သျှမ်းပြည်မြောက်ပိုင်း နမ့်ခမ်းမြို့ရှိ နေအိမ်တစ်အိမ်ထဲသို့ အမည်မသိ လက်နက်ကိုင်များမှ လက်ပစ်ဗုံး လာရောက်ပစ်သွားခဲ့ပြီး ပေါက်ကွဲမှုဖြစ်ပွားခဲ့ကြောင်း စုံစမ်း သိရသည်။
ယနေ့ (အောက်တိုဘာလ ၁၈ ရက်) နံနက် ၈ နာရီခွဲခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့ပေါ် အောင်မေတ္တာရပ်ကွက်ရှိ တရုတ်လူမျိုး နေအိမ်တစ်အိမ်ကို အမည်မသိ လက်နက်ကိုင်မှ ဆိုင်ကယ်တစ်စီးဖြင့် မောင်းနှင်လာပြီး နေအိမ်ထဲသို့ လက်ပစ်ဗုံး ပစ်ထည့်သွားကြောင်း ဒေသခံ အမျိုးသားတစ်ဦးက ပြောသည်။
“ဒီမနက် ၈နာရီခွဲမှာ ဆိုင်ကယ်တစ်စီးနဲ့ တရုတ်နေအိမ်ကို ဗုံးနဲ့ပစ်သွားတယ်။ ပေါက်ကွဲပြီးတော့ အိမ်ထဲနဲ့ ကားကို မှန်သွားတယ်၊ လူထိခိုက်တာတော့ မရှိဘူး။ အချင်းချင်း ရန်ငြိုးရှိလို့နေမယ်။ အဲ့ဒီအိမ်က အရင်က ပြည်သူစစ်ခေါင်းဆောင် လုပ်ခဲ့တဲ့ တရုတ်အိမ်။ အရင်ကတည်းက အခဲမကြေလို့များလား မသိဘူး”ဟု ၎င်းဒေသခံ အမျိုးသားက သျှမ်းသံတော်ဆင့်ကို ပြောသည်။
၎င်းဗုံးပေါက်ကွဲမှုကြောင့် နေအိမ်နှင့် ကားတို့ ထိမှန်ပျက်စီးခဲ့သော်လည်း လူထိခိုက်မှု မရှိကြောင်း သိရသည်။
ထိုဗုံးလာပစ်ခံရသည့် နေအိမ်သည် ယခင်က ပြည်သူစစ်ခေါင်းဆောင်အနေဖြင့် ပါဝင်လှုပ်ရှားဖူးကြောင်း သိရပြီး ဗုံးပေါက်ကွဲမှု ဖြစ်ပွားပြီးသည့်နောက် TNLA တပ်ဖွဲ့က မြို့တွင်းနှင့် အရှေ့ဘက်လမ်းများကို ပိတ်ဆို့ထားသည်ဟု ဒေသခံများက ပြောဆိုသည်။
“ဗုံးပေါက်ပြီးတဲ့နောက် TNLA တပ်တွေလည်း မြို့ထဲနဲ့ မြို့အရှေ့ဘက်လမ်းတွေကို ပိတ်ထားတယ်။ ဒီလိုတွေဖြစ်တော့ ပြည်သူတွေက လန့်တာပေါ့။ စစ်ကောင်စီပဲ ဗုံးလာကြဲတာလားဆိုပြီး ကြောက်နေကြတယ်”ဟု အသက် ၄၀ အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
နမ့်ခမ်းမြို့တွင် ရှေ့လ အောက်တိုဘာလ ၆ ရက်တွင် လူအိပ်မောကျချိန် စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ပြီး အရပ်သား (၁၀) ဉီးထက်မနည်း သေဆုံးကာ နေအိမ်အများအပြား ထိခိုက်ပျက်စီးခဲ့သည်။
ထို့နောက် နမ့်ခမ်းပြည်သူအများစုသည် စစ်ကောင်စီတပ် ထပ်မံလေကြောင်းဗုံးကြဲလာမည်ကို စိုးရိမ်သဖြင့် ဘေးလွတ်ကင်းသည့် အခြားနယ်မြေသို့ ထပ်မံပြောင်းရွှေ့နေသကဲ့သို့ ကုန်စည်ကူးသန်း ရောင်းဝယ်ကြသော ကုန်သည်များလည်း နမ့်ခမ်းမြို့သို့ အဝင်နည်းလာကြောင်း ဒေသခံများက ဆိုသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments