သျှမ်းပြည်မြောက်ပိုင်း တအာင်း(ပလောင်)အမျိုးသားလွတ်မြောက်ရေးတပ်မတော် (TNLA) ထိန်းချုပ်သည့် သီပေါမြို့နယ်အတွင်း စစ်ကောင်စီတပ်က လေကြောင်း ဗုံးကြဲတိုက်ခိုက်သဖြင့် အရပ်သား ၅ဦးသေဆုံးပြီး၊ ၃ဦး ဒဏ်ရာရရှိကြောင်း စုံစမ်းသိရသည်။
စစ်ကောင်စီသည် ယမန်နေ့ ( စက်တင်ဘာ ၂၃)ရက် နံနက်ပိုင်းတွင် သီပေါမြို့ ဘုရားကုန်း ရပ်ကွက်သို့ စစ်ကောင်စီမှ လေကြောင်းဖြင့် ဗုံးကြဲ တိုက်ခိုက်ခဲ့သဖြင့် အရပ်သားတစ်ဉီး သေဆုံးခဲ့ပြီး၊ ထိုနေ့ ညနေ (၃)နာရီခွဲဝန်းကျင်တွင် သီပေါမြို့ နားလွယ်လီဆူကျေးရွာအတွင်းသို့ ထပ်မံဗုံးကြဲကာ အရပ်သား ၄ဦးသေဆုံးပြီး၊ ၃ဦး ဒဏ်ရာရရှိခဲကြောင့် သီပေါမြို့ လူမှုကယ်ဆယ်ရေးအဖွဲ့မှ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“ မနေ့က မနက်ပိုင်းက ဘုရားကုန်ရပ်ကွက်ကို ဗုံးကြဲတာ ၁ ဦးသေတယ်။ ညနေပိုင်း ၃ နာရီခွဲဝန်းကျင်တုန်းလည်း ထပ်လာကြဲတယ်။ အဲအိမ်မှာရှိတဲ့ မြေးအဖွား ၄ ယောက်လုံး ပွဲချင်းဆုံးသွားတယ်။ ၃ ယောက်ဒဏ်ရာရသွားတယ်။ နေအိမ်တွေ အကုန်ပျက်စီးကုန်တယ် “ ဟု ၎င်းကပြောသည်။
ပြီးခဲ့သည့် စက်တင်ဘာလ ၁၃ ရက်မှစပြီး ယမန်နေ့ (စက်တင်ဘာလ ၂၄) ရက်အတွင်း စစ်ကောင်စီတပ်နှင့် TNLA တို့တိုက်ပွဲ ဖြစ်ပွားပြီး၊ စစ်ကောင်စီဘက်မှ လေကြောင်း ဗုံးကြဲတိုက်ခိုက်မှုကြောင့် ပြည်သူ (၁၅)ဦးထက်မနည်းသေဆုံးပြီး ဒဏ်ရာရရှိသူ (၈)ဦး ရှိကြောင်း သီပေါဒေသခံ အမျိုးသားတစ်ဉီးက ပြောသည်။
“စစ်တပ်က နေ့တိုင်းလေယာဉ်နဲ့ ဗုံးလိုက်ကြဲတာ။ ထိခိုက်သေဆုံးရင် ပြည်သူတွေကိုပဲထိတာ။ သူတို့သာတကယ် ပစ်ချင်ရင် တပ်ဖွဲ့ရှိတဲ့နေရာကို သွားပစ်စေချင်တယ် ။ကျနော်တို့ ပြည်သူတွေ ခိုလုံတဲ့နေရာ လာမပစ်ကြပါနဲ့။ သေတဲ့သူလည်း တဖြေးဖြေးနဲ့များလာတယ်” ဟု ၎င်းကပြောသည်။
ထို့အပြင် နေအိမ်အဆောက်အဦး ပျက်စီးမှုများပြားပြီး ထိခိုက်သေဆုံးသွားသူများကို သီပေါ နယ်စည်းမခြား ပရဟိတအသင်းမှ သွားရောက်ကူညီပေးခဲ့သည်ဟု သိရသည်။
လက်ရှိ တိုက်ပွဲကြောင့် စစ်ရှောင်များသည် သီပေါမြို့နှင့် တစ်မိုင်ခန့်ဝေးကွာသော လှိုဏ်ဂူအတွင်းသို့ ထွက်ပြေး တိမ်းရှောင်နေကြပြီး၊ စားနပ်ရိက္ခာနှင့် အဝတ်ထည် ဆေးဝါးများ လိုအပ်လျက်ရှိသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments