သျှမ်းပြည် ကွမ်းလုံနှင့် ဟိုပန်မြို့အကြားရှိ နမ့်ဟူးကျေးရွာကို စစ်ကောင်စီတပ်က လေကြောင်းဗုံးကြဲ တိုက်ခိုက်မှုကြောင့် နေအိမ်ပျက်စီးပြီး ပြည်သူများ စိုးရိမ်ထိတ်လန့်နေကြောင်း စုံစမ်းသိရသည်။
ယနေ့ (အောက်တိုဘာလ ၂၀ ရက်) နံနက်အစောပိုင်း ၁ နာရီခန့်တွင် ကိုးကန့်တပ်ဖွဲ့ MNDAA ထိန်းချုပ်ထားသည့် ကွမ်းလုံနှင့် ဟိုပန်မြို့အကြားရှိ နမ့်ဟူးကျေးရွာသို့ စစ်ကောင်စီတပ်မှ လေကြောင်းဖြင့် ဗုံး(၁) လုံး ကြဲချတိုက်ခိုက်ခဲ့ရာ နမ့်ဟူးဘုန်းကြီးကျောင်းအနီး ကျရောက်ပေါက်ကွဲပြီး ပြည်သူနေအိမ်(၅)လုံးထက်မနည်း ထိခိုက်ပျက်စီးခဲ့ကြောင်း ဒေသခံများက ပြောသည်။
“လူအိပ်ချိန် ဘုန်းကြီးကျောင်းနားက တရုတ်အိမ်ကို ဗုံးမှန်တာ၊ လူတော့မထိဘူး။ အိမ်ရှင်က တခြားနေရာ သွားအိပ်လို့ ဘာမှမဖြစ်လိုက်ဘူး။ အသံက ဟိုပန်ဘက်ထိလည်း အကျယ်ကြီး ကြားရတော့ အကုန်လန့်နေကြတယ်။ ဟိုပန်နဲ့ နမ့်ဟူးက ဖောင်ဆိပ်တံတားပဲ ခြားတာ”ဟု ကွမ်းလုံဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကိုးကန့်တပ်ဖွဲ့ MNDAA သည် ၎င်းထိန်းချုပ်ရာ အထူးဒေသ(၁) သို့ ဖြတ်ငါးဖြတ် လုပ်ဆောင်ရန် တရုတ်အာဏာပိုင်များနှင့် ‘ဝ’တပ်ဖွဲ့ UWSA ထံမှ ဖိအားများနှင့် ရင်ဆိုင်နေရစဉ် သိန္နီမြို့နှင့် လောက်ကိုင်မြို့အပြင် ကွမ်းလုံမြို့တို့တွင် စစ်ကောင်စီတပ်သည် လေကြောင်းဖြင့် ထပ်မံဗုံးကြဲ တိုက်ခိုက်လာခြင်း ဖြစ်သည်။
ယခု လေကြောင်းဗုံးကြဲတိုက်ခိုက်ခံရသည့် ကွမ်းလုံမြို့နယ်အတွင်းရှိ နမ့်ဟူးရွာသည် “၁၀၂၇ စစ်ဆင်ရေး”အတွင်း ညီနောင်မဟာမိတ်များ သိမ်းပိုက်ပြီး ‘ဝ’တပ်ဖွဲ့ UWSA ထံ လွှဲပြောင်းပေးခဲ့သည့် ဟိုပန်မြို့နှင့် ဖောင်ဆိပ်တံတားသာ ခြားပြီး ကိုးကန့်ဒေသအတွင်း ကုန်ပစ္စည်းသယ်ယူနိုင်ရန် အရေးပါသည့် နေရာဖြစ်ကြောင်း ဒေသခံများထံမှ သိရသည်။
မြန်မာ-တရုတ် နယ်စပ်တလျှောက်ရှိ ကိုးကန့်တပ်ဖွဲ့ MNDAA ထိန်းချုပ်ထားသည့် နယ်စပ်ဂိတ်များကို တရုတ်အာဏာပိုင်များဘက်မှ ပိတ်ပင်ထားပြီး စက်တင်ဘာလမှ စတင်၍ လောက်ကိုင်၊ ချင်းရွှေဟော်၊ ကွမ်းလုံနှင့် သိန္နီမြို့များသို့ တရုတ်ဘက်နှင့် ‘ဝ’ဒေသဘက်မှ ကုန်ပစ္စည်း သယ်ဆောင်ခွင့် မရခြင်းကြောင်း ရိက္ခာပြတ်လပ်မှုနှင့် ရင်ဆိုင်ရမည်ကို စိုးရိမ်နေကြောင်း ဒေသခံများက ပြောသည်။
အလားတူ ယမန်နေ့ (အောက်တိုဘာလ ၁၉ ရက်) နံနက်အစောပိုင်း လူအိပ်မောကျချိန်တွင်လည်း လောက်ကိုင်မြို့ တုံချိန်ရပ်ကွက်အတွင်း စစ်ကောင်စီတပ်မှ လေကြောင်းဖြင့် ပေါင် (၅၀၀) ဗုံးများ ကြဲချတိုက်ခိုက်ခဲ့ရာ (၃၁၁) ပန်းခြံအနီး ကျရောက်ပေါက်ကွဲခဲ့ပြီး နေအိမ်နှင့် ဆိုင်ခန်းများစွာ ထိခိုက်ပျက်စီးခဲ့ကြောင်း ဒေသခံများထံမှ သိရသည်။
Leave a Comments