ကချင်ပြည် မိုးမောက်မြို့ကို တန်ပြန်ထိုးစစ်ဆင်လာသည့် စစ်ကောင်စီတပ်ကို ကချင်လွတ်လပ်ရေးတပ် KIA နှင့် PDF ပူးပေါင်းတပ်များက ဝိုင်းရံပိတ်ဆို့ တိုက်ခိုက်လျက်ရှိပြီး တိုက်ပွဲပြင်းထန်နေကြောင်း စုံစမ်းသိရသည်။

စက်တင်ဘာလ (၂၄) ရက်မှ စတင်ပြီး ကချင်လွတ်လပ်ရေးတပ် KIA ထိန်းချုပ်ထားသည့် မိုးမောက်မြို့ရှိ ခြေမြန်တပ်ရင်း ခမရ-၄၃၇ ကို ပြန်လည်ရရှိရန် စစ်ကောင်စီတပ်က ဗန်းမော်မြို့ဘက်မှ အင်အားအလုံးအရင်းဖြင့် ထိုးစစ်ဆင်လာခြင်းကြောင့် ၆ မိုင် နှင့် ၇ မိုင်ကျေးရွာဘက်တွင် KIA ပူးပေါင်းတပ်ဖွဲ့နှင့် တိုက်ပွဲပြင်းထန်နေကြောင်း ဒေသခံများက ပြောသည်။

“လက်နက်ကြီးကော နေ့တိုင်းပစ်နေတာ၊ လေယာဉ်နဲ့ ၆ ခါထက်မနည်းဘူး ဗုံးလာကြဲတာ။ KIA သိမ်းနိုင်ကတည်းက တိုက်ပွဲကတော့ မငြိမ်ဘူး၊ နေ့တိုင်းနီးပါး ပြန်ဖြစ်နေတာပဲ။ ဗန်းမော်ကလာတဲ့ စစ်ကြောင်းနဲ့ ၇ မိုင်ဘက် အောင်မြေမှာ ဖြစ်နေတာ”ဟု မိုးမောက်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ဗန်းမော်မြို့ဘက်မှ သံချပ်ကာယာဉ်များဖြင့် စစ်ကြောင်းထိုးလာသည့် စစ်ကောင်စီတပ်ကို KIA ပူးပေါင်းတပ်များက ဗန်းမော်နှင့် မိုးမောက်မြို့နယ်အကြား ၆ မိုင်၊ ၇ မိုင်နေရာရှိ အောင်မြေကျေးရွာတွင် ဝိုင်းရံပိတ်ဆို့ထားပြီး တိုက်ပွဲပြင်းထန်နေကြောင်း ဒေသခံများက ဆိုသည်။

မိုးမောက်မြို့အခြေစိုက် စစ်ကောင်စီ ခြေမြန်တပ်ရင်း ခမရ-၄၃၇ ကို ကချင်လွတ်လပ်ရေးတပ် KIA မှ ဩဂုတ်လ (၁၉) ရက်တွင် အပြီးသတ် သိမ်းပိုက်နိုင်ခဲ့ကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက သျှမ်းသံတော်ဆင့်ကို ဩဂုတ်လ (၂၁) ရက်တွင် အတည်ပြု ပြောဆိုထားသည်။

၎င်းနောက်တွင် ဗန်းမော်မြို့ လုံခြုံရေးအတွက် အဓိက ဖြစ်သည့် ခမရ-၄၃၇ တပ်ရင်းကို ပြန်လည်ထိန်းချုပ်နိုင်ရန် စစ်ကောင်စီတပ်မှ တစ်လနီးပါး ကြာမြင့်သည်အထိ တန်ပြန်ထိုးစစ်ဆင်လာခြင်းကြောင့် တိုက်ပွဲဆက်လက်ပြင်းထန်နေကြောင်း သိရသည်။

မိုးမောက်မြို့နယ်သို့ စစ်ကောင်စီတပ်မှ လေကြောင်းဖြင့် (၇) ကြိမ် ပစ်ခတ်တိုက်ခိုက်ခဲ့ပြီး ဒရုန်းဗုံးကြဲခြင်းအပြင် လက်နက်ကြီးဖြင့် အကြိမ် (၅၀) ကျော် ပစ်ခတ်ခဲ့ကြောင်း KIO ဘက်မှ စက်တင်ဘာလ ၂၄ ရက်တွင် ထုတ်ပြန်သည်။

လက်ရှိတွင် တိုက်ပွဲဆက်လက် ပြင်းထန်နေခြင်းကြောင့် ဗန်းမော်နှင့် မိုးမောက်မြို့နယ်မှ ဒေသခံများမှာ စစ်ဘေးရှောင်ရန် ထပ်မံထွက်ပြေးနေရကြောင်း ဒေသခံများထံမှ သိရသည်။