သျှမ်းပြည်တောင်ပိုင်း တောင်ကြီးမြို့တွင် လျှပ်စစ်မီတာခ နှစ်ဆတိုး ကောက်ခံမှုကြောင့် လျှပ်စစ်မီးအစား မီးသွေးနှင့် ထင်းကို အစားထိုး ပိုမိုအသုံးပြုလာကြကြောင်း ဒေသခံများထံမှ စုံစမ်းသိရသည်။

ပြီးခဲ့သည့် စက်တင်ဘာလ (၁) ရက်နေ့မှ စတင်ပြီး စစ်ကောင်စီလက်အောက်ခံ လျှပ်စစ်စွမ်းအားဝန်ကြီးဌာနမှ လျှပ်စစ်မီတာခကို ယခင်ကာလတွင် တစ်ယူနစ် ကျပ် (၃၀) မှ လက်ရှိ တစ်ယူနစ် (၅၀) ကျပ်အထိ တိုးမြှင့်ကောက်ခံကြောင်း ကြေညာခဲ့သည်။

ထိုသို့ မီတာခ တိုးမြှင့်ကောက်ခံခြင်းကြောင့် တောင်ကြီး ဒေသခံများသည် လျှပ်စစ်မီး ပုံမှန်မလာသော်လည်း မီတာခ စျေးတက်သဖြင့် လျှပ်စစ်မီး အစား ထင်းနှင့် မီးသွေးကို ပိုမိုအသုံးပြုလာကြောင်း ဒေသခံများက ပြောသည်။

“လျှပ်စစ်မီးကျတော့ သူများနိုင်ငံကို ရောင်းစားပြီး ပြည်သူတွေကိုကျ မီးပုံမှန်မပေးနိုင်ဘူး။ အခုဟာက မီးကလည်း ပုံမှန်မရဘဲ မီတာခကို စျေးကြီးပေး ဆောင်နေရတယ်။ အရင်တုန်းက အိမ်သုံးဖို့ကို တစ်သောင်းလောက်ပဲ ကျတယ်။ အခုက လေးသောင်းတဲ့ တခါမှ မကြားဖူးဘူး။ လျှပ်စစ်မီးကို အားသွင်းဖို့ပဲ ထားတော့တယ်။ ထင်းတွေ မီးသွေးတွေပဲ အရင်လို အသုံးပြုတော့မလို့”ဟု တောင်ကြီးဒေသခံ အမျိုးသမီးတစ်ဉီးက သျှမ်းသံတော်ဆင့်ကို ပြောသည်။

လျှပ်စစ်မီတာခ စျေးတက်ခြင်းကြောင့် တစ်လစာ သတ်မှတ်ထားသည့် အသုံးစရိတ်ကို လျှော့ချကာ မီတာခအတွက် ပိုမိုပေးဆောင်ရခြင်းကြောင့် အဆင်မပြေမှုဖြစ်ကာ ပိုမိုခက်ခဲလာသည်ဟု ၎င်းအမျိုးသမီးက ထပ်ဆင့်ပြောသည်။

ထို့အပြင် လျှပ်စစ်မီးကို အဓိကထား အသုံးပြုပြီး ကွန်ပျူတာ သင်တန်းကျောင်း ဖွင့်လှစ်ထားသည့် သင်တန်းများမှာ ကောက်ခံသည့် သင်တန်းကြေး၊ လျှပ်စစ်မီတာခနှင့် ဝင်ငွေထွက်ငွေ မမျှတကြောင်း ပြောဆိုသည်။

“သင်တန်းကလည်း ဖွင့်ထားသေးတယ်။ မီတာခက နှစ်ဆကောက်တော့ ကိုယ့်လုပ်အားခတောင် သိပ်မကျန်ဘူး။ အရင်ဆို အလွန်ဆုံး ၄သောင်း ဝန်းကျင်ပဲ ကုန်တာ၊ အခုက နှစ်သိန်းနီးပါးတဲ့။ လန့်တောင်လန့်တယ် မီတာခနဲ့။ ထမင်းဟင်း ချက်စားဖို့တောင် မီးသွေးဝယ်ထားရတယ်”ဟု တောင်ကြီးတွင် ကွန်ပျူတာသင်တန်း ဖွင့်ထားသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

ယခုကဲ့သို့ လျှပ်စစ်မီးအစားထိုး ထင်းနှင့် မီးသွေးကို ပြန်လည်အသုံးပြုလာခြင်းကြောင့် သစ်တောပြုန်းတီးမှု ပိုမိုများပြားလာနိုင်ပြီး သဘာဝဘေးအန္တရာယ်ဖြစ်သည့် ရေကြီး၊ မြေပြို မိုးသည်းထန်စွာ ရွာသွန်းမှု ပိုမိုဖြစ်ပွားလာနိုင်ကြောင်း အဆိုပါ အမျိုးသားက ဆက်ပြောသည်။

ထို့ကြောင့် ထင်းနှင့်မီးသွေးအပြင် ဂတ်စ်နှင့် ပါဝါပန့်များ ပို၍ ရောင်းအားကောင်းလာနိုင်သည် ဟုလည်း ဒေသခံများက သုံးသပ်ပြောဆိုသည်။

အလုပ်သင် သတင်းထောက် နန်းလရောင် ရေးသားသည်။