သျှမ်းပြည်မြောက်ပိုင်း နောင်ချိုမြို့ပေါ်သို့ သီတင်းကျွတ်လပြည့်ညတွင် စစ်ကောင်စီတပ်က လေကြောင်းဖြင့် အပြင်းအထန် ဗုံးကြဲတိုက်ခိုက်ခဲ့ကြောင်း စုံစမ်းသိရသည်။
ယမန်နေ့ (အောက်တိုဘာလ ၁၇ ရက်) ည ၁၀ နာရီခန့်မှ စတင်ပြီး ယနေ့ (အောက်တိုဘာ ၁၈ ရက်) နံနက် ၁ နာရီကျော် အချိန်ထိ စစ်ကောင်စီတပ်က တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် PDF ပူးပေါင်းတပ်ဖွဲ့တို့ ထိန်းချုပ်ထားသည့် နောင်ချိုမြို့ပေါ် လူနေရပ်ကွက်များအတွင်း လေကြောင်းဖြင့် အပြင်းအထန် ဗုံးကြဲ တိုက်ခိုက်ခဲ့ကြောင်း နောင်ချိုမြို့ ဒေသခံများက ပြောသည်။
“မနေ့က TNLA တွေက သီတင်းကျွတ်ညဆိုတော့ ပွဲတွေလုပ်နေကြတာနေမှာ၊ ၁၀ နာရီထိုးခါနီး ဗုံးမကြဲခင်ထိတော့ သီချင်းသံတွေ ဆူညံနေသေးတယ်။ ၁၀ နာရီလောက်မှာ မြို့ထဲကို လေယာဉ်နဲ့ ဗုံးကြဲတာနဲ့ လမ်းပေါ်မှာ ဆိုင်ကယ်သံတွေ ကားသံတွေ ဆူညံသွားတယ်။ မနက် ၁ နာရီလောက် ဗုံးထပ်ကြဲတဲ့အချိန်တော့ ကျမတို့ အိမ်နဲ့နီးတယ်” ဟု နောင်ချိုမြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
လေကြောင်း ဗုံးကြဲတိုက်ခိုက်မှုအတွင်း နောင်ချိုမြို့ပေါ်ရှိ စံတော်သစ် စားသောက်ဆိုင်၊ နောင်ချိုမြို့ ထွေ/အုပ်ရုံး၊ စာရင်းစစ်ရုံး၊ မြို့မရဲစခန်းနှင့် မြို့ဝင် စစ်ဆေးရေးဂိတ် အနီးတစ်ဝိုက်တို့ကို စစ်ကောင်စီက ဗုံးကြဲတိုက်ခိုက်ခဲ့ခြင်းကြောင့် ပြည်သူနေအိမ်များစွာ ထိခိုက်ပျက်စီးခဲ့ပြီး လူသေဆုံးဒဏ်ရာရမှု ရှိနိုင်ကြောင်း ကနဦး သိရသည်။
လတ်တလောတွင် စစ်ကောင်စီတပ်မှ လေကြောင်းဖြင့် ပစ်မှတ်နေရာ အတိအကျ လာရောက်ဗုံးကြဲချခြင်းသည် ဒေသတွင်းမှ စစ်ကောင်စီကို သတင်းအချက်အလက် ပေးပို့မှုကြောင့် ယခုကဲ့သို့ လာရောက်ဗုံးကြဲခြင်းဖြစ်ကြောင်း ဒေသခံပြည်သူများက သုံးသပ်ယူဆနေကြောင်း ဆိုသည်။
နောင်ချိုမြို့ကို လေကြောင်းဗုံးကြဲချသော စစ်ကောင်စီတပ်၏ လေယာဉ်များမှာ တံတားဦးလေတပ်နှင့် ရှမ်းတဲလေတပ်မှ လေယာဉ်များဖြစ်ကြောင်း လေကြောင်းကင်းထောက် NAS က ရေးသားဖော်ပြထားသည်။
Leave a Comments