သျှမ်းပြည်တောင်ပိုင်း၊ ရွာငံမြို့နယ် သိမ်ကုန်းကျေးရွာတွင် စစ်ကောင်စီခန့် အုပ်ချုပ်ရေးမှူး နှင့် ၎င်း၏ဇနီး အသတ်ခံရကြောင်း ဒေသခံများ ပြောပြချက်အရသိရဿည်။
ယမန်နေ့ (အောက်တိုဘာလ ၁၂ ) ရက် ညနေ ၆ နာရီခွဲအချိန်တွင် အရပ်ဝတ်နှင့် အမည်မသိ လူ (၈) ဦးမှ စစ်ကောင်စီခန့် အုပ်ချုပ်ရေးမှူးနှင့် ၎င်း၏ ဇနီးကို လာရောက်ပစ်သတ်ခဲ့ပြီး ယနေ့ (အောက်တိုဘာလ ၁၃) ရက်နေ့တွင် ရွာငံဆေးရုံတွင် သင်္ဂြိုသွားမည် ဖြစ်ကြောင်း ဒေသခံ အမျိုးသားက သျှမ်းသံတော်ဆင့်ကိုပြောသည်၊ အဆိုပါ စစ်ကောင်စီခန့် အုပ်ချုပ်ရေးမှူးနှင့် ၎င်း၏ဇနီးသည် ရဲတပ်သား ကိုမော့၏ မိဘများလည်း ဖြစ်သည်။
အသတ်ခံရသည့်သူ နှစ်ဉီးသည် စစ်ကောင်စီခန့်အပ်ထားသည့် အုပ်ချုပ်ရေးမှူးဖြစ်ပြီး ရပ်ရွာထဲတွင်လည်း တက်ကြွလှုပ်ရှားသည့် လူငယ်များနှင့် ဒီမိုကရေစီ စနစ်ကို ကြိုက်နှစ်သက်သည့် လူများ အဖမ်းခံရအောင် စစ်ကောင်စီထံ သတင်းပေးသည့် သူလည်းဖြစ်သည်။
“ညနေ ၆ ခွဲတုန်းက သေနတ်သံကြားတယ်။ လန့်သွားတာပဲ။ အိမ်ထဲ ပြေးဝင်ပြီး လှုပ်တောင်မလှုပ်ရဲဘူး။ စစ်သားတွေ ဝင်တင်ထင်တာ။ ဘယ်ဟုတ်မလဲ လူငယ်တွေကို အဖမ်းခံရအောင် သတင်းပေးနေတဲ့ လင်မယားအသတ်ခံရတာ။” ဟု ဒေသခံ အမျိုးသားတစ်ဦးက ပြောသည်။
ထို့အပြင် လာရောက်ပစ်ခတ်ခဲ့သော အမည်မသိ လူများသည် ဦးဇော်လွင်တို့ လင်မယားကို ပစ်ခတ်ပြီး အိမ်ရှေ့တွင် နောက်ထပ်ပစ်မှတ်ထား သည့် လူကျန်ရှိနေသေးကြောင်း စာကပ်ထားခဲ့သည်ဟု ၎င်းအမျိုးသားက ထပ်လောင်း ပြောသည်။
လက်ရှိ သိမ်ကုန်းရွာတွင် စစ်ကောင်စီ လက်အောက်ခံ ပျူစောထီးများ ရှိပြီး ကျေးရွာတွင်း ဒေသခံများ တောခြံသို့ လွတ်လပ်စွာမသွားရဲပဲ ကြောင့်ရွံ့နေကြကြောင်း သိရသည်။
“ရွာမှာ ပျူစောထီးတပ်ထဲကို ဝင်နေတဲ့သူတွေလဲရှိတော့ တောထဲတောင် သိပ်မသွားရဲဘူး။ သူတို့က ရွာသားအချင်းချင်းဆိုပေမဲ့ လက်နက်ရှိတော့ သူတို့က ညှာတာမှာ မဟုတ်ဘူး။ မကျေနပ် အမြင်မကြည်ရင် သတ်သွားမှာကြောက်တယ်။” ဟု အသက် ၄၀ ကျော်အရွယ် အမျိုးသားတစ်ဦးက ပြောသည်။
အုပ်ချုပ်ရေးမှူးလင်မယား အသတ်ခံရပြီးနောက်ပိုင်း နောက်ဆက်တွဲ အနေဖြင့် စစ်ကောင်စီနှင့် ပျူစောထီး တပ်ဖွဲ့ဝင်များက ကျေးရွာသူ၊ ကျေးရွာသားများကို ဖိနှိပ် ခြိမ်းခြောက်မှုများ ပြုလုပ်လာမည်ကို စိုးရိမ်ကြောင်း အဆိုပါ အမျိုးသားက ဆက်ပြောသည်။
လက်ရှိ ရွာငံမြို့နယ်တွင် ပအိုဝ်းပြည်သူ့စစ် (PNO)၊ စစ်ကောင်စီတပ်နှင့် ပျူစောထီးများက နယ်မြေစိုးမိုးနေလျှက်ရှိပြီး ကျေးရွာများတွင်လည်း မကြာခဏ လာရောက် ခြိမ်းခြောက်မှုများ ပြုလုပ်နေကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments