သျှမ်းပြည်အလယ်ပိုင်း ကျေးသီးမြို့နယ်အတွင်းရှိ မိုင်းနောင်မြို့နယ်ခွဲ မိုင်းနန်းအုပ်စုအဝင်ဆိုင်းဘုတ်မှာ မြန်မာစာ မပါရှိသဖြင့် ဆိုင်းဘုတ်ဖြုတ်ပစ်ရန် အရှေ့အလယ်ပိုင်း တိုင်းစစ်ဌာနချုပ် (ရလခ) တိုင်းမှူးက အုပ်စုဥက္ကဌအား ခေါ်ယူပြောကြားခဲ့သည်ဟုသိရသည်။
နို၀င်ဘာလ ၁၀ ရက်နေ့ မနက် ၁၀ နာရီက ရလခတိုင်း တိုင်းမှူး ဗိုလ်ချုပ်သန်းလှိုင်က ကျေးသီးမြို့အရှေ့ တောင်ဘက် ၊ မိုင်းနောင်မြို့နယ်ခွဲ အနောက်မြောက်ဘက်ရှိ မိုင်းနန်းအုပ်စုအတွင်း လှုပ်ရှားနေသည့် တပ်စခန်းအား ကျန်းမာရေးစစ်ဆေးမှုပြုလုပ်ရန်သွားစဉ် သျှမ်းဘာသာနှင့် အင်္ဂလိပ် ဘာသာဖြင့် ရေးသားထားသည့် မိုင်းနန်းအုပ်စုအဝင် ဆိုင်းဘုတ်အား အမြန်ဆုံးဖျက်ပစ်ရန် အုပ်စု ဥက္ကဌကို ခေါ်ယူပြောဆိုခဲ့သည်ဟု မိုင်းနန်းမှ ဒေသခံတဦး ကသျှမ်းသံတော်ဆင့်အားပြောပြသည်။
“ကျနော်တို့ ဆိုင်းဘုတ်လုပ်တုန်းကတော့စဉ်းစားမိပါသေးတယ်။ ဗမာစာတလုံး နှစ်လုံးထည့်မလို့။ စာလုံးကို သူများကိုလုပ်ခိုင်းတော့ စာလုံးကြီးသွားလို့ ဗမာစာလုံးထည့်ဖို့မဆန့်တော့တာနဲ့ မထည့်ဖြစ်တာ။ တဖက်က လည်း အသစ်လုပ်ရင်ပိုက်ဆံထပ်ကုန်မယ်လေ။ အုပ်စုအဆင့်ဘဲဖြစ်နေသေး တော့ ဒီတိုင်းဘဲထားလိုက်ပါဆိုပြီး မပြင်ဘဲထားလိုက်တာ ။ အဲတာကိုတိုင်းမှူးက ဆိုင်းဘုတ်တွေ့တာနဲ့ မိုင်နန်းစာသင်ကျောင်းမှာကျောင်း ဆရာတွေကိုတွေ့ဆုံရင်း အုပ်စုဥက္ကဌကိုခေါ်ဆူတာ။ ဗမာစာမထည့်ချင်ရင် ကလေးကို ဗမာကျောင်း လဲမထားနဲ့တဲ့ ။ ဒါက ဗမာပြည်ဆိုတာ သေဘောပေါက်တဲ့ ငေါက်တာ” – ဟု မည်မဖေါ်လိုသည့် ဒေသခံ နောက်တဦးက သျှမ်းသံတော်ဆင့်အားပြောပြသည်။
မိုင်းနန်းအုပ်စုအဝင်ဆိုင်းဘုတ်အား မိုင်းနောင်ဘက်အထွက်လမ်းတွင် ထောင်ထားသည်။ ဆိုင်းဘုတ်တွင် သျှမ်းဘာသာဖြင့် “မိုင်းနန်းအုပ်စုမှလှိုက်လှဲစွာကြိုဆိုပါ၏” ဟုရေးသားထားပြီး အင်္ဂလိပ်ဘာသာဖြင့် MONG NANG ဟုလည်း ရေးသားထားသည်။
သျှမ်းပြည်နယ်အတွင်းရှိ မြို့ဝင်/ထွက် များ၏ ဆိုင်းဘုတ်များကို အများသုံး၊ ရုံးသုံးဖြစ်သည့် မြန်မာဘာသာ စကားအပြင် သက်ဆိုင်ရာမြို့နယ်ရှိ ဒေသခံတိုင်းရင်းသားလူမျိုးတို့၏ ဘာသာစကား များထည့်သွင်းရေးသား လိုက လွတ်လပ်စွာ ရေးသားနိုင်ကြောင်း သျှမ်းပြည်နယ်အစိုးရ စည်ပင်သာယာရေးဝန်ကြီးက ယမန်နှစ် ဂျွန်လက စာထုတ်ပြန်ထားဖူးသည်။ ထိုစဉ်က တောင်ကြီးမြို့အပါအဝင် မြို့နယ်အများအပြားလည်း တိုင်းရင်းသားဘာသာစာပေဖြင့်ရေးသားထားသည့် ဆိုင်းဘုတ်များ တင်ကြသည်။
