သျှမ်းပြည်နယ်မြောက်ပိုင်း တအာင်း(ပလောင်)အမျိုးသားလွတ်မြောက်ရေးတပ်မတော် (TNLA) ထိန်းချုပ်သည့် သီပေါမြို့နယ်အတွင်း စစ်ကောင်စီတပ်က လေကြောင်း ဗုံးကြဲတိုက်ခိုက်သဖြင့် အရပ်သား(၁၀) ဦးထက်မနည်း သေဆုံးကြောင်း သတင်းရရှိသည်။
ပြီးခဲ့သည့် စက်တင်ဘာလ ၁၃ ရက်မှစပြီး ယမန်နေ့( စက်တင်ဘာ ၁၇ )ရက်နေ့ (၅) ရက်အတွင်း စစ်ကောင်စီတပ်နှင့် တအာင်းအမျိုးသားလွတ်မြောက်ရေးတပ်မတော်(TNLA) တို့
တိုက်ပွဲ ဖြစ်ပွားပြီး၊စစ်ကောင်စီဘက်မှ လေကြောင်း ဗုံးကြဲတိုက်ခိုက်မှုကြောင့် ပြည်သူ (၁၀)ဦးထက်မနည်းသေဆုံးပြီး ဒဏ်ရာရရှိသူ (၅)ဦး ရှိကြောင်း သီပေါဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“ နေ့တိုင်းတိုက်ပွဲဖြစ်နေတယ်။ စစ်တပ်ကလည်း နေ့တိုင်းလို လေယာဉ်နဲ့လာပစ်တယ်။ ဒီဘက်က ဖုန်းလိုင်းက သိပ်မရတော့ အချက်အလက်ကောက်ရခက်တယ်။ ကျနော်တို့ ကောက်ထားတဲ့ စာရင်းအရက သေဆုံးသူက ၁၀ဦးထက်မနည်းရှိတယ်။ မနေ့က မြို့ဟောင်း မှာ တစ်ဦးသေပြီး တစ်ဦးဒဏ်ရာ ရတယ်။” ဟု သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် သီပေါဒေသခံများသည် စစ်ကောင်စီ၏လေကြောင်းရန်ကို စိုးရိမ်သဖြင့် မြို့ကိုစွန့်ခွာကာ အခြားဒေသသို့ ပြောင်းရွှေ့နေကြကြောင်း ၎င်းအမျိုးသားက ထပ်လောင်းပြောသည်။
“ရွာတွေ တောထဲတွေမှာ ပြန်သွားရှောင်ရတယ်။အစားသောက်ဆေးဝါးတွေလည်း ခက်ခဲတယ်။ ဝမ်းစာအတွက် ရှာမယ်ဆိုလည်း အလုပ်မရှိ ပိုက်ဆံမရှိဘူး။ ခလေးတွေပါတော့ ပိုစိတ်ပူရတယ်။ အစားအသောက်မရှိရင် ဘယ်လိုနေလို့ရမလဲ မသိဘူး” ဟု သီပေါစစ်ရှောင်တစ်ဦးက ပြောသည်။
လက်ရှိ စစ်ရှောင်များသည် သီပေါမြို့နှင့် တစ်မိုင်ခန့်ဝေးကွာသော လှိုဏ်ဂူအတွင်းသို့ ထွက်ပြေးတိမ်းရှောင်နေကြပြီး၊ စားနပ်ရိက္ခာနှင့် အဝတ်ထည် ဆေးဝါးများ လိုအပ်လျက်ရှိသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments