သျှမ်းတောင်၊ ကလောမြို့၌ တန်ဆောင်တိုင်ပွဲ မဖြစ်မနေ ကျင်းပရမည်ဟု သျှမ်းပြည်နယ် စစ်ကောင်စီ ဝန်ကြီးချုပ်က ဖိအားပေး သဖြင့် ပွဲကျင်းပရန် ပြင်ဆင်မှုများ ပြုလုပ်နေရကြောင်း မြို့မိမြို့ဖ တစ်ဉီး ယမန်နေ့ (အောက်တိုဘာ ၂၈)ရက်တွင်ပြောသည်။

ပြီးခဲ့သည့် စက်တင်ဘာလ ၁၀ ရက်က စတင်ခဲ့သည့် ရေကြီးမှုကြောင့် ကလောမြို့လယ် ရပ်ကွက် (၄) တခုလုံး၊ ရပ်ကွက် (၂) နှင့် ရပ်ကွက် (၃) အစိတ်ပိုင်း တချို့ ရေနစ်မြုပ်ခဲ့ပြီး လူသေဆုံးမှုများရှိခဲ့သဖြင့် မြို့ခံများ အနေဖြင့် ပွဲမကျင်းပလိုသော်လည်း သျှမ်းဝန်ကြီးချုပ်၏ ဖိအားကြောင်း လာမည့် နိုင်ဝင်ဘာလ ၁၆၊ ၁၇၊ ၁၈ ရက်များတွင် ကျင်းပမည်ဖြစ်ကြောင်း ၎င်းကဆိုသည်။

“ရေကြီးပြီး သေဆုံးတာတွေရှိတော့ မြို့ခံတွေက မလုပ်ချင်ဘူး။ ဝန်ကြီးချုပ်က ဖိအားပေးလို့ လုပ်ရတာ။ ပွဲအတွက် သိန်း ၇၅၀ ရန်ပုံငွေ ချပေးမယ်တော့ ပြောတာတယ်။ အခုပြင်ဆင်နေကြပြီ” ၎င်းကရှင်းပြသည်။

တန်ဆောင်တိုင်ပွဲသည် ကလောမြို့၏ အထင်ကရပွဲ ဖြစ်သော်လည်း လက်ရှိ လုံခြုံရေး အခြေအနေအရ ယမ်းအသုံးပြုခွင့် မပေးလိုသဖြင့် မြို့နယ်ထွေအုပ်က ပွဲအကျဥ်းချုံးသာ ပြုပ်လုပ်လိုသော်လည်း ဝန်ကြီးချုပ်က စည်စည်ကားကား ဖြစ်စေရန် ဖိအားပေးနေသဖြင့် ကျင်းပရခြင်း ဖြစ်ကြောင်း မြို့နယ် ထွေအုပ်နှင့် နီးစပ်သူ တစ်ဦးက ဆိုသည်။

“ရေကြီးပြီးတော့ ဗိုလ်ချုပ်မှူးကြီး (မင်းအောင်လှိုင်) ရောက်လာတယ်။ ပြန်လည် ထူထောင်ရေး အမြန်လုပ်ဖို့တို့ နောင်ရေထပ်မကြီးအောင်လုပ်ဖို့တို့ မှာတယ်။ အဲနောက်ပိုင်း ဝန်ကြီးချုပ် ခဏခဏလာပြီးတော့ ဟိုဟာလုပ်ပါ၊ ဒီဟာလုပ်ပါပေါ့။ ချောင်းရေပြည့်နေတဲ့ ကာလကြီးမှာတောင် ဘက်ဟိုးတွေနဲ့ ချောင်းချဲ့ဖို့ လုပ်တယ် ဆိုတော့ ခင်ဗျား စဉ်းစားကြည့်ပေါ့။ ပြည်နယ် ရန်ပုံငွေကတောင့်တော့ အသုံးစာရင်းပြလို့ ကောင်းတယ်လေ” ဟု ၎င်းက ဆက်ပြောသည်။

ထို့အပြင် ရေကြီးသည့် ဧရိယာနှင့် ပျက်စီးဆုံးရှုံးမှု စာရင်းများကို ထွေအုပ်နှင့် စည်ပင်ကပင် ချဲ့ကား၍ စာရင်းတင်ထားကြောင်း၊ မီဒီယာများအား ချဲကားပြောဆိုသူများလည်း ရှိခဲ့ကြောင်း ၎င်းကဆိုသည်။

