သျှမ်းပြည်တောင်ပိုင်း တောင်ကြီးမြို့ပေါ် ရပ်ကွက်အချို့တွင် စစ်ကောင်စီမှ အရပ်သားများအား ပြည်သူ့လုံခြုံရေး အကြောင်းပြချက်ဖြင့် အလှည့်ကျ ကင်းစောင့်ရန် စေခိုင်းမှုများ ရှိနေကြောင်း စုံစမ်းသိရှိရသည်။
ဩဂုတ်လ ၁၆ ရက်နေ့တွင် စစ်ကောင်စီမှ ပြည်သူ့လုံခြုံရေးနှင့် အကြမ်းဖက်နှိမ်နင်းရေး ဗဟိုကြီးကြပ် ကွပ်ကဲမှုအဖွဲ့ကို ဖွဲ့စည်းခဲ့ပြီး ယခုအခါ တောင်ကြီးမြို့ပေါ် ရပ်ကွက်အချို့တွင်လည်း အရပ်သားများကိုပါ ရပ်ရွာလုံခြုံရေး အကြောင်းပြချက်ဖြင့် ကင်းလှည့်စောင့်ဆိုင်းရန် စေခိုင်းမှုများ ရှိနေကြောင်း မြို့ခံများက ပြောသည်။
“ရပ်ကွက်ရုံးကို စောင့်ခိုင်းတယ်၊ ရပ်ကွက်ထဲက လမ်းတွေကို ပတ်ခိုင်းတယ်။ ည ၇ နာရီကနေ မနက် ၅ နာရီထိ ပတ်ခိုင်းတယ်၊ ညတိုင်း ၁ ရက်ကို တစ်ယောက် ပြောင်းခိုင်းတယ်။ ရပ်ကွက်အုပ်ကြီး၊ ရာအိမ်မှူးတွေက ခေါ်စောင့်ခိုင်းတာ” ဟု မြို့ခံတစ်ဦးက သျှမ်းသံတော်ဆင့်သို့ ပြောသည်။
တောင်ကြီးမြို့ ဘုရားဖြူရပ်၊ ညောင်ဖြူစခန်းရပ်နှင့် စဝ်စံထွန်းရပ်ကွက်များတွင် အဓိက ကင်းစောင့်ခိုင်းပြီး ပအိုဝ်းပြည်သူ့စစ် (PNO) များလည်း ဝင်ထွက်မှု များပြားကြောင်း သိရသည်။
ထို့အပြင် အောက်တိုဘာလ (၂၇) ရက်မှ စတင်ပြီး ညအချိန် အပြင်ထွက်သည့် လူငယ်များကိုလည်း စစ်ကောင်စီတပ်မှ ဖမ်းဆီးစစ်ဆေးမှုများ ရှိခဲ့ကြောင်း ၎င်းက ဆက်ပြောသည်။
“၂၇ ရက်ညက ချမ်းမြ view point မှာ မိန်းကလေး ၂ ယောက် ပါသွားတယ်လို့ ကြားတယ်၊ စစ်ရင်းဆေးရင်း တခြားလူငယ် ၂၀ လောက် ပါသွားတယ်လို့လည်း မြင်လိုက်တဲ့သူတွေက ပြောတယ်၊ နောက်ဆက်တွဲတော့ မသိရသေးဘူး”ဟု ၎င်းမြို့ခံ အမျိုးသားက သျှမ်းသံတော်ဆင့်ကို ပြောသည်။
တောင်ကြီးမြို့ပေါ်တွင် အဆိုပါ လူငယ်များ ဖမ်းဆီးခံရခြင်း ကိစ္စနှင့် ပတ်သက်၍ အသေးစိတ် သိရှိနိုင်ရန် သျှမ်းသံတော်ဆင့်မှ ဆက်လက်စုံစမ်းနေဆဲဖြစ်သည်။
ထို့သို့ စစ်ဆေးတင်းကြပ်မှု များပြားလာခြင်းကြောင့်လည်း တောင်ကြီးမြို့ပေါ်တွင် လူငယ်များ ညဘက် အပြင်ထွက်သွားလာခြင်း နည်းပါးသွားကြောင်း ဆိုသည်။
“ညဖက်ထွက်ရင် လူဆွဲတာတွေရှိတယ်၊ လဒကုန်းနားဆို အရမ်းစစ်လာပြီ။ ခုဆို ညဘက်ဆို ဆိုင်ကယ်သံ အရင်လို သိပ်မကြားရတော့ဘူး” ဟု တောင်ကြီးမြို့ ရဲတပ်ဖွဲ့နှင့် နီးစပ်သူတစ်ဦးက ပြောသည်။
လက်ရှိတွင် စစ်ကောင်စီမှ ဖိအားပေးကျင်းပခိုင်းသည့် တန်ဆောင်တိုင်ပွဲတော်ရက်မှာလည်း နီးကပ်လာပြီး တောင်ကြီးမြို့ပေါ် ဟိုတယ်များတွင်လည်း အခန်းများအားလုံး ပြည့်နေပြီး အခန်းခများလည်း ဈေးမြင့်တက်နေကြောင်း သိရသည်။
ထို့အပြင် တောင်ကြီးမြို့နယ်အတွင်း လိုင်စင်မဲ့ကားများအား ဖမ်းဆီးစစ်ဆေးမှုများ တင်းကျပ်နေပြီး တောင်ကြီးမြို့သို့ တိမ်းရှောင်လာသည့် စစ်ဘေးရှောင်ပြည်သူများ၏ ကားများမှာ အများဆုံး ဖမ်းဆီးခံနေရကြောင်း စစ်ဘေးရှောင်များက ပြောဆိုသည်။
အလုပ်သင် သတင်းထောက် ယူဂျင်းရေးသားသည်။
Leave a Comments