မိုးရွာသွန်းမှု မြေပြိုမှုအရှိန်ကြောင့် မြေနီလမ်းသည် ရွှံ့နွံများနှင့် ပြည့်နှက်နေသည်။

အချို့နေရာတွင် မြေပြိုမှုများရှိသကဲ့သို့ အချို့နေရာတွင် လမ်းပြတ်တောက်ကာ သွားရလာရ ခက်ခဲနေပါတယ်။

ထိုနေရာသည် သျှမ်းပြည်တောင်ပိုင်း ကလောမြို့နှင့် (၁) နာရီခန့် ကားဖြင့် သွားလာရသော လွန်းထိုးကျေးရွာ၊‌ ညောင်ကုန်းကျေးရွာ နှင့် မိုင်းတောင်း ရွာ(၁) ၊ ရွာ (၂)တို့ ဖြစ်သည်။

ကလောမြို့နယ်သည် တကြိမ်တခါမျှ ရေကြီးမှု၊ မြေပြိုမှု မကြုံဖူးခဲ့ပေ။

ပြီးခဲ့သည့် စက်တင်ဘာ ဒုတိယပတ်တွင် မိုးသည်ထန်ရွာသွန်းပြီး တောင်ကျရေကြောင့် ထိုကျေးရွာများရှိ နေအိမ်များ၊ စာသင်ကျောင်းများနှင့် ဘုန်းကြီးကျောင်းများသည် ရွှံ့နွံများအောက် ဖုံးလွှမ်းပျောက်ကွယ်မှုကို ကြုံတွေ့နေရကြောင်း ရေဘေးသင့် သွားရောက်ကူညီသည့် အသက် (၃၅) နှစ်အရွယ် ကိုကျော်ကျော် က ပြန်ပြောပြသည်။

“ကျနော်တို့ ရောက်သွားတော့ အိမ်တွေ ကျောင်းတွေကို ရွှံ့နွံတွေ ဖုံးလွှမ်းနေတာ မြင်ရတယ်။ အရမ်းစိတ်မကောင်းဖြစ်မိတယ်။ အဲ့ရွာက အကူအညီ မရောက်ကြဘူး။ သွားရတာလည်း ခက်တယ်လေ”ဟု ကိုကျော်ကျော်က ဆိုသည်။

အဆိုပါကျေးရွာများသို့ အလှူရှင်များ လာရောက်မှု မရှိသဖြင့် သွားရောက်လှူဒါန်းချိန်တွင် ဒေသခံများ အပြေးအလွှား လာရောက်ကြိုဆိုပြီး ဝမ်းမြောက်ဝမ်းသာရှိကြောင်း ကိုကျော်ကျော်က ဆက်ပြောသည်။

“ရေဘေးသင့်တဲ့ လူတွေက ကျနော်တို့ကို ပြောတယ်။ ဒီဘက်ကို လာလှူချင်တဲ့ လူတွေရှိရင်တောင် မသွားရဲကြဘူး။ သွားရတာ တော်တော်ခက်တယ်။ မိုးရွာရင်တောင် လမ်းတွေဆိုးတော့ ကားတွေတောင် တက်လို့မရဘူး”ဟု ကိုကျော်ကျော်က ကြုံတွေ့လာသည့် အခြေအနေကို ပြောပြသည်။

လက်ရှိ ရေကြီးမြေပြိုမှုကြောင့် အလှူရှင်များ မရှိသဖြင့် အစစရာရာ နလံပြန်ထူရန် ခက်ခဲနေသကဲ့သို့ စားဝတ်နေရေးနှင့် သောက်သုံးရေအတွက်လည်း အရေးပေါ် လိုအပ်နေသေးကြောင်း သွားရောက်ကူညီလှူဒါန်းသည့် ကိုကျော်ကျော်က ပြောသည်။

“ကျန်းမာရေးအတွက် ရေက လိုအပ်တယ်။ ရေတွေမရှိ မသန့်ကြဘူး။ မိုးရေတွေ ခံသောက်နေကြတယ်။ မိုးရေလှောင်ထားတာပဲ သုံးကြတယ်။ ရေရှည်တော့ တော်တော်ခက်နိုင်တယ်။ နလံပြန်ထူဖို့ အိမ်တွေ ပြန်ဆောက်ဖို့က ပိုခက်မယ်”ဟု ၎င်းက ဆိုသည်။

မြေပြိုမှုကြောင့် အခက်အခဲ ဖြစ်နေသည့် အိမ်ခြေ ၅၀၀ ကျော် ရှိကြောင်း သိရသည်။

“အိမ်တွေက ခေါင်မိုးပဲ မြင်ရတယ်။ ပြန်ဖော်ဖို့လည်း ခက်တယ်။ နွံတွေက ပေ ၃၀ ဆိုတော့ ပြန်တူးဖော်ဖို့က ခက်တယ်” ဟု ကလောမြို့နယ် ဒေသခံ အမျိုးသားတစ်ဉီးက ပြောသည်။

လက်ရှိတွင် နေအိမ်များမှာ ပြန်လည်တည်ဆောက်ရန် ခက်ခဲနေသေးသဖြင့် ကျေးရွာအနီး တဝိုက်ရှိ တောင်ကပြင်တွင် မိုးကာတဲထိုးပြီး နေထိုင်ကြရသည်။

စစ်အာဏာသိမ်းပြီးနောက်ပိုင်း မြန်မာနိုင်ငံထဲမှ သစ်တောပြုန်းတီးမှု အများဆုံးသည် သျှမ်းပြည် ဖြစ်နေကြောင်း ကမ္ဘာ့သစ်တော စောင့်ကြည့်ရေးအဖွဲ့ (Global Forest Watch) က ထုတ်ပြန်ပြောဆိုထားသည်။