မြန်မာနိုင်ငံ ဒေသအတော်များများတွင် ယခုဖြစ်ပေါ်နေသည့် သဘာဝဘေးကြောင့် ထိခိုက်ပျက်စီးမှုများကို တကယ်စိတ်မကောင်းဘူးဟု စစ်ခေါင်းဆောင် မင်းအောင်လှိုင်က ပြောကြားလိုက်သည်။

ယမန်နေ့ စက်တင်ဘာလ ၁၈ ရက်နေ့တွင် ပျဉ်းမနားမြို့နယ် မင်္ဂလာဗျူဟာသာသနာ့ဗိမာန်ခန်းမဆောင်၌ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေဝန်ကြီးဌာန ပြည်ထောင်စုဝန်ကြီးတို့နှင့် တွေ့ဆုံခဲ့ရာတွင် ဗိုလ်ချုပ်မှုးကြီးမင်းအောင်လှိုင်က ထိုကဲ့သို့ ပြောဆိုခဲ့ခြင်း ဖြစ်သည်။

”သဘာဝဘေး အန္တရာယ်ဆိုတာက ရှောင်ရှားလို့ မရဘူးပေါ့ဗျာ၊ တကယ်တော့ စိတ်မကောင်းဘူး။ နိုင်ငံတော်ရဲ့ ဆုံးရှုံးမှုဆိုတဲ့ဟာထဲမှာလည်း ခင်ဗျားတို့ရဲ့ ပိုင်ဆိုင်မှုများပါသလို၊ နိုင်ငံတော်က တည်ဆောက်ထား တဲ့ လမ်းတို့၊ တံတားတို့ အဆောက်အဦးတွေ၊ စက်ရုံအလုပ်ရုံတွေ၊ လျှပ်စစ်ဓာတ်ပေးဝေရေးလုပ်ငန်းတွေ၊ ဆက်သွယ်ရေးလုပ်ငန်း၊ ဒါတွေလည်း နိုင်ငံတော်ရဲ့ ဆုံးရှုံးသွားတာပဲ” ဟု ဗိုလ်ချုပ်မှူးကြီး မင်းအောင်လှိုင်က ပြောသည်။

ထိုဖြစ်ရပ်များနှင့် ပတ်သက်၍ စိတ်လည်းမကောင်းသကဲ့သို့ အသက်နိုင်ဆုံး ပြည်သူလူထုတို့၏ မူလအခြေအနေအတိုင်း ဖြစ်အောင် ကူညီပေးမည်ဟုလည်း ၎င်းကဆက်ပြောသည်။

သို့သော် နိုင်ငံအနှံ့ ရေကြီးရေလျှံဖြစ်ပေါ်နေစဉ် ကာလအတွင်းနှင့် ရေကြီးရေလျှံ ဖြစ်ပွားပြီးနောက် ရေးဘေးသင့်ပြည်သူအများစုသည် ပြည်သူများထဲမှပြည်သူ၏ ကူညီထောက်ပံ့မှုကိုသာရရှိကြပြီး စစ်ကောင်စီထံမှ အကူညီထောက်ပံ့မှုများ မရရှိကြကြောင်းဆိုသည်။

ထို့အပြင် ရာဂီမုန်တိုင်းအရှိန်ကြောင့် ပြီးခဲ့သည့် စက်တင်ဘာလ ၉ ရက်နေ့မှစတင်ကာ ဒေသအများအပြားတွင် မိုးသည်းထန်စွာရွာသွန်းခဲ့ပြီးသည့်နောက် သျှမ်းပြည်နယ်အရှေ့ပိုင်းမှာ ရေကြီးရေလျှ့မှုများ ဖြစ်ပေါ်လာခဲ့သော်လည်း စစ်ကောင်စီအနေဖြင့် ဒေသခံများအတွက် ထိထိရောက်ရောက် အသိပေးနှိုးဆော်ခြင်းမျိုး မပြုလုပ်ခဲ့ကြောင်း ဒေသခံများကပြောသည်။