စစ်ကောင်စီ၏ လက်နက်ကြီးပစ်ခတ်မှု၊ လေကြောင်းဗုံးကြဲမှုကြောင့် မြန်မာတဝှမ်း စက်တင်ဘာလအတွင်း အမျိုးသမီး ၆၃ဦး သေဆုံးပြီး၊ ၆၂ဦး ထိခိုက်ဒဏ်ရာရရှိခဲ့ကြောင်း မြန်မာ့အမျိုးသမီးသမဂ္ဂ (BWU) က ပြောဆိုလိုက်သည်။
အဆိုပါ သေဆုံးသွားသည့်သူများသည် သျှမ်းပြည်နယ်အတွင်း ၂၁ဉီး ဖြစ်ပြီး အများဆုံးဖြစ်ကြောင်း လည်း BWU ၏ စက်တင်ဘာ ၄ရက်ထုတ်ပြန်ချက်တွင် ဖော်ပြထားသည်။
စက်တင်ဘာလအတွင်း သျှမ်းပြည် မြောက်ပိုင်း နောင်ချို၊ နမ့်ခမ်း၊ လားရှိုး၊ သီပေါ ဘက်မှာ စစ်ကောင်စီသည် အရပ်သားနေအိမ်အပါအဝင် နေရာအနှံ့ လေကြောင်းဖြင့် ဗုံးကြဲ၊ လက်နက်ကြီးပစ်ခတ်မှုကြောင့် သေဆုံးသွားခြင်းဖြစ်ကြောင်း BWU ၏ တွဲဖက်အထွေထွေ အတွင်းရေးမှူး(၁) မဝေဝေ က သျှမ်းသံတော်ဆင့်ကိုပြောသည်။
“ သေဆုံးမှုတွေ ပိုမြင့်တက်လာရခြင်းအကြောင်းအရင်းက အကြမ်းဖက်စစ်အုပ်စုက ပြည်သူလူထုရဲ့သဘောဆန္ဒမပါဘဲ မတရားလက်နက်အားကိုးနဲ့ အနိုင်ကျင့်လုယူထားတဲ့အာဏာကို လက်လွတ်ဆုံးရှုံးနေရတာကြောင့် ရယ် မတရားသိမ်းပိုက်ရယူဖို့ ကြိုးစားနေတဲ့အာဏာကို လက်လွှတ်ဆုံးရှုံးရမှာကြောက်တဲ့စိုးရိမ်စိတ်အကြောက်တရားတွေနဲ့ ပြည်သူလူထုကို အညှိုးထားပြီး ရက်ရက်စက်စက် နည်းမျိုးစုံနဲ့ အကြမ်းဖက်သတ်ဖြတ်နေတဲ့အတွက်ကြောင့်ဖြစ်တယ်” ဟု ၎င်းက ပြောသည်။
ယခုနှစ် စက်တင်ဘာလအတွင်း စစ်ကောင်စီလက်ချက်ကြောင့် သေဆုံးသွားသည့် အမျိုးသမီးများသည်
မန္တလေးတိုင်းဒေသကြီးမှာ ၁၅ ဦး ရှိသည်ဟု ဖော်ပြထားသည်။
BWU ၏ အမျိုးသမီးသေဆုံးမှုနှုန်းနှင့် ထိခိုက်ဒဏ်ရာရသည့် စာရင်းများသည် သျှမ်းပြည်၊ မန္တလေး၊ ပဲခူး၊ မကွေး၊ ရခိုင်၊ မွန်ပြည်၊ တနင်္သာရီတိုင်း၊ကချင်ပြည် တို့ဖြစ်ကြောင်းသိရသည်။
ထို့အပြင် ယခုလအတွင်း အမျိုးသမီး ၆ ဦးသည် မုဒိမ်းကျင့်ခံခဲ့ရကြောင်းရေးသားထားသည်။
ပြီးခဲ့သည့် ဩဂုတ်လတွင်လည်း စစ်ကောင်စီး၏ တိုက်ခိုက်မှုကြောင့် နိုင်ငံတဝန်း အမျိုးသမီး ၇၀ ဦးသေဆုံးခဲ့ပြီး ၅၉ ဦးက ထိခိုက်ဒဏ်ရာရရှိခဲ့သည်ဟု ရေးသားဖော်ပြထားသည်။
လက်ရှိသျှမ်းပြည်တဝိုက်တွင် အကြမ်းဖက်စစ်ကောင်စီ၏ တိုက်ခိုက်ခိုက်မှုကြောင့် ပြည်သူ နေအိမ်၊ အဆောက်အအုံများနှင့် ထိခိုက်သေဆုံးသူ နေစဉ်နှင့်အမျှ များပြားလာနေသည်ဟု သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments