သျှမ်းပြည်နယ်တောင်ပိုင်း၊ရွာငံမြို့နယ် ယကြီးရွာတွင် ရေကြီးရေလျှံမှုဖြစ်လာတာကြောင့် ကျေးရွာအချို့ရေဘေးသင့်နေကြောင်း သိရသည်။
ယခု (စက်တင်ဘာ ) တတိယပတ်ကစပြီး မိုးသည်းထန်စွာ ရွာသွန်းမှုကြောင့် ရေကြီးရေလျှံမှုစတင်ဖြစ်လာကာ ယကြီးကျေးရွာရှိ နေအိမ် (၅၀) ကျော်ရေနစ်မြုပ်နေကာ ကူညီကယ်ဆယ်မှုများလိုအပ်နေကြောင်းနှင့် ဖုန်းလိုင်းလည်း ပြတ်တောက်နေကြောင်း သိရသည်။
“ အခုက ရေတွေ မြှုပ်နေတယ်။ အိမ်က( ၅၀ )ကျော်မယ်ထင်တယ်။ လူတွေကတော့ တခြား အမျိုးရှိတဲ့ဖက်နဲ့ တောခြံ တောင်ကုန်းတွေမှာ ရှောင်နေကြတယ်။ ခုက ကယ်ဆယ်ရေးတွေလည်း မရောက်လာသေးဘူး။”ဟု ဒေသခံတစ်ဦးကပြောသည်။
ရွာအနီးနားရှိ ချောင်းရေမှာ အဆမတန်မြင့်တက်လာပြီး ယကြီး ကျေးရွာနှင့် အနီးနားရှိ မင်းပလောင်ရွာ၊ တဲ့လုကျေးရွာ၊ဝါးရွက်ရွာ နှင့် မြေနီကုန်းကျေးရွာ တို့မှာ ရေများဝင်ရောက်လျှက်ရှိကြောင်း သိရသည်။
“အခုက အဆက်သွယ်တွေ ပြတ်နေတာ ကျနော်တို့လည်း အဲဒီဘက်ကို ကူညီပေးဖို့ပြင်ဆင်နေပါတယ်။ အခြေနေကိုတော့ တိကျမသိရသေးဘူး။ နေအိမ်ပျက်စီးတာတို့ လူသေဆုံးမှုတို့ရှိ၊မရှိဆိုတာက မသိရသေးဘူးပေါ့လေ။ အခုနှစ်မှ ရေကြီးဖူးတာ ပထမဆုံးပဲ။” ဟု ရွာငံ ပရဟိတ အဖွဲ့ဝင်တစ်ဦးမှ သျှမ်းသံတော်ဆင့်ကို ပြောသည်။
လက်ရှိရွာငံတွင်စစ်ကောင်စီမှ အဝင်ထွက်ဂိတ်များတွင် စစ်ဆေးရေးတင်းကြပ်နေလျှက်ရှိပြီး လမ်းပန်းဆက်သွယ်ရေးအခက်ခဲကြောင့် ကုန်ပစ္စည်းများပြတ်လပ်နေသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments