သျှမ်း-ကရင်နီနယ်စပ် ဖယ်ခုံနှင့် လွိုင်ကော်၊ ပင်လောင်း တို့ဘက်တွင် စစ်ဘေးရှောင်ပြည်သူများသည် ပြောင်းဖူးနှင့်ဆန် ရောချက်စားသောက်နေရသည်ဟု စုံစမ်းသိရသည်။
လက်ရှိတိုက်ပွဲပြင်းထန်နေသည့် သျှမ်း-ကရင်နီနယ်စပ် ဖယ်ခုံနှင့် ပင်လောင်း စစ်ရှောင်ပြည်သူများသည် တောထဲတွင် တဲထိုးနေရပြီး ဝမ်းစာအတွက် ရုန်းကန်နေရကာ ယူဆောင်လာသည့် ဆန်နှင့် အနီးတဝိုက်ရှိ ပြောင်းဖူးခြံမှ ပြောင်းဖူးများနှင့် ရောနှော ချက်စားနေရသည်ဟု စစ်ရှောင်နေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“တိုက်ပွဲက နေ့တိုင်းဖြစ်နေတာ ၃ လလောက်ရှိနေပြီ တိုက်ကြတာ။ ရွာတွေထဲထိ ဝင်လာတော့ အိမ်မှာရှိတဲ့ ဆန်တွေ နိုင်သလောက်ပဲ သယ်လာတာ။ တောထဲရောက်တော့ စားသောက်ဖို့က မလောက်ဘူး၊ အဲ့တဝိုက်ကရှိတဲ့ ပြောင်းဖူးတွေယူပြီး ရောချက်စားရတာ။ ထမင်းနပ် မှန်အောင်လည်း မစားရဲဘူး၊ နောက်ရက်တွေအတွက် မကျန်မှာဆိုးလို့ ကလေးတွေလည်းရှိတယ်” ဟု ၎င်းစစ်ရှောင် အမျိုးသမီးက ပြောသည်။
သျှမ်း-ကရင်နီနယ်စပ် ဖယ်ခုံ-ပင်လောင်း ပြည်ထောင်စုလမ်းမကြီးပေါ်ရှိ နမ့်ဖာမူ၊ ပင်စုံ၊ လဲလောင်း စသည့် ကျေးရွာအသီးသီးတွင် စစ်ကောင်စီလက်အောက်ခံ ပအိုဝ်းပြည်သူစစ် PNO တို့ ပူးပေါင်းပြီး ကရင်နီ တော်လှန်ရေး တပ်ပေါင်းစု တို့ နေ့စဉ် တိုက်ပွဲများ ပြင်းထန်နေကြောင်း စစ်ရှောင်နေရသည့် အမျိုးသားတစ်ဦးက ပြောသည်။
၎င်းတို့ နေ့စဉ်နီးပါး တိုက်ပွဲပြင်းထန်နေခြင်းကြောင့် ကျေးရွာနေ ပြည်သူများသည် ဘေးကင်းလုံခြုံသည့်နေရာ တောထဲတွင်သာ ခိုအောင်းနေထိုင်နေရပြီး စားဝတ်နေရေးအတွက် တစ်နေ့ထက် တစ်နေ့ ပိုပိုခက်ခဲလာသည်ဟု စစ်ဘေးရှောင်များထံမှ သိရသည်။
ယခင်ကဲ့သို့ စားနပ်ရိက္ခာပြတ်လပ်နေသည့် လွိုင်ကော်နှင့် ဖယ်ခုံ၊ ပင်လောင်းတို့မှ စစ်ရှောင်ပြည်သူများသည် ရေဘေးတင်သာမက စစ်ဘေးပါ ထပ်မံတိမ်းရှောင်နေရသည်ဟု သိရသည်။
“လွိုင်ကော်နဲ့ ဖယ်ခုံဘက် ပင်လောင်းဘက်လည်း ရေဘေးကော စစ်ဘေးကော ရှောင်နေရတယ်။ တောထဲမှာ နေရတော့ ဘာအလုပ်မှလည်းမရှိ၊ မြို့ထဲလည်း သွားလို့မရဘူး။ နေတဲ့တဝိုက်နားက အကုန်တိုက်ပွဲတွေဖြစ်နေကြတာ။ စားသောက်ဖို့ကလည်း စိတ်ပူနေရတယ်”ဟု ၎င်းအမျိုးသားက ပြောသည်။
ပင်လောင်းနှင့် ဖယ်ခုံမြို့ နယ်စပ်တွင် စစ်ကောင်စီလက်အောက်ခံ ပအိုဝ်းပြည်သူ့စစ်တို့သည် ပြီးခဲ့သည့် စက်တင်ဘာလ နောက်ဆုံးပတ်မှစ၍ လမ်းများပိတ်ထားသည့်အတွက် တိုက်ပွဲအတွင်း၌ ပိတ်မိနေသည့် ဒေသခံများရှိနေကြောင်း သိရသည်။
ထိုတိုက်ပွဲဖြစ်ပွားနေသည့် ကျေးရွာအပြင် အနီးအနား ကျေးရွာများရှိ ဒေသခံ ရာနှင့်ချီသည် ပြီးခဲ့သည့် စက်တင်ဘာလ နောက်ဆုံးပတ်မှ စ၍ ထွက်ပြေးတိမ်းရှောင်ရန် ခက်ခဲနေကြောင်း ဒေသခံပြောပြချက်အရ သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments