မြန်မာ – တရုတ်နယ်စပ် မူဆယ်မြို့ အနီးတွင် စစ်ကောင်စီတပ်နှင့် တိုင်းရင်းသားလက်နက်ကိုင်တပ် ထိတွေ့ပစ်ခတ်မှု ဖြစ်ပွားခဲ့ကြောင်း စုံစမ်းသိရသည်။

ယနေ့ (နိုဝင်ဘာလ ၁ ရက်) နံနက် ၇ နာရီဝန်းကျင်တွင် မူဆယ်မြို့၊ မန့်မိုင်ကျေးရွာအနီးတွင် စစ်ကောင်စီတပ်နှင့် တိုင်းရင်းသားလက်နက်ကိုင်တပ်ဖွဲ့တို့ ထိတွေ့တိုက်ပွဲ ဖြစ်ပွားခဲ့ကြောင်း စစ်ရေးနီးစပ်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မန့်မိုင်ဘက်မှာ ဒီမနက်ကတော့ သေနတ်သံတွေ ဗုံးသံတွေတော့ ကြားနေရတယ်။ ဘယ်အဖွဲ့နဲ့

ဘယ်အဖွဲ့လည်း ဆိုတာကိုတော့ အတည်မပြုနိုင်သေးဘူး။ ဒါပေမယ့် KIA နဲ့ စစ်ကောင်စီတပ်နဲ့ ဆိုတာလည်း ကြားနေရတယ်။ သတိတော့ ထားနေရတယ်၊ အခြေအနေက ဘယ်လိုလာမလဲဆိုတာ ကျနော်လည်း မပြောတတ်သေးဘူး” ဟု စစ်ရေးနှင့် နီးစပ်သူ အမျိုးသားတစ်ဦးက ပြောသည်။

ထိုပစ်ခတ်မှုမှာ စစ်ကောင်စီတပ်နှင့် ညီနောင်မဟာမိတ် တို့အကြား ပစ်ခတ်မှုဖြစ်ပွားကြောင်း ဒေသခံများက ပြောဆိုပြီး စိုးရိမ်ထိတ်လန့်မှု ရှိနေသော်လည်း သျှမ်းသံတော်ဆင့်မှ အတည်ပြုနိုင်ရန် ဆက်လက်စုံစမ်းနေသည်။

အလားတူ အောက်တိုဘာလ (၁၅) ရက်ကလည်း မူဆယ်မြို့နှင့် ၃ မိုင်ခန့်သာ ကွာဝေးသည့် နမ့်ခုမ်ရွာအနီးသို့ ကိုးကန့်တပ်ဖွဲ့ MNDAA မှ ချဉ်းကပ်လာစဉ် စစ်ကောင်စီတပ်မှ လက်နက်ကြီးဖြင့် စတင်ပစ်ခတ်ခဲ့ရာ နှစ်ဘက်ထိတွေ့တိုက်ပွဲ နာရီဝက်ခန့် ဖြစ်ပွားခဲ့ပြီး ပြည်သူနေအိမ် (၁) လုံး မီးလောင် ပျက်စီးခဲ့ကြောင်း မူဆယ်ဒေသခံများက ပြောသည်။

မူဆယ်မြို့ ပတ်ပတ်လည်တွင် သျှမ်းတပ် SSPP/SSA၊ ကချင်လွတ်လပ်ရေးတပ် KIA၊ တအာင်း(ပလောင်)တပ်ဖွဲ့ TNLA နှင့် ကိုးကန့်တပ်ဖွဲ့ MNDAA တို့ ဝိုင်းရံပိတ်ဆို့ထားသော်လည်း စစ်ကောင်စီတပ်အပြင် ၎င်းလက်အောက်ခံ ပြည်သူ့စစ်တပ်ဖွဲ့များနှင့် ယခင်က တိုက်ပွဲဖြစ်ပွားခြင်း မရှိခဲ့ကြောင်း ဒေသခံများက ပြောသည်။

သျှမ်းမြောက်ရှိ မြို့အားလုံး နီးပါးကို ညီနောင်မဟာမိတ်တပ်များက ထိန်းချုပ်ထားသော်လည်း ‘ဝ’တပ်ဖွဲ့ UWSA ဝင်ရောက်နေရာယူထားသည့် တန့်ယန်းမြို့၊ သျှမ်းတပ် SSPP/SSA လုံခြုံရေးယူထားသည့် မိုင်းရယ်မြို့တို့နှင့် မတူဘဲ မြန်မာ-တရုတ် နယ်စပ်ကုန်သွယ်ရေး ပြုလုပ်ရာ မူဆယ်မြို့ကို မည်သည့်တိုင်းရင်းသား လက်နက်ကိုင်တပ်ဖွဲ့မှ ယခုထိတိုင် တိုက်ခိုက်ထိန်းချုပ်ထားနိုင်ခြင်း မရှိသေးပေ