သျှမ်းတောင်၊ ကလောမြို့ရှိ ကလောချောင်း ယနေ့ (အောက်တိုဘာလ ၁ ရက်) ညနေ ၅ နာရီခန့်က ရေပြန်တက်လာသဖြင့် ရေကြီးမှုများ ထပ်မံ ဖြစ်ပွားမည်ကို စိုးရိမ်နေရကြောင်း ဒေသခံပြည်သူများက ပြောသည်။

ပြီးခဲ့သည့် စက်တင်ဘာလ ၁၀ ရက်နေ့က စတင်ခဲ့သည့် ကလောမြို့ ရေကြီးမှုကြောင့် ဖုန်းနှင့် အင်တာနက် လိုင်းများ ရက်အတန်ကြာ ပြတ်တောက်ခဲ့ပြီး ဆိုးရွားသည့် ပျက်စီးမှုများ ဖြစ်ပေါ်ခဲ့ရာ ယခုအချိန်အထိ အပျက်အစီးများ ရှင်းလင်းနေရချိန် ချောင်းရေပြန်တက်လာသဖြင့် စိုးရိမ်ကြောင်း မြို့ခံများက ဆိုသည်။

“ခုက ရေပြန်တက်လာတာ၊ ရပ်ကွက် ၄ ထဲရေလျှံလာပြီ။ ရေတက်တာက မြန်တယ်။ အရင်လို ထပ်ဖြစ်ရင် မလွယ်ဘူး” ဟု ရပ်ကွက် (၄) ချောင်းဘေးနေ အမျိုးသမီးတစ်ဦးက ပြောသည်။

ယနေ့ ညနေ ချောင်းရေတက်လာရာ လူမှုကူညီရေး လူငယ်တချို့ ရပ်ကွက် (၄) နေအိမ်များရှိ ပစ္စည်းများ လိုက်လံရွှေ့ပြောင်းပေးကြောင်း၊ ကလောမြို့ အထက်ဘက်တွင် မိုးရွာသွန်း သဖြင့် ရေတက်လာခြင်း ဖြစ်ကြောင်း၊ လက်ရှိအချိန်အထိ ရွံ့နွံများ ရှင်းလင်းနေရဆဲ ဖြစ်သဖြင့် ရေထပ်ကြီမည်ကို စိုးရိမ်ကြောင်း ချောင်းဘေးနေ အမျိုးသား တဦးကပြောသည်။

‘တောင်လားရွာဘက် မိုးကောင်းလို့ ချောင်းရေတက်လာတာ။ ညဘက်ထပ်ဖြစ်မှာ စိုးတာ’ ဟု ၎င်းကပြောသည်။

မိုးလေဝသဌာန၏ ယနေ့ထုတ်ပြန်ချက်၌ သျှမ်းပြည်နယ် တောင်ပိုင်းတွင် မိုးတိမ်တောင်များ ဖြစ်ထွန်းနေပြီး နေရာစိပ်စိပ် မိုးရွာသွန်းနိုင်ကြောင်း ဖော်ပြထားသည်။

ပင်လယ်ရေမျက်နှာပြင်အထက် ပေ ၄၂၈၀ တွင် တည်ရှိသော ကလောမြို့ ရေဘေးကြောင့် ရာနှင့်ချီသည့် နေအိမ်များ လုံးဝ ပျက်စီးမျှောပါသွားပြီး ပြည်သူ ၂၀၀၀ ကျော် ရေဘေးသင့်ခဲ့ကြောင်း၊ ရေဘေးကြောင့် ကလောမြို့ပေါ်တွင် သေဆုံးသူ ၁၃ ဦးရှိခဲ့ကြောင်း လူမှုကူညီရေးအသင်း တာဝန်ရှိသူတစ်ဦးက ပြောဆိုထားသည်။