လက်ရှိ မြန်မာ့အခြေအနေ၊ ကမ္ဘာ့အခြေအနေများအရ အချုပ်အခြာအာဏာ ကာကွယ်ရန် အချိန်ကျရောက်ပြီ ဖြစ်၍ ပြည်သူများ စစ်တပ်ကို ကူညီရန် စစ်ခေါင်းဆောင် မင်းအောင်လှိုင် က ပြောဆို လိုက်သည်။

ယမန်နေ့၊ အောက်တိုဘာ ၂၅ ရက်၊ နံနက်ပိုင်းက ပြုလုပ်သည့် ပြည်ထောင်စု တိုင်းရင်းသားလူမျိုးများ ဖွံ့ဖြိုးရေး တက္ကသိုလ်၊ ပညာရေးဘွဲ့ (၅) နှစ်သင်တန်း၊ အမှတ်စဉ် (၆) မှကျောင်းသား၊ ကျောင်းသူများကို တွေ့ဆုံ ပြောဆိုစဉ် ယခုကဲ့သို့ ထည့်သွင်း ပြောဆိုခဲ့ခြင်း ဖြစ်သည်။

မျက်မှောက်ကာလ မြန်မာ့အခြေအနေ၊ ကမ္ဘာ့အခြေအနေတို့အရ မြန်မာနိုင်ငံသားတိုင်း ကိုယ့်မြေ၊ ကိုယ့်ရေ၊ ကိုယ့်လူမျိုး၊ ကိုယ့်အချုပ်အခြာအာဏာကို ကာကွယ်ရန် အချိန်ကျရောက်လာပြီဟု ၎င်းက ဆိုသည်။

ထို့အပြင် “နိုင်ငံတော် ကာကွယ်ရေးမှာ အဓိကတာဝန်ရှိတဲ့ တပ်မတော်ကို ပြည်သူ့အားနဲ့ ပူးပေါင်းကူညီရမှာ ဖြစ်သလို ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်မှု မပြိုကွဲရေး၊ အချုပ်အခြာအာဏာ တည်တံ့ခိုင်မြဲရေး တာဝန်တွေကိုလည်း ပြည်သူနဲ့တပ်မတော် အတူတကွ ဦးထမ်းပဲ့ထမ်း တာဝန် ထမ်းဆောင်ကြရပါမယ်” ဟု မင်းအောင်လှိုင်က ပြောဆိုသည်။

ပြည်သူတစ်ယောက် အနေဖြင့် နိုင်ငံတော် ကာကွယ်ရေး တာဝန်ထမ်းဆောင်ခြင်းသည် နိုင်ငံတော်နှင့် နိုင်ငံသူ၊ နိုင်ငံသား အားလုံးကို ကာကွယ်စောင့်ရှောက်ခြင်းဖြစ်ကာ အမျိုးသားရေး တာဝန် ဖြစ်သည်ဟု ၎င်းက ဆိုသည်။

ထို့အပြင် အထွေထွေ ရွေးကောက်ပွဲ ကျင်းပနိုင်ရေး အလွန်အရေးကြီးကြောင်း ထည့်သွင်းပြောဆိုပြီး ပြည်သူများ ပူးပေါင်းပါဝင်ရန်လည်း တောင်းဆိုထားသည်။

နိုင်ငံအနှံ့ စစ်ရှုံးနေသည့် စစ်ကောင်စီသည် စစ်သား လိုအပ်ချက် အရေးပေါ် ဖြည့်ဆည်းနိုင်ရန် ပြည်သူ့စစ်မှုထမ်း ဥပဒေပြဌာန်း၍ စစ်သား စုဆောင်းနေရာ ယမန်နေ့က အပတ်စဥ် (၄) သင်တန်းဆင်းပွဲ ပြုလုပ်ခဲ့ပြီး အနည်းဆုံး စစ်သားသစ် (၅၀၀၀) ထပ်မံ စုဆောင်း ရရှိခဲ့သည်ဟု အကဲခပ်များက သုံးသပ်ထားသည်။

လက်ရှိ သျှမ်းမြောက် အပါအဝင် တိုင်းရင်းသားတော်လှန်ရေး ပူးပေါင်းတပ်များ သိမ်းပိုက်ထားသည့် နယ်မြေများကို စစ်ကောင်စီက နေ့စဥ် လေကြောင်းမှ ဗုံးကြဲလျက်ရှိကာ တရုတ်နိုင်ငံ၏ အကူအညီဖြင့် နယ်မြေများ ပြန်ရရေး ဖိအားပေးနေသည်ကိုလည်း တွေ့ရသည်။