သျှမ်းပြည် အရှေ့ပိုင်း ကျိုင်းတုံမြို့နှင့် တုံတာမြို့ကြားတွင် တောင်ပြို နှင့် တံတားအပ်ကွဲခြင်းတို့ကြောင့် ကုန်တင်ကားကြီး ၃၀၀ ကျော်ပိတ်မိနေကြောင်း စုံစမ်းသိရသည်။
ပြီးခဲ့သည့် စက်တင်ဘာလ ဒုတိယပတ်မှစပြီး မိုးရွာသွန်းမှုကြောင့် ကျိုင်းတုံမြို့ နှင့် တုံတာမြို့ ကြားတွင် တောင်ပြိုခြင်း၊ တာလေမြို့ရှိတံတားအပ်ကွဲခြင်းကြောင့် စပယ်ရှယ်တောင် နှင့် ကိုးကွေ့တောင်တို့တွင် ကုန်စည်ပစ္စည်းတင်သည့်ကား ဆီဘောက်ဆာကားစသည့် ၁၂ ဘီး ၊ ၂၂ ဘီး တွဲကားကြီးများ အစီးရေ ၃၀၀ ကျော်ပိတ်မိနေကြောင်း ကားသမားတစ်ဦးက သျှမ်းသံတော်ဆင့်ကို ပြောသည်။
“ကားငယ်တွေပဲသွားလို့ ရသေးတယ်။ ကားကြီးတွေက သွားမရဘူး။ တချို့နေရာက လမ်းအရမ်းကျဉ်းတာရယ် တာလေတံတားကအပ်လို့ သူတို့ပေးမဖြတ်တာရယ်ကြောင့် သွားလို့မရဘူး။ စပယ်ရှယ်ကနေ တုံတာထိရှိတယ်။ ရပ်ထားတဲ့ ကားကြီးတွေ။ လမ်းမှာကားကြီးတွေအရမ်းပိတ်တယ်။ ကျနော်မနေကလာတာ ” ဟု ကားသမားတစ်ဦး က ပြောသည်။
သျှမ်းပြည်တောင်ပိုင်း လွိုင်လင် နှင့် မိုင်းပွန်ကြား၊ အရှေ့ပိုင်းတွင် ကျိုင်းတုံ နှင့် တုံတာ ကြားတွင် မြေပြိုမှုကြောင့် လမ်းပိုင်းတွင် တွဲကားကြီးများစွာ ပိတ်မိနေပြီး၊ မိုင်းရှူးမြို့တွင် စက်သုံးဆီဈေးနှုန်းများ တက်နေကြောင်း မိုင်းရှူးမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဆီကတော့ မပျက်သေးဘူး။ဈေးတော့ တက်နေတယ်။ထိန်းပြီး ရောင်းနေကြတာ။ဆီကားတွေက တောင်ကြီးကနေလည်း လာမရ။တာချီလိတ်ကနေလည်း လာမရ။အခုကတော့ ငါးထောင်ကျော် ခြောက် ထောင်နီးပါးလောက်ရှိနေတယ်။ ထပ်တက်ဖို့ရှိ မယ်ထင်တယ်”ဟု မိုင်းရှူးမြို့ ဒေသခံအမျိုးသားတစ်ဦးက ပြောသည်။
လက်ရှိ မိုင်းရှူးမြို့တွင် စက်သုံးဆီ 92 တစ်လီတာလျှင် ငါးထောင် ငါးရာကျပ် (၅,၅၀၀)မှ ခြောက်ထောင် (၆,၀၀၀) ဝန်းကျင် နှင့် 95 တစ်လီတာလျှင် ငါးထောင်ရှစ်ရာ (၅,၈၀၀) မှ ခြောက်ထောင် (၆,၀၀၀)ကျော် အထိ ရှိနေပြီး၊ အခြားသော ကုန်စည်ပစ္စည်းများလည်း အနည်းငယ် စျေးတက်နေကြောင်း ဒေသခံများက ပြောသည်။
ထိုတောင်ပြိုခြင်း တံတားအပ်ကွဲခြင်းများကြောင့် ကာလိမြို့၊ ကွန်ဟိန်းမြို့ စသည့် လမ်းတစ်ကြောရှိ မြို့များတွင် ကုန်ဈေးနှုန်း၊ စက်သုံးဆီဈေးနှုန်းများ အနည်းငယ် တက်နေကြောင်း ကားသမားများက သျှမ်းသံတော်ဆင့်ကို ပြောသည်။
ယခုနှစ် သျှမ်းပြည်အရှေ့ပိုင်း နှင့် သျှမ်းပြည်တောင်ပိုင်း ရေကြီး၊ရေလျှံမှုသည် အကြီးမားဆုံးဖြစ်ပြီး ဆုံးရှုံးမှု အများဆုံး ရင်ဆိုင်ရသည့် နှစ်ဖြစ်သည်။
သျှမ်းပြည်တောင်ပိုင်း မြို့နယ်နှင့် ကျေးရွာတွင် ရာဂီတိုင်ဖွန်းမုန်တိုင်း အရှိန်ကြောင့် လူ ၁၄၀ ဦးသေဆုံးခဲ့ကြောင်း ပအိုဝ်းလူငယ်အစည်းအရုံး PYO က စက်တင်ဘာလ ၁၆ ရက်တွင် ထုတ်ပြန်ထားသည်။
Leave a Comments