သျှမ်းပြည်တောင်ပိုင်း ဟိုပုံမြို့နယ် မဲနယ်တောင်ဒေသရှိ ကျေးရွာအချို့တွင် စစ်မှုထမ်းရန် စစ်ကြေးငွေ လစဉ်မထည့်နိုင်သူများကို ရေဘေးအလှူငွေ အပြည့်မရရှိနိုင်ကြောင်း စုံစမ်းသိရသည်။
ပြီးခဲ့သည့် (စက်တင်ဘာလ ၁၁ ရက်) ကစပြီး မဲနယ်တောင်ဒေသဘက်တွင် မိုးသည်းထန်စွာရွာသွန်းပြီး တောင်ကျချောင်းရေကြောင့် ရေကြီး၊ မြေပြိုမှုဖြစ်ကာ စံဖူးကျေးရွာအုပ်စုတွင် နေအိမ်(၈၀)နီးပါးပျက်စီးပြီး သေဆုံးသူ (၂၂)ဦး ရှိသည်။
မဲနယ်တောင်ဒေသအတွင်း အချို့ ကျေးရွာများသည် ရေကြီး၊မြေပြိုမှု ထိခိုက်ပျက်စီးများကာ လမ်းပန်းဆက်သွယ်ရေးသွားလာရခက်ခဲသဖြင့် အလှူရှင်များနှင့် ကျေးရွာကော်မတီအဖွဲ့ဝင်များက စံဖူးကျေးရွာအုပ်စုတွင် စုဝေးကာ ငွေလှူဒါန်းခဲ့ကြောင်း ဒေသခံအမျိုးသမီးတစ်ဉီးက သျှမ်းသံတော်ဆင့်ကို ပြောသည်။
“ တချို့ကျေးရွာက အလှူရှင်တွေသွားလို့မရဘူး။ ကျေးရွာကော်မတီက ရွာသူကြီးကိုပဲပေးလိုက်တာ။ ရွာသူကြီးက ဘာလို့အပြည့်မရလဲမေးတော့ စစ်မှုထမ်းငွေကြေးမထည့်တဲ့အတွက် ဖြတ်ယူသွားတာလိုက်တယ်လိုပြောတယ်” ဟု ၎င်းအမျိုးသမီးက ဆိုသည်။
လက်ရှိကျေးရွာဒေသများတွင် နေအိမ်များ ပြန်လည်ပြုပြင် သန့်ရှင်းရေးပြုလုပ်နေကြပြီး စိုက်ပျိုးထားသည့် ခြံ၊ လယ်ယာတွေထဲတွင် ကျောက်ခဲ၊ကျောက်တုံးများပိနေပြီး စားဝတ်နေရေးအတွက် အခက်ခဲကြုံတွေ့ နေရကြောင်း အသက် ၂၇နှစ်အရွယ် အမျိုးသမီးက သျှမ်းသံတော်ဆင့်ကိုပြောသည်။
“အခုရွာမှာတော့ သန့်ရှင်းရေးတွေပြန်လုပ်နေကြတယ်။ လမ်းတွေလမ်း ပြန်လည်ကောင်းအောင် လမ်းဖောက်နေကြတယ်။ စိုက်ထားတဲ့ အသီးအနှံ လယ်ယာတွေထဲတော့ ကျောက်တုံးတွေပိပြီး ဘာမှလုပ်စားလို့ မရဘူး မိုးတွေထပ်ကြီးလာမှာကို ကြောက်နေရတယ် “ ဟု ၎င်းကပြောသည်။
လက်ရှိမဲနယ်တောင်ဒေသတွင် စစ်မှုထမ်းဥပဒေထွက်ပြီးနောက်ပိုင်း လူငယ်အများစုမှာ ပြည်ပရောက်ထွက်ခွားကြသဖြင့်ကျေးရွာများတွင်သက်ကြီးရွယ်အိုများသာ ကျန်ကြောင်း မဲနယ်တောင် ဒေသခံများကပြောသည်။
မဲနယ်တောင်ဒေသတွင် ကယ်ဆယ်ရေးနှင့် စားနပ်ရိက္ခာအလှူရှင် များစွာလိုအပ်နေကြောင်း သိရသည်။ မဲနယ်တောင် အရှေ့ဘက်ခြမ်းတွင် အလှုရှင်းများ မရောက်နိုင်သေးသည့် ကျေးရွာများအခက်အခဲများစွာ ရင်ဆိုင်နေရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments