ရေကြီးမှုဒဏ် ဆိုးရွားစွာ ခံစားခဲ့ရသော သျှမ်းပြည်တောင်ပိုင်းတွင် နောက်ဆက်တွဲအဖြစ် ကုန်စိမ်းဈေးနှုန်း ထပ်မံမြင့်တက်လျက်ရှိကြောင်း စုံစမ်းသိရှိသည်။

စက်တင်ဘာလ ပထမအပတ်အတွင်း မိုးသည်းထန်စွာ ရွာသွန်းခဲ့ပြီးနောက် သျှမ်းပြည်တောင်ပိုင်းတွင် နေရာအနှံ့ ရေကြီးရေလျှံမှုများ ဖြစ်ပေါ်ခဲ့ပြီး လယ်ယာစိုက်ခင်းများ၊ သီးနှံစိုက်ခင်းများစွာ ပျက်စီးခဲ့ပြီးနောက် လက်ရှိတွင် ကုန်စိမ်းပစ္စည်း ဈေးနှုန်းများ အဆမတန် မြင့်တက်လာကြောင်း အောင်ပန်းမြို့ ကုန်စိမ်းပွဲရုံ လုပ်ကိုင်သူတစ်ဦးက သျှမ်းသံတော်ဆင့်သို့ ပြောသည်။

“ခရမ်းချဉ်သီးက ဈေးမရလို့ လမ်းဘေးမှာ ပစ်နေရတဲ့ အခြေအနေကနေ အခု အင်းလေးဘက်က ခရမ်းချဉ်သီးက လုံးဝပြတ်သွားတော့ ရွာငံဘက်ဝင်တဲ့ အသီးတွေပဲ ရှိတော့တယ်။ ဈေးတွေက အရင်က မကြားဖူးတဲ့ ဈေးတွေဖြစ်သွားပြီ”ဟု ၎င်းကုန်စိမ်းပွဲရုံမှ အမျိုးသားက ပြောသည်။

ခရမ်းချဉ်သီး ဈေးနှုန်းများမှာ တစ်ပိဿာလျှင် ယခင် (၄၀၀၀) ကျပ်တန်များက (၈၀၀၀) ကျပ် အထိ မြင့်တက်သွားခဲ့ပြီး အာလူး၊ ဂေါ်ဖီထုပ်၊ မုန်လာပန်းပွင့်၊ ဘိုစားပဲနှင့် မုန်ညှင်းကဲ့သို့ စားသုံးကုန် သီးနှံများပါ ဈေးနှစ်ဆကျော် မြင့်တက်သွားခြင်းဖြစ်သည်။

ယခင်က မုန်ညှင်းတစ်ပိဿာလျှင် (၁၅၀၀)ကျပ်ခန့် ရှိခဲ့ရာမှ ယခု (၇၀၀၀)ကျပ် အထိ ဈေးမြင့်တက်သွားကြောင်း အောင်ပန်းကုန်စိမ်းပွဲရုံ အသိုင်းအဝိုင်းထံမှ သိရသည်။

မြန်မာတစ်နိုင်ငံလုံးသို့ တင်ပို့နေသော ခရမ်းချဉ်သီး အများစုမှာ အင်းလေးဒေသမှ ဖြစ်ပြီး လက်ရှိတွင် ရေကြီးမှု ဒဏ်ကြောင့် ခရမ်းချဉ်သီး စိုက်ခင်း အားလုံးနီးပါး ပျက်စီးဆုံးရှုံးသွားခဲ့ကာ တောင်သူများမှာလည်း ပြန်လည် စိုက်ပျိုးရန် အခက်အခဲများစွာ ရှိနေကြောင်း ခရမ်းချဉ်သီး စိုက်ပျိုးသည့် တောင်သူတစ်ဦးက ပြောသည်။

“ပုံမှန်ရေတက်ရင်တော့ ကျွန်းမျောနဲ့ စိုက်တာဆိုတော့ ရေတက်လည်း လိုက်တက်သွားတယ်၊ ခုက လေပါတိုက်တော့ ကျွန်းမျောတွေ အကုန်မျှောပါသွားတာ ရတာလည်း ပြန်ရတယ်၊ တချို့ကတော့ အကုန်ပျက်သွားတယ်”ဟု ၎င်းတောင်သူ အမျိုးသမီးက သျှမ်းသံတော်ဆင့်ကို ပြောသည်။

အင်းလေးဒေသတွင် ခရမ်းချဉ်သီးပင်ကို တန်ခူးလ ရှေ့တစ်ကြိမ်၊ သီတင်းကျွတ်လ ရှေ့တစ်ကြိမ် တစ်နှစ်လျှင် နှစ်ကြိမ် စိုက်ပျိုးလေ့ရှိပြီး ယခုနှစ် သီတင်းကျွတ်ရှေ့တွင် စိုက်ပျိုးထားသည့် ခရမ်းချဉ်သီး စိုက်ခင်းများအားလုံး ပျက်စီးသွားကြောင်း ၎င်းအမျိုးသမီးက ဆက်ပြောသည်။

တောင်သူများမှာလည်း မြေဩဇာဈေးနှုန်းများ ထပ်မံမြင့်တက်လာမှုကြောင့်လည်း လက်ရှိတွင် ပြန်လည် စိုက်ပျိုးရန်အတွက် မလွယ်ကူသေးကြောင်း သိရသည်။

အင်းလေးကန်တွင် ရေအနည်းငယ် ပြန်လည်ကျဆင်းသွားပြီ ဖြစ်သော်လည်း ဒေသခံအများစုမှာ နေအိမ်ပျက်စီးမှုများကြောင့် တစ်လကျော်ကြာသည်အထိ ဘုန်းကြီးကျောင်းများတွင် ဆက်လက်နေထိုင်နေရကြောင်း ဒေသခံတစ်ဦးကပြောသည်။

ရေဘေးဒဏ်ကြောင့် သျှမ်းပြည်တောင်ပိုင်း ညောင်ရွှေ၊ အင်းလေးဒေသ၊ ကလော၊ ပုန်းအင်းဒေသများသည် ထိခိုက်မှုအများ ဆုံးဖြစ်ခဲ့ပြီး အကူအညီများ လိုအပ်နေဆဲဖြစ်ကြောင်း သိရသည်။

သျှမ်းပြည်တောင်ပိုင်းသည် သျှမ်းပြည်မြောက်ပိုင်းကဲ့သို့ စစ်ရေးအခြေအနေ ပြင်းထန်မှုမရှိသော်လည်း ရေဘေးဒဏ် ပြင်းထန်စွာ ခံစားခဲ့ရပြီး‌ စိုက်ပျိုးရေးလုပ်ကိုင်သော တောင်သူများ၊ အခြေခံလူတန်းစားများအတွက် ကြီးမားသော သက်ရောက်မှုများလည်း ဆက်တိုက်ကြုံတွေ့လာရလျက် ရှိသည်။

အလုပ်သင်သတင်းထောက် ယူဂျင်း ရေးသားသည်။