝ်းတွေပိုင်ဆိုင်သမျှ လုယူဖို့လာတာ။ သူတို့က ပအိုဝ်းပြည်သူတွေရဲ့ နယ်မြေကိုပါ လုယူဖို့ ကြိုးစားနေတာ။ စသဖြင့်ပေါ့ ကရင်နီလူမျိုးနဲ့ ပြဿနာဖြစ်အောင် ပြောဆိုတာပေါ့။ ပြီးတော့ ပအိုဝ်းပြည်သူတွေကို PNO ထဲဝင်ရင် ဂုဏ်ရှိတယ် ဘာညာပြောပြီး စစ်မှုထမ်းခေါ်တော့တာပဲ။” ဟု ပင်လောင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ဝါဒဖြန့်မှုများကြောင့် ပအိုဝ်းလူမျိုးအချို့သည် အယုံလွယ်ပြီး လူမျိုုးစု နှစ်ခုကြား ပြဿနာဖြစ်လာမှာ စိုးရိမ်မိကြောင်းနှင့် ပင်လောင်းမှ ကရင်နီစစ်ရှောင်များကို ထိခိုက်မည်ကို စိုးရိမ်ကြောင်း ၎င်းအမျိုးသားက သျှမ်းသံတော်ဆင့်ကို ထပ်လောင်းပြောသည်။
ထို့အပြင် ပင်လောင်းစစ်ရှောင်များသည် နိုင်ငံရေးအခြေနေကြောင့် စစ်ရှောင်နေရခြင်းဖြစ်ပြီး ပအိုဝ်းပြည်သူများ၏ ပိုင်ဆိုင်မှုကို လာရောက် လုယူခြင်းမဟုတ်ကြောင်း စစ်ရှောင်တစ်ဦးက ပြောသည်။
“ဒါက လူမျိုးရေး ပဋိပက္ခ ဖြစ်အောင်လုပ်တယ်လို့မြင်တယ်။ လူမျိုးရေး ပြဿနာဖန်တီးပြီး တိုက်ပွဲ ဖော်ဆောင်နေတာ။ ဒါက စစ်ကောင်စီက ခေတ်အဆက်ဆက် အသုံးပြုလာတဲ့နည်းပဲ။ စစ်ရှောင်တွေ ဆိုတာကလည်း လုံခြုံတဲ့ဘက်မှာ နေကြမှာပဲ။ ဘာပစ္စည်း မှ ယူဖို့လာတာမဟုတ်ဘူး။ ဒီလို သွေးခွဲမှုကြား မပါသွားဖို့တော့လိုတယ်။” ဟု ကရင်နီစစ်ရှောင်တစ်ဦးက ပြောသည်။
တိုက်ပွဲဖြစ်ပွားသည့် ဒေသအတွင်း ပြည်သူပိုင်ပစ္စည်းများကို လက်နက်ကိုင် ယူဆောင်ခြင်းသည် စစ်ပွဲ၏ သဘောသဘာဝတစ်ခုသာဖြစ်ကြောင်း နားလည်မှုရှိရန်လိုအပ်သည်ဟု အဆိုပါ စစ်ရှောင်က ဆိုသည်။
ပြီးခဲ့သည့် နိုဝင်ဘာလ( ၂ ) ရက်တွင် ပင်လောင်း-ဖယ်ခုံနယ်စပ်တိုက်ပွဲတွင် PNA ဗိုလ်ကြီး တစ်ဦးအပါဝင် (၅ )ဦးသေဆုံးသွားကြောင်း စုံစမ်းသိရှိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments