သျှမ်းပြည်မြောက်ပိုင်း မူဆယ်မြို့တွင် ကျားဖြန့်လုပ်ငန်းလုပ်ကိုင်ပြီး ဖမ်းဆီးခံရသည့် မြန်မာလူမျိုး ၂၀၀ ကျော်ကို ဥပဒေအရ အရေးယူဆောင်ရွက်သွားမည်ကြောင်း သိရသည်။

(စက်တင်ဘာလ ၂၃ ရက်) မူဆယ်မြို့တွင် အွန်လိုင်းကျားဖြန့် ငွေလိမ်လုပ်ငန်း လုပ်ကိုင်သည့် နေရာများကို စစ်ကောင်စီမှ ဝင်ရောက် ဖမ်းဆီးရာ လူဦးရေ ၆၀၀နီးပါးဖမ်းဆီးမိပြီး ထိုထဲတွင် တရုတ်နိုင်ငံသား ၃၀၀ကျော်ပါရှိကြောင်းသိရသည်။

ထို တရုတ်နိုင်ငံသား ၃၀၀ ကျော်ကို (စက်တင်ဘာလ ၂၄ရက်) နေ့လည် ၁ နာရီဝန်းကျင်တွင် ကားအစီး ၂၀ ကျော်နှင့် တရုတ်နယ်စပ် မန့်ဝိန်းဂိတ်မှ တဆင့် ပို့ပေးခဲ့သည်ဟု မြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဖမ်းမိထားတာတော့ ၅၀၀ ကျော် ၆၀၀ နီပါးလောက်ရှိတယ်။ တရုတ်လူမျိုး ၃၀၀ ကျော်ပါတယ်၊ တရုတ်လူမျိုးတွေကို ကားအစီးပေါင်း ၂၀ ကျော်နဲ့ မန့်ဝိန်းပေါက်ကနေ ပို့ပြီး ကျန်တဲ့မြန်မာလူမျိုးတွေကိုတော့ ဖမ်းထားဆဲပါ “ ဟု ၎င်းကပြောသည်။

လက်ရှိတွင် ကျန်ရှိနေသည့် မြန်မာလူမျိုး ၂၀၀ ကျော်ကို ပြန်မလွှတ်သေးဘဲ တရားဉပဒေအရ အရေးယူဆောင်ရွက်သွားမည်ဖြစ်ကြောာင်းသိရသည်။

ထို့အပြင်ဖမ်းခံထားရသည့် ကျားဖြန့်လုပ်ဆောင်သူများသည် မိမိအစီအစဥ်ဖြင့်သာစားသောက်နေရကြောင်း၊ မိသားစုဝင်နှင့် နီးစပ်သူများက လာရောက်ပို့ဆောင်ရကြောင်း အသက် ၄၀ကျော်ရှိ ဒေသခံအမျိုးသား တစ်ဉီးက ထပ်လောင်းပြောသည်။

“ စဖမ်းတုန်းက နေရာမှာပဲ စုပြုံပြီးနေနေရတယ်။ စားသောက်ဖို့ကတော့ နီးစပ်သူတွေ ဆွေမျိုးတွေ လာပေးတယ်။ မရှိတဲ့သူတွေကတော့ ဝေမျှစားသောက်ပေါ့။ သွားတွေ့ရင်လည်း ခဏပဲပေးတွေ့တယ်။ အရေးယူမယ် လို့ပဲပြောတယ်” ဟု ၎င်းက ဆိုသည်။

အဆိုပါက ကျားဖြန့် အွန်လိုင်း ငွေလိမ်ဂိုဏ်း ကိစ္စနှင့်ပတ်သက်ပြီး မကြာခဏဖမ်းဆီးမှုရှိသော်လည်း လက်ရှိအချိန်ထိ ကျားဖြန့်သည် ပပျောက်သွားခြင်းမရှိပေ။

မူဆယ်မြို့ ပတ်ပတ်လည်တွင် တိုင်းရင်းသားလက်နက်ကိုင်များကျင်လည်လှုပ်ရှားသည့်နယ်မြေဖြစ်ပြီး၊ လက်ရှိအချိန်ထိ စစ်ရေးတင်းမာသည့်နေရာဖြစ်ကာ စစ်ကောင်စီနှင့် တိုင်းရင်းသားလက်နက်ကိုင်တို့ တိုက်ပွဲမဖြစ်ပွားသည့် ဒေသ တစ်ခုလည်း ဖြစ်သည်။

အလုပ်သင် သတင်းထောက် နန်းဆိုင်ခမ်း ရေးသားသည်။