သျှမ်းပြည်တောင်ပိုင်း၊ ကလောမြို့နယ်တွင် ဖြစ်ပွားခဲ့သောရေကြီးရေလျှံမှုကြောင့် နေအိမ်ပျက်စီးဆုံးရှုံးပြီး ရေလွှတ်ရာသို့ တိမ်းရှောင်နေရသည့် ပြည်သူများအား လှူဒါန်းသည့် ပစ္စည်းများကို ဒုက္ခသည်အဖြစ်ဟန်ဆောင်ကာ အုပ်စုဖွဲ့လာရောက် ယူဆောင်မှုများရှိနေကြောင်း စုံစမ်းသိရှိရသည်။
ယမန့်နေ (စက်တင်ဘာလ ၁၈ ရက်) သျှမ်းပြည်တောင်ပိုင်း ကလောမြို့၌ ရေဘေးရှောင်များကို လှူဒါန်းသည့် အစားအစာ၊ အထောက်အပံ့ပစ္စည်းများကို ဒုက္ခသည်ဟန်ဆောင်ကာ အုပ်စုဖွဲ့ လာရောက်ယူဆောင်မှုများရှိနေကြောင်း ကလောမြို့ခံတစ်ဦးက သျှမ်းသံတော်ဆင့်သို့ပြောသည်။
“ရေဘေးဒုက္ခသည်မဟုတ်ဘဲ တခြားကလာတဲ့သူတွေ စခန်းသာကနေ ကလောမြို့လမ်းအောက်ဘက်တွေမှာ အဖွဲ့လိုက် ဒုက္ခသည်ဟန်ဆောင်ပြီးတော့ အလှူရှင်တွေရဲ့ ပစ္စည်းတွေကို လာယူပါတယ်ဗျ၊ အလှူရှင်တွေ ပြန်တဲ့အချိန် ညနေပိုင်းလောက်မှာ ပီနံ အိတ်တွေနဲ့ သုံးဘီးတွေဌားပြီးပြန်နေကြပါတယ်” ဟု မြို့ခံတစ်ဦးကပြောသည်။
ကလောမြို့ခံများ ပူပင်သောကရောက်နေကြသည့်အတွက် လာယူမှန်းသိသော်လည်း မည်သို့မျှမလုပ်နိုင်ကြောင်း ၎င်းကဆက်ပြောသည်။
“အုပ်စုဖွဲ့ပြီးလုပ်နေတာကြောင့်လည်း ထင်ပါတယ်၊ အလှူရှင်တွေကလည်း မသိကြဘူး ဒုက္ခရောက်နေတဲ့မြို့ခံထင်ပြီး စေတနာနဲ့လှူပေးနေကြတာ၊ မြို့ခံတွေကလည်း သိပေမယ့် အပူကိုယ်စီနဲ့ဆိုတော့ ပြောဖို့ကိုအချိန်မရှိဘူးထင်ပါတယ်” ဟု ၎င်းကဆက်ပြောသည်။
ထို့အပြင် ရေဘေးကြောင့် ဘေးလွတ်ရာတိမ်းရှောင်နေကြသည့် ပြည်သူများ၏နေအိမ်များကိုလည်း ဖောက်ထွင်းမှုများ၊ ပျက်စီးသွားသော နေအိမ်အဆောက်အဦးမှ သစ်များ၊ ပရိဘောဂ အသုံးဆောင်ပစ္စည်းများကိုလည်း အုပ်စုဖွဲ့ဝင် ရောက်ရှာဖွေကာ ပြန်လည်ရောင်းချနေသူများပါရှိနေကြောင်း ၎င်းကဆက်ပြောသည်။
လက်ရှိတွင် ကလောမြို့ပေါ်တွင်သာမက ကလောမြို့နယ်တွင်းရှိ ကျေးရွာအများအပြားတွင် တောင်ပြိုမှု၊ မြေပြိုမှုများဆက်တိုက်ဖြစ်ပွားနေပြီး လမ်းပန်းဆက်သွယ်ရေးပြတ်တောက်ကာ အကူအညီများစွာ လိုအပ်နေကြောင်း လည်းသိရသည်။
လက်ရှိတွင် ရေဘေးဒဏ်ခံရသည့် မြို့ခံအများစုမှာ ရန်ငြိမ်းအေးဘုန်းကြီးကျောင်း၊ မြို့မ ကျောင်း၊ သိမ်နောင်ကျောင်း၊ ဓမ္မစကြံာဘုန်းကြီးကျောင်းနှင့် အလယ်တန်းကျောင်းတို့တွင် ခိုလှုံနေရကြောင်းသိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments