သျှမ်းပြည် ဟိုပန်မြို့နယ်တွင် တရုတ်နိုင်ငံဘက်မှ ကုန်သွယ်ရေးလမ်းကြောင်းပိတ်မည့် သတင်းကြောင့် စက်သုံးဆီများကို အလုအယက် ဝယ်ယူနေကြကြောင်း စုံစမ်းသိရသည်။
ယနေ့ (အောက်တိုဘာလ ၂၄ ရက်) နံနက်အစောပိုင်းမှ စတင်ပြီး ‘ဝ’တပ်ဖွဲ့ UWSA ထိန်းချုပ်ထားသည့် ဟိုပန်မြို့တွင် တရုတ်နိုင်ငံဘက်မှ ကုန်သွယ်ရေးလမ်းကြောင်း ပိတ်မည့် သတင်းကြောင့် စက်သုံးဆီများကို အလုအယက် ဝယ်ယူနေကြပြီး ဈေးနှုန်းမြင့်တက်လာနေကြောင်း ဒေသခံများက ပြောသည်။
“ကုန်သွယ်ရေးလမ်း ပိတ်ကုန်ပြီလို့ ကြားတယ်၊ ဓာတ်ဆီလုဝယ်နေကြပြီ တစ်မြို့လုံး။ မိန်းပန်းရှမ်းမှာ ဆီထည့်ဖို့ တန်းစီတာ စည်ကားနေတာပဲ။ အစောပိုင်း (၇)ယွမ် အခုက (၈)ယွမ်၊ ခနနေ ထပ်တက်လာမလား မသိဘူး။ ကွက်သစ်မှာ နမ့်ခုံးဆီဆိုင်က (၁၀) ယွမ်ရှိတော့မယ်”ဟု ဟိုပန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (အောက်တိုဘာလ ၂၃ ရက်) မှ စတင်၍ ယနေ့နံနက်ပိုင်းအထိ ဟိုပန်မြို့တွင် စက်သုံးဆီဈေးနှုန်းမှာ (၂)ကြိမ်မက ဈေးတက်သွားပြီး ဓာတ်ဆီတစ်လီတာလျှင် မြန်မာကျပ်ငွေ ၆ ထောင်မှ တစ်သောင်းကျော်အထိ မြင့်တက်သွားကြောင်း ဟိုပန်ဒေသခံများထံမှ သိရသည်။
ဟိုပန်မြို့နှင့် ဖောင်ဆိပ်တံတားသာ ခြားထားပြီး အောက်တိုဘာလ (၂၀) ရက်နေ့က စစ်ကောင်စီတပ်၏ လေကြောင်းဗုံးကြဲ တိုက်ခိုက်ခံခဲ့ရသည့် ကွမ်းလုံမြို့နယ် နမ့်ဟူးကျေးရွာသည် ကိုးကန့်ဒေသသို့ ကုန်ပစ္စည်းသယ်ယူနိုင်ရန် အရေးပါသည်။
ပြီးခဲ့သည့် ဩဂုတ်လ နောက်ဆုံးပတ်ကလည်း မြန်မာ-တရုတ်နယ်စပ် ဟိုပန်မြို့နယ်အတွင်း ‘ဝ’တပ်ဖွဲ့ UWSA ထိန်းချုပ်ထားသည့် နမ့်တစ်မြို့ မန်ခါးနယ်စပ်ဂိတ်ကို တရုတ်နိုင်ငံဘက်မှ စတင်ပိတ်လိုက်ကာ ကုန်ပစ္စည်းသယ်ယူခွင့်ကို ကန့်သတ်လိုက်ကြောင်း ဒေသခံများက ပြောသည်။
ထို့အပြင် ‘ဝ’ဒေသရှိ ဆောဖားဂိတ်နှင့် ပန်ဆန်းဂိတ်ကြီးတို့တွင်လည်း စစ်ဆေးမှု တင်းကြပ်လာခြင်းကြောင့် ပြည်သူများအတွက် စားသောက်ကုန် တင်သွင်းရန် ခက်ခဲနေပြီး ဟိုပန်၊ ပန်လုံ၊ ပန်ဝိုင်နှင့် နမ့်တစ်ဒေသတို့တွင် ကုန်စည်စီးဆင်းမှု ရပ်တန့်နေကြောင်း သိရသည်။
အောက်တိုဘာလ ဒုတိယပတ်မှ စတင်ပြီး မြန်မာ-တရုတ်နယ်စပ်တလျှောက်ရှိ ညီနောင်မဟာမိတ် ထိန်းချုပ်ထားနိုင်သည့် နယ်စပ်ဂိတ်များအပြင် မူဆယ်နှင့် မိုင်းလားကဲ့သို့ စစ်ကောင်စီလက်အောက် နယ်စပ်ဂိတ်များကိုလည်း တရုတ်အာဏာပိုင်များမှ ပို့ကုန်သွင်းကုန် စစ်ဆေးတင်းကြပ်လျက်ရှိပြီး တရုတ်ဘက်မှ တင်သွင်းကုန်များ ပိတ်ဆို့ခံရမှု ရှိနေကြောင်း နယ်စပ်ကုန်သည်များက ပြောဆိုသည်။
Leave a Comments