သျှမ်းပြည် လားရှိုးမြို့ပေါ်ကို စစ်ကောင်စီက လေကြောင့်ဖြင့် ထပ်မံ ဗုံးကြဲတိုက်ခိုက်ခဲ့ကြောင်းစုံစမ်းသိရသည်။
ယနေ့ (အောက်တိုဘာလ ၂၅ ရက်) နေ့လည် ၁ နာရီကျော်တွင် လားရှိုးမြို့ပေါ် အနီးတစ်ဝိုက်ကို စစ်ကောင်စီက လေကြောင်းဖြင့် ထပ်မံ ဗုံးကြဲတိုက်ခိုက်ခဲ့ကြောင်း လားရှိုးမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဗုံးတွေက ဆက်တိုက်ကြဲနေတုန်း။ကျနော်တို့လည်းသွားမကြည့်ရသေးတော့ ဘယ်နားလေးလည်းဆိုတာ သေချာမပြောတက်သေးဘူးဗျ”ဟု ၎င်းကပြောသည်။
စစ်ကောင်စီမှ လေယာဉ်ဖြင့် ဗုံးကြဲတိုက်ခိုက်ခဲ့သည့် တည်နေရာနှင့် ထိခိုက်ပျက်စီးမှုကို သျှမ်းသံတော်ဆင့် မှ ဆက်လက် စုံစမ်းပါသည်။
ကိုးကန့်တပ် MNDAAထိန်းချုပ်ထားသည့် လားရှိုးမြို့ကို စစ်ကောင်စီက လေကြောင်းဖြင့် နေ့စဉ်ရက်ဆက် ဗုံးကြဲတိုက်ခိုက်မှုများပြုလုပ်နေသည်။
ပြီးခဲ့သည့် (အောက်တိုဘာလ ၂၃ ရက်) လားရှိုးမြို့အဝင် မယ်ဟန်ကျေးရွာအုပ်စု နမ့်ခိုက်ရှိ “ရိုးရာ” ဆန်အရက်ချက်စက်ရုံကို စစ်ကောင်စီတပ်က (၂) ကြိမ် လေကြောင်းဗုံးကြဲတိုက်ခိုက်ခဲ့ရာ မီးလောင်ပျက်စီးမှုများရှိခဲ့ကြောင်း သိရသည်။
ကိုးကန့်တပ် MNDAA ခေါင်းဆောင် ဦးဖုန်တာရွှင် နှင့် တရုတ်အထူးကိုယ်စားလှယ် မစ္စတာတိန့်ရွှီကျွင်းတို့ ယူနန်ပြည်နယ်တွင် ပြီးခဲ့သည့်ရက်ပိုင်းတွင် တွေ့ဆုံခဲ့ကြောင်း ဘီဘီစီက ယနေ့ (အောက်တိုဘာ ၂၅)ရက်စွဲဖြင့် သတင်းထုတ်ပြန်ခဲ့သည်။
လားရှိုးမြို့ကို လေကြောင်းဗုံးကြဲချသော စစ်ကောင်စီတပ်၏ လေယာဉ်များမှာ တံတားဦးလေတပ်မှ လေယာဉ်များဖြစ်ကြောင်း လေကြောင်းကင်းထောက် NAS က ရေးသားဖော်ပြထားသည်။
ဩဂုတ်လဆန်းပိုင်းတွင် လားရှိုးမြို့အခြေစိုက် အရှေ့မြောက်ပိုင်း တိုင်းစစ်ဌာနချုပ်ကို ကိုးကန့်တပ်ဖွဲ့ MNDAA ထိန်းချုပ်နိုင်ပြီးနောက် သုံးလအတွင်း စစ်ကောင်စီတပ်၏ လေကြောင်းတိုက်ခိုက်မှု အကြိမ်ရေမှာ (၂၅) ကြိမ်ထက်မနည်း ရှိလာပြီဖြစ်ကြောင်း သိရသည်။
Leave a Comments