“ဌာနဆိုင်ရာက ဘတ်ဂျက်များများကျဖို့။ လူတချို့က အလှူများများလာဖို့ အဲလိုတွေရှိတယ်။ မြို့တမြို့လုံး အနေနဲ့ဆို ရေနစ်ဧရိယာက ဘယ်လောက်မှ မရှိဘူး။ မြို့ပေါ် ရပ်ကွက် ၁၁ ခုရှိတာမှာ ရေနစ်တာ ရပ်ကွက် ၂ ခုစာတောင် မရှိဘူး။ ဖြစ်တဲ့ ဧရိယာမှာတော့ တော်တော်ဆိုးတာပေါ့။ ဒါပေမယ့် ဆိုးဆိုးရွားရွား ပျက်စီးသွားတဲ့ ဟိုတယ် မရှိဘူး။ ၂ ခုပဲရေဝင်သွားတာ။ မီဒီယာတွေမှာ တမြို့လုံး ရေနစ်ကုန်ပြီ ရွှံ့ဖုံးကုန်ပြီ ရေးနေကြတာပဲ။ အခုတော့ ဧည့်သည်မလာတော့ဘူးပေါ့” ဟု ၎င်းကရှင်းပြသည်။

ရေကြီးပြီးနောက် နိုင်ငံတဝှမ်းမှ ကူညီကယ်ဆယ်ရေးအဖွဲ့များစွာ လာရောက်ကူညီ လှူဒါန်းရာတွင် အမှန်တကယ် ရေဘေးသင့်ခဲ့သူ တချို့ အကူအညီ အနည်းငယ်သာရကြောင်း ရပ်ကွက် (၃) နေ အမှန်တကယ် ရေဘေးကြုံတွေ့ပြီး နေအိမ် ပျက်စီးခဲ့ရသူ တဦးက ဆိုသည်။

“မင်းသမီး ခိုင်နှင်းဝေ ပေးတဲ့ တအိမ် သိန်း ၃၀ လည်းမရဘူး။ တော်တော်များများလာလှူတာ မရဘူး။ မျက်နှာပြောင်တဲ့လူတွေ အသံကျယ်ကျယ်နဲ့ ငိုပြတဲ့သူတွေပဲ အများဆုံးရတာ။ အဆိုးဆုံးက ရေမထိတဲ့ ရပ်ကွက်တွေက အုပ်စုလိုက်လာပြီး အလှူပစ္စည်းတွေ လာတန်းစီ ယူသွားတာ။ အဲဒါ နေ့တိုင်းပဲ။ သူရတယ် ငါမရဘူးနဲ့ ကလော facebook ဂရုတွေမှာ ရေးကြတာ ပွထနေတာပဲ။ ဒီမျက်နှာတွေ နေ့တိုင်းမြင်နေရတာ ရှက်စရာကြီး” ဟု ၎င်းကရှင်းပြသည်။

လက်ရှိ ကလော တန်ဆောင်တိုင်ပွဲ အတွက် ပြင်ဆင်နေရာ ပြိုင်ပွဲ အတွက် မီးရှော်တိုင် ၁၅ တိုင် စာရင်းပေးထားကြောင်း၊ တရက်လျင် မီးရှော်တိုင် ၅ တိုင် ထွန်းညှိမည်ဖြစ်ကြောင်း သိရသည်။

ပြီးခဲ့သည့် အောက်တိုဘာလ ၂၆ ရက် ညနေပိုင်းတွင် ကလောမြို့ ရွာသစ် ဘုန်းကြီးကျော်၌ တန်ဆောင်တိုင်ပွဲ ပြင်ဆင်မှု အဖြစ် ယမ်းထောင်းရာမှ ပေါက်ကွဲမှု ဖြစ်ပွားရာ သံဃာတော် ၂ ပါးနှင့် လူ ၃ ဦး ဒဏ်ရာရရှိသဖြင့် ကလောဆေးရုံသို့ တင်ပို့ ကုသထားရကြောင်း မြို့ခံများထံမှ သိရသည်။