သျှမ်းပြည် ပင်လောင်းမြို့နယ်တွင် ပအိုဝ်းပြည်သူ့စစ် PNO က ကျေးရွာနှင့် စစ်ဆေးရေးဂိတ်များတွင် သေနက်ပစ်ခတ် ခြိမ်းခြောက်၍ ငွေညှစ်တောင်းခံပြီး ရိုက်နှက်ခြင်းများ ပြုလုပ်ခဲ့ကြောင်း စုံစမ်းသိရသည်။
အောက်တိုဘာလ နောက်ဆုံးပတ်အတွင်း ပင်လောင်းမြို့နယ်တောင်ပိုင်း လုံကန်ကျေးရွာတွင် စစ်ကောင်စီလက်အောက်ခံ ပအိုဝ်းပြည်သူ့စစ် PNO က လုံကန်ကျေးရွာ စစ်ဆေးရေးဂိတ်တွင် ဒေသခံအမျိုးသားနှစ်ဦးကို သေနက်ပစ်ခတ် ခြိမ်းခြောက်၍ ငွေညှစ်တောင်းခံပြီး ရိုက်နှက်ခြင်းများ ပြုလုပ်ခဲ့ကြောင်း ပင်လောင်းမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ပြည်သူ့စစ်တွေက လုံကန်ဈေးကို သွားလာတဲ့ ရွာဒေသခံနှစ်ယောက်ကို သေနတ်နဲ့ ခြိမ်းခြောက်တယ်။ ပြီးတော့ သူတို့ကို ပိုက်ဆံတောင်းတာ သားအဖ နှစ်ယောက်ကို။ သိန်းနဲ့ချီ တောင်းတော့ သူတို့က မပေးတော့ သေနတ်နဲ့ပစ်တာ ဆိုင်ကယ်ဘီးထိပြီး သူတို့လူ ပြန်ထိတာ၊ အဲ့တာကို စိတ်တိုပြီး စစ်သားတွေက သူတို့ နှစ်ယောက်ကို ဖမ်းပြီး ရိုက်တာ”ဟု ပင်လောင်းမြို့ ဖြစ်စဉ်သိရှိသူ ဒေသခံအမျိုးသားတစ်ဦးက ပြောသည်။
ယခုခြိမ်းခြောက်ပစ်ခတ်မှု ဖြစ်ပွားခဲ့သည့် စစ်ကောင်စီ လက်အောက်ခံ PNO ပအိုဝ်းပြည်သူ့စစ် စစ်ဆေးရေးဂိတ်သည် ပင်လောင်းနှင့် ညောင်ရွှေသွားသည့် ပြည်ထောင်စုလမ်းမကြီးပေါ်တွင် ရှိပြီး ပင်လောင်းမြို့နှင့် ၂၅ မိုင်ကျော် ကွာဝေးကြောင်းသိရသည်။
အလားတူ အောက်တိုဘာလ နောက်ဆုံးပတ်တွင် လုံကန်ကျေးရွာ ဈေးအတွင်း၌ ဈေးရောင်းနေသူ အမျိုးသမီးတစ်ဦးကိုလည်း PNO မှ သေနတ်ပစ်ခြိမ်းခြောက်၍ ငွေတောင်းခံခြင်းများ ပြုလုပ်ခဲ့ကြောင်း ပင်လောင်းမြို့မှ ၎င်းဒေသခံအမျိုးသားက ဆက်ပြောသည်။
“ဈေးထဲမှာ ငါးလာရောင်းတဲ့ အမျိုးသမီး တစ်ယောက်ကို ထိုင်ခိုင်းတယ်၊ ပြီးတော့ ငွေတောင်းတယ်။ ပေးလိုက်လား မပေးလိုက်လား မသိပေမဲ့ သေနတ်ကို အပေါ် ထောင်ပစ်လိုက်တယ်။ လူတွေအကုန် လန့်တော့ ဆိုင်တွေသိမ်းကြတာ၊ တနေကုန် လူတောင်မရှိဘူး”ဟု ၎င်းအမျိုးသားက ဆက်ပြောသည်။
အောက်တိုဘာလ ပထမပတ်မှစ၍ ပင်လောင်းမြို့နယ် နေရပ်ပြန်သွားသော ဒေသခံများကို စစ်ကောင်စီ လက်အောက်ခံ ပအိုဝ်းပြည်သူ့စစ် PNO က အသက် (၁၆) နှစ်မှ အသက် (၆၀) အတွင်း အမျိုးသားများကို စစ်မှုထမ်းရန် ခေါ်ဆောင်သွားပြီး အချို့ကို ရွာအတွင်း၌ ကင်းစောင့်ခိုင်းနေကြောင်း သိရသည်။
ပင်လောင်းမြို့နယ်အတွင်း နောင်ဝိုးကျေးရွာ၊ လှဲလောင်းနှင့် အခြားသော နေရပ်ပြန်သွားသည့် ကျေးရွာဒေသခံများကို ပအိုဝ်းပြည်သူ့စစ် PNO မှ စစ်မှုထမ်းရန် ယခုနည်းလမ်းကို အသုံးပြုခေါ်ယူနေကြောင်း သိရသည်။
Leave a Comments