စစ်ကောင်စီအနေဖြင့် လက်နက်ကိုင်တောင်းဆိုမှုတွေအပေါ် လိုက်လျောဖြေရှင်းပေးသွားမည်မဟုတ်ကြောင်း စစ်အာဏာသိမ်း ဗိုလ်ချုပ်မှူးကြီး မင်းအောင်လှိုင်က ပြောကြားလိုက်သည်။

ယနေ့ (အောက်တိုဘာလ ၁၅ ရက်နေ့)တွင် ကျရောက်သည့် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးစာချုပ် (NCA) ၉ နှစ်မြောက်နှစ်ပတ်လည် မိန့်ခွန်းတွင် ယင်းကဲ့သို့ ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ခြင်း ဖြစ်သည်။

၎င်းက “နိဂုံးချုပ်အနေနဲ့ပြောရရင် လက်နက်ကိုင်အကြမ်းဖက်နည်းနဲ့ မိမိတို့လိုလားချက်ကို တောင်းဆိုလို့မရဘဲ နိုင်ငံရေးစားပွဲဝိုင်းကို ရောက်လာပြီး ငြိမ်းချမ်းစွာဖြေရှင်းခြင်းနည်းနဲ့သာ ပဋိပက္ခတွေကို ပြေလည်စေမှာ ဖြစ်ပါတယ်။ ကျနော်အနေနဲ့ လက်နက်ကိုင်အကြမ်းဖက်တောင်းဆိုမှုတွေအပေါ် လိုက်လျောဖြေရှင်းပေးသွား မှာမဟုတ်ဘူးဆိုတာ ပြောကြားလိုပါတယ်” ဟု ပြောခဲ့သည်။

ထို့အပြင် စစ်ကောင်စီတပ်ဖွဲ့အနေဖြင့် အကြမ်းသောင်းကျန်သူတွေကို ဆက်နိမ်နင်းမည်ဖြစ်ကြောင်း၊ ပြည်သူများအနေဖြင့် အကြမ်းဖမ်းသမားများ၏ အသုံးချမှုမခံရအောင် သတိပြကြရန်လည်း ထပ်မံအသိပေးလိုက်သည်ဟု စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ထည့်သွင်းပြောဆိုထားသည်။

၂၀၂၁ ခုနှစ်မှာ စစ်ကောင်စီက အရပ်သားအစိုးရကိုဖြုတ်ချပြီး အာဏာသိမ်းယူပြီးကတည်းက ၎င်းတို့ ဆန့်ကျင်တော်လှန် တိုက်ခိုက်နေသူမှန်သမျှကို “အကြမ်းဖက် သောင်းကျန်သူ” ဟုနာမည်တပ်ပြီး စစ်ကောင်စီက ဖမ်းဆီးသတ်ဖြတ်နေခြင်းပင် ဖြစ်သည်။

ထို့အတူ သျှမ်းပြည်မြောက်ပိုင်းမှာ “၁၀၂၇ စစ်ဆင်ရေး” ဖော်ဆောင်ပြီး စစ်တပ်စခန်းပေါင်းများစွာကို သိမ်းယူထားသည့် ညီနောင်မဟာမိတ်သုံးဖွဲ့သည့် TNLA၊ MNDAA နှင့် AA တို့ကို စစ်ကောင်စီက အကြမ်းဖက်တပ်ဖွဲ့တွေအဖြစ် သတ်မှတ်ထားပြီး၊ ၎င်းတို့ထိန်းချုပ်ထားရာဒေသများကို လေကြောင်းဖြင့် စဉ်ဆက်မပြတ် ဗုံးကြဲတိုက်ခိုက်နေလျက်ရှိသည်။

စစ်ကောင်စီ၏ လေကြောင်းတိုက်ခိုက်မှုကြောင့် သျှမ်းပြည်မြောက်ပိုင်းတွင် တစ်လအတွင်း အရပ်သား ၅၅ ဦးသေဆုံးခဲ့ရကြောင်း သျှမ်းအခွင့်အရေးမဏ္ဍိုင်ကလည်း ထုတ်ပြန်ထားသည်။

ထိုသို့ အကြမ်းဖက်စွာလုပ်ရပ်များကို ကျူးလွန်နေသည့် စစ်ကောင်စီက ယခုတစ်ခါတွင် တိုင်းရင်းသားလက်နက်ကိုင်တပ်ဖွဲ့များအနေဖြင့် တွေ့ဆုံဆွေးနွေးကြဖို့၊ တောင်းဆိုကြဖို့ တိုက်တွန်းကြောင်း ကမ်းလှမ်းလာသည်။

ငြိမ်းချမ်းရေးနှင့် ပတ်သက်၍ NCA လမ်းကြောင်းအတိုင်း သွားမှာဖြစ်ပြီး၊ NCA သဘောတူညီချက်များအတိုင်း ဖြစ်နိုင်သမျှအလေးထား ဆောင်ရွက်သွားမည်ဆိုသည်ကို အတိအလင်းပြောကြားခဲ့ပြီးဟု ပြောဆိုထားသည်။