သျှမ်းပြည်အရှေ့ပိုင်း မိုင်းတုံမြို့တွင် ရေကြီး၊ ရေလျှံမှုများဖြစ်ပြီးနောက်ပိုင်း သွေးလွန်တုပ်ကွေး ကူးစက်ခံရသူများပြီး သေဆုံးသည့်အထိရှိကြောင်း စုံစမ်းသိရသည်။

မိုင်းတုံမြို့တွင် လူကြီး၊လူငယ်မရွေး သွေးလွန်တုပ်ကွေး အဖြစ်များနေသည့်အတွက် ဆေးရုံ/ ဆေးခန်း များတွင် လူနာများပြည့်နေကာ ကျန်းမာရေး စောင့်ရှောက်မှုအတွက် အခက်အခဲ ရှိနေကြောင်း သိရသည်။

(စက်တင်ဘာလ တတိယ)ပတ်တွင် ယာဉ်မောင်းသူ အမျိုးသားတစ်ဦးသည် သွေး ၆ ပုလင်းသာသွင်းရပြီး ၊ အမျိုးသမီးဖြစ်သူတစ်ဦးနှင့် ကလေးငယ်တစ်ဦး သွေးလွန်တုပ်ကွေးကြောင်း အသက်ဆုံးရှုံးခဲ့ရကြောင်း ကျန်းမာရေး ဝန်ထမ်းတစ်ဉီးက သျှမ်းသံတော်ဆင့်ကိုပြောသည်။

“စက်တင်ဘာလမှာ သွေးလွန်တုပ်ကွေးတွေ အရမ်းဖြစ်ကြတယ် ဆေးရုံး၊ဆေးခန်းတွေဆို လူနာအပြည့်ပဲ။ အရင်လ တတိယပတ်မှာပဲ ကားဆရာတစ်ယောက် သွေး ၆ ပုလင်းတောင်သွင်းရတယ်။ မ အမျိုးသမီးတစ်ဦးနဲ့ ကလေးငယ်တစ်ဦး သေဆုံးသွားတယ်။ ဖုန်းလိုင်းမရတော့ ပိုခက်တယ် ဘယ်မှလည်း ဆက်သွယ်လို့မရဘူး” ဟု ၎င်းက ပြောသည်။

သွေးလွန်တုပ်ကွေးနှင့် ရာသီတုပ်ကွေးရောဂါများကို ကုသရာတွင် အခြေခံလိုအပ်သည့် ဆေးဝါးများမှအစ ခြင်ထောင်၊ ကလိုရင်းဆေးမှုန့်၊ ခြင်ဖြန်းဆေး စသည်ဖြင့် လိုအပ်ချက်များစွာ ရှိနေကြောင်းနှင့် ကျန်းမာရေး တာဝန်ရှိသူများလည်း လာရောက်အသိပေး ဟောပြောခြင်များမရှိနေကြောင်း က ဒေသခံအမျိုးသမီးတစ်ဉီးက ပြောသည်။
“လမ်းပန်းဆက်သွယ်ရေးကခက်ခဲ ဖုန်းလိုင်းတွေ ပြန်မရတာအော်။ ကျန်းမာရေတာဝန်ရှိတဲ့သူတွေလည်း ပညာပေး လာရောက်ဟောပြောတာတွေ မရှိဘူး ။ ရွာတွေဘက်မှာဆို ပိုဆိုးတယ် အရမ်းဖျားကြတယ်။ အဲလိုတွေကြောင့် သေဆုံးသူတွေလည်း ရှိလာပြီ ဘာတွေ ဆက်ဖြစ်အုန်းမလည်းမသိတော့ဘူး “ဟု ၎င်းက ပြောသည်။

လက်ရှိ မိုးရာသီသည် တုပ်ကွေး ဖြစ်များသည့် ရာသီဖြစ်သည့်အတွက် ဒေသခံများ အနေဖြင့် ရေနုတ်မြောင်း၊ ချုံပုတ်များ နှင့် ခြင်များပေါက်များနိုင်သည့် နေရာများ ရှင်းလင်းထားမှုများလည်းရှိသည်ဟု ဒေသခံပြောပြချက်အရ သိရသည်။

မိုးရာသီအချိန်သည် တုပ်ကွေးရောဂါများ အပြင် ကူးစက်လွယ် ရောဂါများ ဖြစ်ကြသည့် နှာစေး၊ ချောင်းဆိုး၊ ဖျားနှာသည့် ရောဂါများလည်း အဖြစ်များကြကြောင်း သိရသည်။

ယင်းကဲ့သို့ ရောဂါကူးစက် ဖြစ်ပွားမှုများကို အချိန်မှီ ကုသမှု မရှိနိုင်ပါက နှလုံးရောဂါ၊ အဆုတ်ရောဂါ နှင့် ခန္ဓာကိုယ်တွင်း ရေဓာတ်ခမ်းခြောက်ခြင်းများ ဖြစ်စေနိုင်ကြောင်းလည်း ကျန်းမာရေးဆိုင်ရာ ဌာနများဖော်ပြချက်တွင် ဖော်ပြထားသည်။

အလုပ်သင် သတင်းထောက် နန်းဆိုင်ခမ်းရေးသားသည်။