သျှမ်းပြည် ပင်လောင်းမြို့နယ်တွင် စစ်ကောင်စီက ၃ ရက်ဆက်တိုက် လေကြောင်းဖြင့် ဗုံးကြဲတိုက်ခိုက်ခဲ့ပြီး တိုက်ပွဲများ ဆက်လက်ပြင်းထန်နေကြောင်း စုံစမ်းသိရသည်။
ပင်လောင်းမြို့နယ်ရှိ နမ့်ဖာမူ၊ ပင်စုံ၊ လဲလောင်းနှင့် တက်တောင် စသည့် ကျေးရွာများတွင် စစ်ကောင်စီ၊ ၎င်းလက်အောက်ခံ ပအိုဝ်းပြည်သူ့စစ် PNO တို့ ပူးပေါင်းပြီး ကရင်နီ တော်လှန်ရေး တပ်ပေါင်းစုတို့ နေ့စဉ် တိုက်ပွဲများ ပြင်းထန်နေကြောင်း ဒေသခံများက ပြောသည်။
ထိုတိုက်ပွဲများပြင်းထန်နေသည့်အတွက် ပင်စုံ နှင့် နမ့်ဖာမူကျေးရွာကို စစ်ကောင်စီက ပြီးခဲ့သည့် (အောက်တိုဘာ ၁၉ ရက်) မှ ယမန်နေ့ (အောက်တိုဘာ ၂၁ ရက်) ထိ လေကြောင်းဖြင့် ၃ ရက်ဆက်တိုက်ဗုံးကြဲတိုက်ခိုက်ခဲ့ ကြောင်း အသက် ၃၅ ဝန်းကျင် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီ ၃ ရက် အတွင်းက တိုက်ပွဲတွေပြင်းနေတော့ စစ်ကောင်စီက လေယာဉ်တွေနဲ့ ပါလာကူပစ်နေတာ။သူတို့က ၁၉ ရက်နေ့က မနက်တကြိမ် ညတကြိမ်၊၂၀ ရက်ကျတော့ ညနေပိုင်းရယ်၊၂၁ ရက်နေ့ကတော့ နေ့လည်မှာ လေယာဉ် နဲ့ ဗုံးကြဲသွားတာ။လက်နက်ကြီတွေနဲ့ကလည်း ပစ်တယ်၊တိုက်ပွဲတွေပြင်းရင် သူတို့က လာလာပစ်ကူ တယ် ”ဟု အသက် ၃၅ ဝန်းကျင် ဒေသခံအမျိုးသားတစ်ဦးက ပြောသည်။
တိုက်ပွဲများပြင်းထန်နေသည့်အတွက်ကြောင့် ပိတ်မိနေသည့် ဒေသခံများကျန်ရှိနေပြီး ထွက်ပြေးတိမ်းရှောင်ရန် လည်း စစ်ကောင်စီလက်အောက်ခံ ပအိုဝ်းပြည်သူ့စစ်တို့က မိုဦးကျေးရွာတွင် လမ်းများပိတ်ထားကြောင်း အသက် ၃၅ ဝန်းကျင် ဒေသခံအမျိုးသားတစ်ဦးက ဆက်ပြောသည်။
“မနေ့က(အောက်တိုဘာ ၂၁ ရက်) ပြန်တယ်။ပိတ်မိနေတဲ့ မိသားစုကို ပြန်ခေါ်မလို့။လမ်းတစ်ဝက်ရောက်တော့ သူတို့ကလမ်းတွေ ပိတ်ထားတာ အဲ့တော့ ပြန်လှည့်လာရတာ။ပြည်သူ့စစ်တွေက တိုက်ပွဲတွေဖြစ်နေတယ်လို့ ပြောပြီးတော့ ဆက်ပြီး ပေးမသွားတာ။”ဟု အသက် ၃၅ ဝန်းကျင် ဒေသခံအမျိုးသားတစ်ဦးက ပြောသည်။
ထိုတိုက်ပွဲဖြစ်ပွားနေသည့် ကျေးရွာအပြင် အနီးအနား ကျေးရွာရှိ ဒေသခံရာနှင့်ချီသည် ပြီးခဲ့သည့် အောက်တို ဘာလ နောက်ဆုံးပတ်တွင် စ၍ ထွက်ပြေးတိမ်းရှောင်ရန်ခက်ခဲနေကြပြီး ရေရှည် စားနပ်ရိက္ခာများအတွက် စိုးရိမ်နေရကြောင်း အသက် ၃၅ ဝန်းကျင် ဒေသခံအမျိုးသားတစ်ဦးက ဆက်ပြောသည်။
“အမျိုးမျိုးစိုးရိမ်နေရတယ် သူတို့ကလက်နက်ကြီးတွေ၊လေယာဉ်တွေနဲ့ဆိုတော့လေ။အခုကလည်း ထွက်ပြေးဖို့ ရေကြောင်းကုန်ကြောင်း လည်းမရတော့ပိုဆိုးတယ်။တစ်လကျော်ကြာပိတ်မိနေတာဆိုတော့ စားသောက်ဖို့က လည်း စိုးရိမ်လာရတယ်။သွားဝယ်လို့လည်းမရ ထွက်လည်းပေးမထွက်လိုဘူး သူတို့တွေက လာပြောထားတော့ ဘယ်သူမှ ဘယ်ကို သိပ်မသွားရဲဘူး။ရှေ့လျှောက်အတွက် စဉ်းစားရတောင်ခက်တယ်”ဟု ၎င်းက ပြောသည်။
ပင်လောင်းမြို့နယ်တွင် စစ်ကောင်စီမှ တဖက်သတ်လက်နက်ကြီးဖြင့် ပစ်ခတ်ပြီးနောက် ထိုစစ်ဆင်ကာ စက်တင်ဘာလ နောက်ဆုံးပတ်မှ စတင်၍ စစ်ကောင်စီ၊ ၎င်းလက်အောက်ခံ ပအိုဝ်းပြည်သူ့စစ် PNO တို့ ပူးပေါင်းပြီး ကရင်နီ တော်လှန်ရေး တပ်ပေါင်းစု တို့နှင့် တိုက်ပွဲများ ဖြစ်ပွားခဲ့သည်။
ထိုတိုက်ပွဲဖြစ်ပွားနေသော ကျေးရွာများသည် ပင်လောင်းမြို့နှင့် မိုင် ၂၇ ကျော် ကွာဝေးကြောင်းသိရသည်။
အဆိုပါတိုက်ပွဲဖြစ်ပွားနေသည့် ကျေးရွာများမှ ဒေသခံများသည် ညောင်ရွှေမြို့နယ် နှင့် ပင်လောင်းမြို့အတွင်း သို့ ပြီးခဲ့သည့် စက်တင်ဘာလ နောက်ဆုံးပတ်မှစတင်၍ ထွက်ပြေး တိမ်းရှောင်ခဲ့ရကြောင်း သိရသည်။
ပင်လောင်းမြို့မှ ညောင်ရွှေမြို့သို့ သွားသော လမ်းတကြောရှိ နောင်ပီနှင့် တပ်ဦးမုတ်ကျေးရွာတို့တွင် စစ်ကောင်စီဂိတ်နှင့် ပအိုဝ်းပြည်သူ့စစ် စစ်ဆေးရေးဂိတ် နှစ်ခုရှိပြီး စစ်ဆေးမှုများ ပို၍ တင်းကြပ်နေကြောင်း သိရသည်။
Leave a Comments