သျှမ်းပြည် ပင်လောင်းမြို့နယ်ရှိ စက်လှေဂိတ်တစ်ခုကို စစ်ကောင်စီတပ်က လေယာဉ်ဖြင့် ဗုံးကြဲတိုက်ခိုက်ခဲ့ကြောင်း စုံစမ်းသိရသည်။
ပင်လောင်းမြို့နယ်နှင့် ဖယ်ခုံမြို့နယ်ကြား ဆောင်လန်ကျေးရွာရှိ စက်လှေဂိတ်တစ်ခုကို စစ်ကောင်စီတပ်က အောက်တိုဘာလ ၂၀ ရက် နေ့လယ် ၁ နာရီဝန်းကျင်တွင် လေယာဉ်ဖြင့် ဗုံးကြဲတိုက်ခိုက်ခဲ့ခြင်းကြောင့် ဒေသခံများ ထွက်ပြေးတိမ်းရှောင်ရန် ပို၍ ခက်ခဲနေကြောင်း အသက် ၃၅ နှစ်ဝန်းကျင် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဗုံးကြဲခံရတဲ့နောက် စက်လှေတွေကတော့ မထွက်တော့ဘူး။ အရင်သူတို့ လာမကြဲတုန်းကတော့ တိုက်ပွဲငြိမ်ရင် စက်လှေတွေနဲ့ ပြေးကြတာ ရှိသေးတယ်။ ထွက်ပြေးဖို့က အဲ့တစ်လမ်းပဲ ကျန်တော့တာကို သူတို့က အခုလို ဗုံးလာကြဲသွားတော့ ပိုဆိုးသွားပြီ။ ဘယ်ဘက်ကို ပြေးကြရမလဲတောင် မသိတော့ဘူး”ဟု အသက် ၃၅ နှစ်ဝန်းကျင် ၎င်းဒေသခံ အမျိုးသားက ပြောသည်။
ထိုတိုက်ပွဲဖြစ်ပွားနေသည့် ကျေးရွာအပြင် အနီးအနား ကျေးရွာများရှိ ဒေသခံ ရာနှင့်ချီသည် ပြီးခဲ့သည့် စက်တင်ဘာလ နောက်ဆုံးပတ်မှ စ၍ ထွက်ပြေးတိမ်းရှောင်ရန် ခက်ခဲနေကြောင်း ၎င်းအမျိုးသားက ဆက်ပြောသည်။
ပင်လောင်းမြို့နယ်ရှိ နမ့်ဖာမူ၊ ပင်စုံ၊ လဲလောင်းနှင့် တက်တောင် စသည့် ကျေးရွာများတွင် စစ်ကောင်စီတပ်နှင့် ၎င်းလက်အောက်ခံ ပအိုဝ်းပြည်သူ့စစ် PNO တို့ ပူးပေါင်းပြီး ကရင်နီ တော်လှန်ရေး တပ်ပေါင်းစုတို့ နေ့စဉ် တိုက်ပွဲများ ပြင်းထန်နေကြောင်း သိရသည်။
ထို့ပြင် ပင်လောင်းမြို့နယ် ဗန်းမောက်ကျေးရွာရှိ ဒေသခံများကို ကရင်နီတော်လှန်ရေး တပ်ပေါင်းစုတို့က ထွက်ပြေးတိမ်းရှောင်ရန် ယနေ့ (အောက်တိုဘာလ ၂၃ ရက်) တွင် ပြောဆိုထားကြောင်း ဒေသခံများက ပြောသည်။
Leave a Comments