သျှမ်းပြည်တောင်ပိုင်း ပင်လောင်းမြို့ တောင်ဘက်ရှိ ကျေးရွာများတွင် သူခိုးများ သောင်းကျန်းမှုကြောင့် ဒေသထွက် သီးနှံများ ပျက်စီးပျောက်ဆုံးသွားကြောင်း ဒေသခံများ ပြောပြချက်အရ သိရသည်။
ပြီးခဲ့သည့် စက်တင်ဘာလ နောက်ဆုံးပတ်မှ စပြီး ပင်လောင်းမြို့ တောင်ဘက်နှင့် နောင်တရားမြို့အနီး ကျေးရွာများတွင် သူခိုးများ သောင်းကျန်းမှုကြောင့် ဒေသခံများ၏ သီးနှံများ ပျောက်ဆုံးမှုရှိလာပြီး စိုက်ခင်းရှိ သီးနှံများကို ညအိပ်စောင့်ဆိုင်းကာ စောင့်ကြပ်ကြည့်ရှုနေရသည် ဟု သိရသည်။
စိုက်ခင်းရှိ သီးနှံများကို ညအချိန်တွင် သူခိုးများက အုပ်စုဖွဲ့ ခိုးယူကြပြီး ဒေသတွင်း သီးနှံဖြစ်သည့် ငရုပ်သီးနှင့် ခရမ်းချဉ်သီးများကို ပို၍ ခိုးယူသောကြောင့် အပင်များ ထိခိုက်ပျက်စီးပြီး တောင်သူများအတွက် အဆင်မပြေမှုများ ကြုံတွေ့နေရကြောင်း ဒေသခံများက ပြောသည်။
“သူခိုးက အုပ်စုလိုက် ခိုးတာ။ ပြီးတော့ သူတို့က ငရုပ်ဆိုလဲ အပင်ကို ဓားနဲ့ ဖြတ်ယူတာ၊ ခရမ်းချဉ်သီးဆိုလဲ အကိုင်းပါ ဖြတ်ယူကြတာ။ ခုတလော အခြေအနေ တော်တော်ဆိုးလာတယ်။ ခြံမှာ ညအိပ်စောင့် နေရတယ်” ဟု ပင်လောင်းဒေသခံ ခရမ်းချဉ်စိုက်ခင်းပိုင်ရှင် အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုအပြင် သူခိုးများက အုပ်စုလိုက် ခိုးယူမှုကြောင့် ခြံစောင့်များအတွက် အသက်အန္တရာယ်ကိုပါ ထိခိုက်လာမည်ကို စိုးရိမ်နေရကြောင်းနှင့် ရပ်ရွာသူကြီးများကလည်း ကူညီဖြေရှင်းပေးမှု မရှိဘဲ ကိုယ်ထူကိုယ်ထ ကာကွယ်ဖြေရှင်းနေရသည်ဟု အဆိုပါ အမျိုးသားက ထပ်လောင်း ပြောသည်။
စစ်ဘေးနှင့် သဘာဝဘေးဒဏ်ကြောင့် နိုင်ငံအခြေအနေ ယိုယွင်းပျက်ပြားလာသည်နှင့် အမျှ ကုန်ဈေးနှုန်း အဆမတန် မြှင့်တက်ပြီး အလုပ်အကိုင် ရှားပါးလာခြင်းကြောင့် ခိုးဆိုးလုယက်မှုများ ပေါများနေရခြင်း ဖြစ်သည်ဟု ဒေသခံ တစ်ဦးက ဆိုသည်။
“ခေတ်ကမကောင်းတော့ သူခိုးတွေ ပိုများလာတာပေါ့။ နောက်ပြီး ကုန်ဈေးနှုန်းကလည်း ကြီး တော့ ပြည်သူတွေ မတတ်နိုင်ကြတော့ဘူးလေ။ စစ်ဒဏ်နဲ့ သဘာဝဘေးဒဏ်ကိုပါ ခံရတော့ ဘယ်တောင့်ခံနိုင်ကြတော့မလဲ။ ဝမ်းရေးက ပိုအရေးကြီးနေတော့ သူခိုးတွေ များလာတာပေါ့။ ဆာလောင်မွတ်သိပ်မှုဒဏ်ကို ဘယ်ခံကြတော့မလဲ” ဟု ပင်လောင်း ဒေသခံ အမျိုးသမီး တစ်ဦးက ပြောသည်။
ပြီးခဲ့သည့် အောက်တိုဘာလ တတိယပတ်အတွင်း ပင်လောင်းမြို့ တောင်ဘက် လွယ်ဖြီးကျေးရွာနှင့် မိုင်းဖြတ်ကျေးရွာတို့တွင် စစ်ကောင်စီလက်အောက်ခံ ပအိုဝ်းပြည်သူ့စစ် (PNO) နှင့် တော်လှန်ရေးအင်အားတပ်ပေါင်းစု PDF တို့ ထိတွေ့တိုက်ပွဲ ပြင်းထန်ခဲ့ပြီး ဒေသခံများ ရာနှင့်ချီ စစ်ဘေးရှောင်နေရကြောင်း သိရသည်။
ပင်လောင်းမြို့ပေါ်တွင် ကရင်နီပြည်ဘက်မှ စစ်ဘေးရှောင်လာသူများနှင့် ဆီဆိုင်၊ ပင်လောင်းဘက်မှ စစ်ဘေးရှောင်များ ထောင်နှင့်ချီ စစ်ဘေးရှောင်နေကြရပြီး နေထိုင်စားသောက်ရေးအတွက် အကူအညီများစွာ လိုအပ်နေကြောင်း ဒေသခံများထံမှ သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments