သျှမ်း-မန္တလေးနယ်စပ် ပြင်ဦးလွင်မြို့တွင် စစ်ကောင်စီတပ်က အတင်းအဓမ္မ တပ်သားသစ် အပြင်းအထန် စုဆောင်းနေကြောင်း စုံစမ်းသိရသည်။
ယမန်နေ့ (အောက်တိုဘာလ ၂၈ ရက်)တွင် ပြင်ဦးလွင်မြို့ရှိ ရပ်ကွက်ကြီး(၁၈) ဒိုးကွင်းရွာမှ စစ်ကောင်စီတပ်ခန့် အုပ်ချုပ်ရေးမှူး ဦးအောင်လွင်သည် ရပ်ကွက်အတွင်း တစ်လလျှင် လူငယ် (၂) ဦးကို တပ်သားသစ်အဖြစ် စစ်မှုထမ်းသင်တန်းသို့ မဖြစ်မနေပို့ဆောင်ရမည်ဆို ပြောဆိုခဲ့သည်။
ထို့ပြင် စစ်မှုမထမ်းဘဲ တိမ်းရှောင်လိုသည့် လူငယ်တစ်ဦးလျှင် ကျပ်သိန်း (၈၀) ခန့်အထိ ပေးဆောင်ရမည်ဖြစ်ပြီး၊ ငွေကြေး အဆင်မပြေသည့် မိသားစုဝင်များကို စစ်မှုထမ်းဆောင်ရန် ဖိအားပေးနေသည်ဟု မြို့နယ်ဒေသခံတစ်ဦးက သျှမ်းသံတော်ဆင့်ကို ပြောသည်။
“မနေ့ကလည်း ဒိုးကွင်းရပ်ကွက်ဘက်ကို အုပ်ချုပ်ရေးမှူး အောင်လွင်က တစ်ရပ်ကွက်ကို လူငယ် (၂) ယောက် စစ်မှုထမ်းရမယ်။ မထမ်းနိုင်ရင် တစ်ယောက်ကို သိန်း (၈၀) နီးပါး ပေးဆောင်ရမယ်။ အတင်းအဓမ္မ စစ်မှုထမ်းခိုင်းနေတယ်၊ စစ်တပ်က တပ်သားသစ်တွေ အပြင်းအထန် စုဆောင်းနေတယ် အခု။ ပိုက်ဆံမရှိတဲ့ မိသားစုကို ပိုရွေးပြီး စစ်မှုထမ်းခိုင်းတယ်”ဟု ၎င်းဒေသခံ အမျိုးသားက ပြောသည်။
၂၀၂၁ ခုနှစ် အာဏာသိမ်းပြီးနောက်ပိုင်းတွင် စစ်ကောင်စီတပ်သည် တိုင်းရင်းသားလက်နက်ကိုင်များ၊ ပြည်သူ့ကာကွယ်ရေးတပ် PDF တို့နှင့် နေ့စဉ်ထိတွေ့တိုက်ပွဲ ဖြစ်ပွားလျက်ရှိသဖြင့် စစ်အင်အား အလုံအလောက် မရှိတော့သဖြင့် ယခင်ကဲ့သို့ တပ်သားသစ်များကို အတင်းအဓမ္မ စုဆောင်းခိုင်းနေကြောင်း မြို့နယ်ဒေသခံ အမျိုးသားတစ်ဦးက ပြောသည်။
ပြင်ဦးလွင်မြို့ရှိ စစ်ကောင်စီတပ်နှင့် နီးစပ်သည့် ရပ်ကွက်တစ်ချို့တွင် ခေါင်းစဉ်အမျိုးမျိုးဖြင့် နေအိမ်တစ်အိမ်လျှင် ကျပ် (၂) သိန်းဝန်းကျင်အထိ ကောက်ခံနေပြီး လက်ရှိမြို့ထဲတွင် တပ်သားသစ်များ နေ့စဉ် အင်အားဖြည့်နေကြောင်း ၎င်းအမျိုးသားက ဆက်ပြောသည်။
“အာဏာသိမ်းပြီးကတည်းက စစ်တပ်ဘက် လက်လွတ်လိုက်ရတဲ့ မြို့တွေ များလာတော့ သူတို့ပြန်တိုက်ခိုက်ဖို့ စစ်အင်အားတွေ အတင်းအဓမ္မ နေ့စဉ်စုဆောင်းနေတယ်။ ပြည်သူရဲ့ သဘောဆန္ဒမပါပဲ ဒီလိုလုပ်ခြင်းအားဖြင့် လူငယ်တွေရဲ့ ပညာရေး၊ စီးပွားရေး၊ လူမှုရေး စသဖြင့် လုပ်ငန်းအမျိုးမျိုးတွေ ဆုံးရှုံးလိုက်ရတယ်။ လူငယ်တွေရဲ့ စိတ်ပိုင်းဆိုင်ရာ ထိခိုက်မှုတွေလည်း ရှိလာတယ်” ဟု ၎င်းအမျိုးသားက ဆက်ပြောသည်။
ပြီးခဲ့သည့် အောက်တိုဘာလ (၁၉) ရက်နေ့မှ စတင်ကာ ပြင်ဦးလွင်အနီး နောင်ချိုမြို့နယ်အတွင်း ဂန့်ကော်ရွာ တိုက်ပွဲများ စတင်ခဲ့ရာ ယမန်နေ့ (အောက်တိုဘာလ ၂၈ ရက်) နံနက်ပိုင်း အထိ တိုက်ပွဲများ ပြင်းထန်နေပြီး ပြင်ဦးလွင် စစ်ကောင်စီတပ်မှ လက်နက်ကြီး ပစ်ကူပေးနေကြောင်း စစ်ရေးသတင်းရင်းမြစ်က ဆိုသည်။
အလုပ်သင် သတင်းထောက် နန်းလရောင် ရေးသားသည်။
