သျှမ်းပြည် ဟိုပန်မြို့နယ်ရှိ ‘ဝ’ပြည်သွေးစည်းညီညွတ်ရေးပါတီ (UWSP/UWSA) တရားစီရင်ရေး ကော်မတီမှ လူသတ်မှုနှင့် မုဒိမ်းမှုကျူးလွန်သူ (၇) ဦးတို့ကို သေဒဏ်နှင့် ထောင်ဒဏ် ချမှတ်ခဲ့ကြောင်း စုံစမ်းသိရသည်။
ယနေ့ (အောက်တိုဘာလ ၃၀ ရက်) နံနက်ပိုင်းတွင် ‘ဝ’တပ်ဖွဲ့ UWSA ထိန်းချုပ်ထားသည့် ဟိုပန်မြို့တွင် ပြည်သူ့တရားစီရင်ရေး အခမ်းအနားဟု ခေါင်းစဉ်တပ်ပြီး လူစုလူဝေး ရှေ့မှောက်တွင် ရာဇဝတ်မှု ကျူးလွန်ကြောင်း ဖော်ထုတ်ခံရသူ (၇)ဦးကို လူသတ်မှုအတွက် သေဒဏ်နှင့် မုဒိမ်းမှုကို ထောင်ဒဏ် (၁၅) နှစ်တို့ အသီးသီး ချမှတ်ခဲ့ကြောင်း ဒေသခံများက ပြောသည်။
“၈ လပိုင်းတုန်းက ဖြစ်သွားတဲ့ အမှုပါ။ ဓားပြတိုက်ပြီး ကလေးကို သတ်လို့ သေဒဏ်ပေးခံရတယ်၊ ဒေသခံတွေတော့ မဟုတ်ဘူး။ ကျန်တာက မိန်းကလေးကို မုဒိမ်းကျင့်လို့ ထောင်ဒဏ်ချတယ်။ အကုန်လုံးက အသက် (၂၀) တောင် မပြည့်ဘူးပြောတယ်”ဟု ဟိုပန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
သေဒဏ်ချမှတ်ခံရသူမှာ လားရှိုးမြို့နေ စိုင်းကျော်ထွန်း ဆိုသူဖြစ်ပြီး ဟိုပန်မြို့တွင် အလုပ်လုပ်ရန် သွားရောက်စဉ် ဩဂုတ်လ ပထမပတ်အတွင်း ဓားပြတိုက်မှု ကျူးလွန်ခဲ့ပြီး မိသားစုဝင်များကို ထပ်မံတိုက်ခိုက်ခဲ့ခြင်းကြောင့် ကလေးငယ်တစ်ဦး သေဆုံးသွားခဲ့ရကြောင်း ၎င်းအမျိုးသမီးက ဆက်ပြောသည်။
မုဒိမ်းမှုဖြင့် ထောင်ဒဏ်ချမှတ်ခံရသည့် အခြားလူငယ်(၆) ဦးအနက် ဦးဆောင်သူကို တသက်တကျွန်းထောင်ဒဏ် ချမှတ်ပြီး ကျန်(၅)ဦးကို ထောင်ဒဏ် (၁၅) နှစ် အသီးသီး ချမှတ်ခဲ့ကြောင်း သိရသည်။
“၁၀၂၇ စစ်ဆင်ရေး”အတွင်း ညီနောင်မဟာမိတ်တပ်များက သိမ်းပိုက်ပြီးနောက် ‘ဝ’တပ်ဖွဲ့ထံ လွှဲပြောင်းပေးအပ်ခဲ့သည့် ဟိုပန်မြို့ကို UWSA ထိန်းချုပ်နယ်မြေအတွင်း ခရိုင်အဆင့်အဖြစ် တိုးမြင့်ပြီးနောက် လူစုလူဝေး ရှေ့မှောက်တွင် ဒုတိယအကြိမ် တရားစီရင်ခြင်းဖြစ်ကြောင်း ဒေသခံများက ပြောသည်။
ပြီးခဲ့သည့် ဩဂုတ်လနှင့် စက်တင်ဘာလအတွင်း ‘ဝ’တပ်ဖွဲ့ ထိန်းချုပ်ဒေသအတွင်း ပြစ်မှုကျူးလွန်သူများကို ရာဇဝတ်မှု အမျိုးအစား (၁၁) မျိုး ခွဲခြား၍ UWSA တရားရေးဌာနမှ တရားစွဲဆိုခဲ့ပြီး လူစုလူဝေး ရှေ့မှောက်တွင် စီရင်ချက်ချ ပြစ်ဒဏ်ပေးခြင်းကို ပန်ဆန်း၊ မိုင်းပေါက်၊ မိုင်းမောနှင့် ဟိုပန်မြို့နယ်တို့တွင် ပြုလုပ်ခဲ့သည်။
လောက်ကိုင်မြို့တွင် ကိုးကန့်တပ်ဖွဲ့ MNDAA က ပြစ်မှုကျူးလွန်သူ (၁၀) ဦးကို အများပြည်သူရှေ့မှောက် သေဒဏ်ချမှတ်ခဲ့စဉ်က ဥရောပသမဂ္ဂ EU မှ အပြင်းထန်ဆုံး ရှုတ်ချပြီး ဘယ်လိုအခြေအနေဖြစ်ဖြစ် သေဒဏ်ချမှတ်မှုကို ပြင်းပြင်းထန်ထန် ဆန့်ကျင်ကန့်ကွက်ကြောင်း မြန်မာနိုင်ငံဆိုင်ရာ ဥရောပသမဂ္ဂရုံးက ဧပြီလ ၂၆ ရက်တွင် ထုတ်ပြန်ထားသည်။
Leave a Comments