သျှမ်းပြည် မြို့တော် တောင်ကြီးမြို့ အမှတ် ၅ (အထက) အထက်တန်းကျောင်းတွင် တက်တူးထိုးထားသည့် အလယ်တန်း၊ အထက်တန်းကျောင်းသားများအား တန်းစီခေါ်ယူ၍ အလှည့်ကျ တပ်ဆေးရုံတွင် သွားရောက် ဖျက်ခိုင်းသည်ဟု သိရသည်။

ပြီးခဲ့သည့်အပတ် သောကြာနေ့ နို၀င်ဘာလ ၁၀ ရက်နေ့ကစပြီး ၊ ရိုးရာဆေးမှင်ကြောင်များ၊ တက်တူးများ ထိုးထားသည့် ကျောင်းသား ရ၀ ခန့်အား တောင်ကြီးမြို့ အရှေ့ပိုင်းတိုင်းလက်အောက်ခံ စစ်ဆေးရုံတွင် အလှည့်ကျ သွားရောက်ဖျက်စေကြောင်း ကျောင်းသားမိဘတဦးဖြစ်သည့် နန်းရင်က ပြောသည်။

“သားကိုကျောင်းသွားပို့တုန်းက ဆရာမက ဘာမှမပြောဘူး။ ကျမ အိမ်ပြန်ရောက်မှ ဖုန်းဆက်လာတယ်။ တက်တူးဖျက်ရမယ်တဲ့ ။ အဲဒါကို စစ်ဆေးရုံမှာ သွားဖျက်မယ်ဆိုတော့ လှန့်သွားတယ်။ ကျမ လိုက်သွားတော့ ကလေးကိုထုံဆေးပေးပြီး ဖျက်တာ။ ထုံဆေးပျယ်တော့နာပြီလေ။ သားလဲငို။ ကျမလဲ သားကိုကြည့်ပြီး သနားလို့လိုက်ငိုကြတယ်သားအမိ ၂ ယောက်။ ဒီနေ့ထိ ၃-၄ ရက်ရှိပြီ။ အနာမပျောက်သေးဘူး။ သားအနာက သွေးကြောနဲ့နီးတော့ ကျမ စိုးရိမ်လို့ ညည အိပ်မပျော်နိုင်ဘူး။”- ဟု နန်းယိင်းကပြောပြသည်။

အထက ၅ ကျောင်းတွင် တက်တူးထိုးသည့်ကျောင်းသားလေးများ ရ၀ ခန့်ရှိပြီး တရက်လျင် ၃-၄ ဦးစီ စစ်ဆေးရုံသို့ခေါ်ဆောင်ကာ ဖျက်ပေးမည်ဖြစ်ဟု ဆရာမ များပြောကြောင်း ကျောင်းသားမိဘများ ကပြောဆို နေသည်။

ကျောင်းသားများ၏ တက်တူးမှာ အသဲပုံတက်တူး၊ အိမ်မြောင်ပုံတက်တူး၊ ပန်းပုံတက်တူးတို့အပြင်တချို့မှာ သျှမ်းရိုးရာ နမောကင် ခေါ် ဂါဋ္ဌာဆေးမှင်ကြောင်လည်းပါ၀င်ကြောင်း၊ ၅ တန်းကျောင်းသားမှ ၁၀ တန်း ကျောင်းသား များဖြစ်ကြောင်း မူလတန်းပြဆရာမ တဦးကပြောသည်။

ယခုကဲ့သို့ကျောင်းသားလေးများအား ထုံဆေးပေး တက်တူးဖျက်ခြင်းပြုလုပ်မှုမှာ ပထမဆုံး အကြိမ်ပြုလုပ် ခြင်းဖြစ်ပြီး အထက်တန်းကျောင်းသားများနှင့် တက်တူးမှာ မအပ်စပ်သဖြင့်ဟုသာ ကျောင်းကော်မတီဝင် ဆရာမတဦးကပြောသည်။
ကျောင်းအုပ်ဆရာမကြီး ဒေါ်ဆွေဆွေအောင်အားဆက်သွယ်သော်လည်း အစည်းအဝေးတွင်ရှိနေ သဖြင့်ဖြေကြားရန်အဆင်မသင့်သေးဟု သျှမ်းသံတော်ဆင့်အား ပြောသည်။

အဆိုပါအထက်တန်းကျောင်းသားကလေးများအား ထုံဆေးပေးပြီးတက်တူးဖျက်ပေးနေသည်မှာ စစ်မှုမထမ်းမနေရ စနစ်အတွက် ကြိုတင်ပြင်ဆင်ခြင်းလော-ဟုလည်းကျောင်းသားမိဘတချို့နှင့်ဆရာ ဆရာမတချို့ကပြောဆိုနေကြသည်။

“ကျနော့်အမြင်တော့ မကြာသေးခင်က ပြဌာန်းထားတဲ့ နိုင်ငံသားအားလုံး အသက် ၁၈ နှစ် ပြည့်သူတိုင်း စစ်မှု မထမ်းမနေရကိစ္စနဲ့ပတ်သက်နိုင်တယ်။ မြန်မာ့တပ်မတော် စစ်ရာထူးခန့်ချုပ်ဆိုင်ရာ စည်းမျဉ်းမှာ တက်တူး ထိုးထားသူ ပါ၀င်ခွင့်မရှိဘူးလေ တပ်မှာ။ ဘာဘဲဖြစ်ဖြစ်ကျောင်းသားမိဘနဲ့အရင်ဆုံးတိုင်ပင်သင့်တယ်။ ကျောင်းဆောင်ပုဒ်ကိုက မိဘ ဆရာ ပူးပေါင်း ကလေးပညာကောင်းမဟုတ်လား။ ”- ဟု ကလေးဖခင်တဦးက သျှမ်းသံတော်ဆင့်သို့ပြောသည်။

တောင်ကြီးမြို့တွင် အခြေခံအထက်တန်းကျောင်း (အထက) ကျောင်း ရ ကျောင်း ရှိသည့် အနက် အထက ၅ တွင် ပထမ ဦးဆုံး တက်တူးဖျက်ခြင်း အစီအစဉ်လုပ်နေသည်ဟု ကြားသိရကြောင်း၊ အခြားကျောင်းများ ထိုကဲ့သို့ ပြုလုပ်ခြင်းမရှိ သေး ကြောင်း ကျောင်းသားမိဘ များကပြောကြားသည်။