သျှမ်းပြည် သီပေါမြို့နယ် နမ့်လန်မြို့အနီး စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ နှစ်ဘက်တိုက်ပွဲအကြား ခရီးသည်(၂)ဦး သေနတ်ကျည်ထိမှန်ပြီး သေဆုံးသွားကြောင်း စုံစမ်းသိရသည်။
စက်တင်ဘာလ (၂၉) ရက် ည ၉ နာရီကျော်တွင် နမ့်လန်မြို့အနီး နားမခေါ်နှင့် ကောင်းဟက်ကျေးရွာ အကြား စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ တိုက်ပွဲဖြစ်ပွားခဲ့ရာ ဖြတ်သန်းသွားလာသည့် ခရီးသည်တင်ကားများလည်း သေနတ်ပစ်ခံရပြီး ကားပေါ်ပါသည့် ခရီးသည် (၂) ဦး သေဆုံး၍ အမျိုးသမီး (၂) ဦး အပါအဝင် (၄) ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။
“တိုက်ပွဲ ရုတ်တရက် ဖြစ်ပြီးတော့ ခရီးသည်ကားတွေ သွားလာနေရင်း သေနတ်မှန်တာ။ ခရီးသည်နှစ်ယောက် သေနတ်ပစ်ခံရပြီး သေတာကတော့ သေချာတယ်။ နားမခေါ်နဲ့ ကောင်းဟက်ကြားထဲ ကိုးကန့်နဲ့ စစ်တပ်တိုက်ပွဲမှာ ဖြစ်တာ။ နမ့်လန်ဘက် လမ်းပေါက်နေတော့ လားရှိုးစစ်ရှောင်တွေလည်း အဲ့ဘက်ပြေးနေကြတာ”ဟု နမ့်လန်မြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
နမ့်လန်မြို့အနီး စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ တိုက်ပွဲအကြား ဖြတ်သန်းသွားလာသည့် ကားများမှ ခရီးသည် (၂) ဦး သေနတ်ကျည် ထိမှန်သေဆုံးသည့်အပြင် အမျိုးသမီး (၂) ဦး အပါအဝင် စုစုပေါင်း (၄) ဦး ထိခိုက်ဒဏ်ရာ ရရှိခဲ့ကြောင်း ဒေသခံများထံမှ သိရသည်။
လက်ရှိတွင် လားရှိုး-တောင်ကြီး ပြေးဆွဲနေသည့် ခရီးသည်တင်ကားများကိုလည်း နမ့်လန်မြို့ နားမခေါ်နှင့် ကောင်းဟက်ကျေးရွာကြားရှိ စစ်ကောင်စီတပ်မှ ယာဉ်ဖြတ်သန်းခ အဆမတန် ကောက်ခံနေပြီး ညအချိန်မှ ဖြတ်သန်းခွင့်ပြုခြင်းကြောင့် လမ်းခရီး အခြေအနေ စုံစမ်းပြီးမှ သွားလာသင့်ကြောင်း ကားသမားများက ပြောသည်။
ပြီးခဲ့သည့် စက်တင်ဘာလ ဒုတိယပတ်မှ စတင်ပြီး နမ့်လန်-သီပေါ လမ်းပိုင်းကို စစ်ရေးအခြေအနေကြောင့် စစ်ကောင်စီတပ်က နားမခေါ်ရွာအနီးတွင် ဖြတ်သန်းသွားလာခွင့် ပိတ်ထားခဲ့ပြီး အရေးပေါ် သွားလာရန် အခက်အခဲများ ကြုံတွေ့နေကြောင်း ဒေသခံများထံမှ သိရသည်။
Leave a Comments